18 ޖޫން 2018 - 08:20
ފިރިހެނުން ސިއްހަތަށް ދޭ ސަމާލުކަން ކުޑަ ކަމަށާއި ސިއްހީ ގޮތުން ދިމާވާ ކަންކަމަށް އެ މީހުންގެ ހޭލުންތެރިކަން ވެސް ކުޑަ ކަމަށް ދިރާސާއެއްގައި ބުނެފި އެވެ.
ފިރިހެނުންނަށް ދުޅަހެޔޮ ސިއްހަތެއް ހޯދައި ދޭން މަސައްކަތްކުރާ އޮސްޓްރޭލިއާގެ މޮވެމްބާ ފައުންޑޭޝަނާއި ޖިލެޓް ގުޅިގެން ހެދި ދިރާސާގައި ބުނި ގޮތުގައި ފިރިހެނުންގެ ތެރެއިން ގިނަ މީހުންނަކީ ބަލިވިޔަސް ޑޮކްޓަރަށް ދައްކަން ސަމާލުކަން ނުދޭ މީހުންނެވެ. އަދި މަސައްކަތުގައި ބިޒީވެގެން، ޑޮކްޓަރަށް ދައްކަން ގިނަ ފިރިހެނުން ހަނދާން ވެސް ނުހުންނަ ކަމަށް ބުނެފައިވެ އެވެ.
ދިރާސާގައި ފާހަގަކޮށްފައިވާ ގޮތުގައި ސިއްހީ ގޮތުން ކަމެއް ދިމާވިޔަސް، ޑޮކްޓަރަށް ދައްކާލައި، ޗެކަޕެއް ހަދާލުމަކީ މުހިއްމު ކަމެއް ކަމަށް ދެކޭ ފިރިހެނުންނާއި ސިއްހީ ގޮތުން މައްސަލައެއް ނެތް ކަމަށް އަމިއްލަ ނިންމައިގެން ތިބޭ ފިރިހެނުން ވެސް ނިސްބަތުން ގިނަ އެވެ.
ޖިލެޓްގެ ބްރޭންޑް މެނޭޖަރު މެތިއު ތޯމަސް ބުނި ގޮތުގައި ސިއްހީ ކަންކަމާ ދޭތެރޭ ފިރިހެނުން ދެކޭ ގޮތް ބަދަލުކުރުން ވަރަށް މުހިއްމު ކަމެކެވެ. އަދި ބަލިވެއްޖެ ނަމަ، ކަމާ ބެހޭ ޑޮކްޓަރަކަށް ދައްކައިގެން ފަރުވާ ހޯދުމަކީ ކޮންމެހެން ވެސް ކުރަން ޖެހޭ ކަމެއްކަން ފިރިހެނުން ގަބޫލު ކުރަން މަޖުބޫރުވާ ކަމަށް ބުންޏެވެ.
"އަހަރެމެން އަބަދު ވެސް ބާރު މި އަޅަނީ ދުޅަހެޔޮ ދިރިއުޅުމަކަށް. އެހެންވެ ފިރިހެނުން އެ މީހުންގެ އަމިއްލަ ސިއްހަތާ ދޭތެރޭ ވަރަށް ސީރިއަސް ވާން ޖެހޭ،" މެތިއު ބުންޏެވެ. "ސިއްހަތަށް ފަރުވާ ކުޑަކޮށް އިހުމާލުވުމަކީ ބޮޑު މައްސަލައަކަށް ވެދާނެ."
މޮވެމްބާ ފައުންޑޭޝަންގެ ޔޫކޭ/ޔޫރަޕްގެ ކަންޓްރީ ޑިރެކްޓަރު އެނީ-ސެސިލް ބާތިއާ ބުނި ގޮތުގައި ސިއްހަތަށް ފިރިހެނުން ދޭ ސަމާލުކަން ކުޑަވުމަކީ ބޮޑު ނުރައްކަލެއް އަދި ގޮންޖެހުމެއް ކަމަށެވެ.
"މީހާ ޖިސްމާނީ ގޮތުން ވެސް އަދި ނަފުސާނީ ގޮތުން ވެސް ދުޅަހެޔޮ މީހާކަށް ވާނީ އެ މީހަކު އަމިއްލަ ސިއްހަތާ ދޭތެރޭ ވިސްނާ މިންވަރަކުން،" އޭނާ ވިދާޅުވި އެވެ. "އެކަމަކު އަހަރެމެންނަށް ދިރާސާގައި ވެސް ފާހަގަ ކުރެވުނީ ސިއްހީ ގޮތުން ދިމާވެދާނެ ކަންކަމަށް ފިރިހެނުންގެ ހޭލުންތެރިކަން ކުޑަކަން. މިކަމަށް އެބަޖެހޭ މަސައްކަތްތަކެއް ކުރަން."
ދިރާސާގައި ފާހަގަކޮށްފައިވާ ގޮތުން މި ފަހަކަށް އައިސް ޒުވާން ފިރިހެނުންނަށް އެންމެ އާންމުކޮށް ދިމާވާ ސިއްހީ އެއް މައްސަލައަކީ ޓެސްޓިކިއުލާ ކެންސަރެވެ. އެކަމަކު ޗެކްޕްތައް ހަދާ މީހުންގެ ނިސްބަތުން ވަރަށް މަދެވެ.
"މުހިއްމު ކަމަކީ ތިމާގެ އަމިއްލަ ސިއްހަތާ ދޭތެރޭ އަމިއްލަ އަށް ގޮތްތަކެއް ނިންމައިގެން ހުންނާނަކަށް ނުވާނޭ. އެބަޖެހޭ ދޭތެރޭ ދޭތެރެ އިން ޗެކަޕްތައް ހަދާލައި، ޑޮކްޓަރުންގެ އިރުޝާދުތަކާ އެއްގޮތަށް ދިރިއުޅުން ބައްޓަން ކުރަން،" އެނީ ވިދާޅުވި އެވެ.
ޖިލެޓާއި މޮވެމްބާ އިން ވެސް ބުނަނީ އެ މީހުން ކުރާ މަސައްކަތަކީ ކާމިޔާބު މަސައްކަތަކަށް ވާނީ ޒުވާން އުމުރުގައި އެކިއެކި ސިއްހީ މައްސަލަތަކުގައި ޒުވާން ފިރިހެނުން މަރުވާ ނިސްބަތް ދަށް ކުރެވިގެން ކަމަށެވެ.