25 މެއި 2016 - 09:57
އެމެރިކާގެ ރައީސް ބަރަކް އޮބާމާ ޖަޕާނަށް ކުރައްވާ ރަސްމީ ދަތުރުފުޅުގައި، ހީރޮޝީމާ އަށް އެމެރިކާ އިން ދިން އެޓޮމިކް ބޮމުގެ ހަމަލާ އަށް މައާފަށް އެދިވަޑައިނުގަންނަވާނެ ކަމަށް އެމަނިކުފާން ވިދާޅުވެއްޖެ އެވެ.
ޖަޕާނަށް މިއަދު ވަޑައިގެން، ބޮމުގެ ހަމަލާ އިން މަރުވި މީހުންނަށް ތައުޒިޔާ ވިދާޅުވުމުގެ ގޮތުން ހީރޮޝީމާ އަށް ޒިޔާރަތް ކުރައްވާއިރު، އެ ހަމަލާގައި ސަލާމަތްވި މީހުން އެ ހަފްލާގައި ބައިވެރިވުމަށް ހަމަޖެހިފައިވާ ކަމަށް އެމެރިކާގެ އޮފިޝަލުން ވަނީ ވިދާޅުވެފަ އެވެ. މީގެ އިތުރުން ދެވަނަ ބޮޑު ހަނގުރާމައިގެ ތެރޭގައި، ޖަޕާނުގެ ހައްޔަރުގައި ތިބި އެމެރިކާގެ ކުރީގެ ސިފައިން ވެސް އެ ހަފްލާގައި ބައިވެރިވާނެވެ އެވެ.
އެމެރިކާގެ ރައީސަކު ފުރަތަމަ ފަހަރަށް ހީރޮޝިމާ އަށް ކުރައްވާ މި ޒިޔާރަތުގައި، ބޮމުގެ ހަމަލާދިން ތަނުގައި މާބޮނޑިއެއް ބޭއްވުމަށް ހަމަޖެހިފައިވާ ކަމަށް އެމެރިކާގެ އޮފިޝަލުން ހާމަކުރައްވަ އެވެ.
އެމެރިކާ ވައިގެ ސިފައިން 1945 ގައި ދިން ދުނިޔޭގެ އެންމެ ފުރަތަމަ އެޓޮމިކް ބޮމުގެ ހަމަލާގައި 140،000 އަށް ވުރެ ގިނަ މީހުން ވަނީ މަރުވެފަ އެވެ. މީގެ އިތުރުން، ބޮމުގެ ނިއުކްލިއާ އަސަރުގެ ސަބަބުން، ހަމަލާދިންތާ އެތަކެއް އަހަރު ފަހުން ވެސް އެތައް ހާސް މީހުން ވަނީ މަރުވެފަ އެވެ.
ދެވަނަ ބޮޑު ހަނގުރާމައިގެ ފަހު ދުވަސް ކޮޅު، ހީރޮޝީމަ އަށް ދިން ހަމަލާގެ ތިން ދުވަސް ފަހުން ނަގަސާކީ އަށް ދިން ހަމަލާގައި 70،000 އަށް ވުނެ ގިނަ މީހުން މަރުވިއެވެ.
ދުނިޔޭގެ ތާރީހު ގައި ބިންވަޅު ނެގިފައިވާ އޭރުގެ އެމެރިކާގެ ރައީސް ހެރީ ޓްރޫމަންގެ ކުއްލި ނިންމުން، މިއަދާ ހަމައަށް ވެސް ޖަޕާނުގެ ގިނަ ބަޔަކު ދެކެނީ ބޮޑު ޖަރީމާއެއްގެ ގޮތުގަ އެވެ. ނަމަވެސް، އެމެރިކާ އިން ބުނަނީ އެ ދެ ހަމަލާއަކީ މަޖުބޫރީ ހާލަތުގައި، ޖަޕާނުން އެމެރިކާ އަށް ދޭން ރޭވި އެއްގަމުގެ ހަމަލާއެއް ހުއްޓުވުމަށް ދިން ހަމަލާއެއް ކަމަށެވެ.
އޮބާމާގެ މި ދަތުރުފުޅުގައި ޖަޕާނުގެ ބޮޑު ވަޒީރު ޝިންޒޯ އަބޭއާ މިއަދު ބައްދަލުކުރައްވާނެ ކަމަށް ޖަޕާނުގެ ކަމާބެހޭ އޮފިޝަލަކު ވިދާޅުވި އެވެ.