24 ޖޫން 2018 - 10:33
ރިޔާޒް (ޖޫން 24) - ހޮނިހިރު ދުވަހުގެ ރޭ މެންދަމު 12 އިން ފެށިގެން ސައުދީގައި އަންހެނުން ކާރު ދުއްވަން ފަށައިފި އެވެ.
ސައުދީގައި ޖޫން 24 ވަނަ ދުވަހުން ފެށިގެން އަންހެނުންނަށް ކާރު ދުއްވުމުގެ ހުއްދަ ދޭން ނިންމީ މިދިޔަ ސެޕްޓެމްބަރު މަހު އެވެ. މި މަހު ކުރީކޮޅުން ފެށިގެން ސައުދީގައި ވަނީ އަންހެނުންނަށް ކާރު ލައިސަންސް ދޫކުރަން ފަށައިފަ އެވެ. ސައުދީ އަކީ މީގެ ކުރިން އަންހެނުންނަށް ކާރު ނުދެއްވޭ ހަމައެކަނި ގައުމެވެ. ސައުދީގައި އަންހެނުންނަށް ކާރު ދުއްވުމުގެ ހުއްދަ ދިނުމަށް އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން މަސައްކަތް ކުރާތާ އެތައް އަހަރެއް ވެއްޖެ އެވެ. މި ބޮޑު ބަދަލު ގެނެސްފައި ވަނީ ވަލީ އަހުދު މުހައްމަދު ބިން ސަލްމާން ސައުދީ އަށް ފަހަކަށް އައިސް ގެންނަ ބަދަލުތަކުގެ ދަށުންނެވެ.
ޖޫން 5 ވަނަ ދުވަހު ވަނީ ސައުދީގައި 10 އަންހެނުންނަށް ޑްރައިވިން ލައިސަން ދޫކޮށްފަ އެވެ. އެއީ ބޭރު ގައުމުތަކުގައި އެ މީހުން ބޭނުންކުރި ލައިސަންސް ސައުދީ ލައިސަންސަށް ބަދަލު ކުރުމަށް ފަހު އެވެ.
"މިއީ ސައުދީގެ ކޮންމެ އަންހެނަކަށް ވެސް މުހިންމު ވަގުތެއް،" ކާރު ދުއްވުން ހުއްދަވުމާ އެކު ކުޑަ ވަގުތު ކޮޅެއްގައި ކާރު ދުއްވާލުމަށް ފަހު ޓީވީ ޕްރެޒެންޓަރެއް ކަމަށްވާ ސާބިކާ އަލް ދޯސަރީ ބުންޏެވެ.
މެޑިސިން ކިޔަވާ 21 އަހަރުގެ ދަރިވަރެއް ކަމަށްވާ ހަތޫން ބިން ދާކިލް ބުނީ ޑްރައިވަރަށް ކުރަން ޖެހުނު ދިގު އިންތިޒާރު މިހާރު ނިމުމަކަށް އައީ ކަމަށެވެ.
ސައުދީ ބިލިއަނަރު ޕްރިންސް ވަލީދު ބިން ތަލާލް ބުނީ މި ލިބުނީ ބޮޑު ކާމިޔާބީއެއް ކަމަށެވެ. އޭނާގެ ދަރިކަނބަލުން ރީމް ކާރު ދުއްވި އިރު ކާފަ ބޭފުޅުންނާ އެކު ފަހަތު ސީޓުގައި އިންނަވައި ވަލީދު ވަނީ ހިތްވަރު ދެއްވައިފަ އެވެ.
"އަންހެނުންނަށް ވެސް މިހާރު އެ ވަނީ މިނިވަންކަން ލިބިފައި،" ޓްވިޓާގައި ޕޯސްޓްކުރި ވީޑިއޯއެއްގައި ވަލީދު ވިދާޅުވި އެވެ.
ކޮންސަލްޓަންސީ ފާމެއް ކަމަށްވާ ޕްރައިސްވޯޓާހައުސް ކޫޕާސް އިން ބުނީ 2020 ވަނަ އަހަރާ ހަމައަށްދާ އިރު ސައުދީގައި ތިން މިލިއަން އަންހެނުން ޑްރައިވިން ލައިސަންސް ހޯދާނެ ކަމަށެވެ. ލަންޑަނުގައި ހުންނަ ކޮންސަލްޓިން ފާމެއް ކަމަށްވާ ފެކްޓްސް ގްލޯބަލް އެނާޖީ އިން ބުނީ ސައުދީގައި ހަ މިލިއަން އަންހެނުން ނުވަތަ އެ ގައުމުގެ އަންހެނުންގެ އާބާދީގެ 65 ޕަސެންޓް މީހުން ލައިސަންސަށް އެދި ހުށަހަޅާނެ ކަމަށެވެ.
ކާރުގެ އިތުރުން މޮޓޯ ސައިކަލާއި ވޭން އަދި ޓްރަކް ދުއްވުމުގެ ހުއްދަ ވެސް ސައުދީ އަންހެނުންނަށް މިހާރު ވަނީ ލިބިފަ އެވެ.