25 ޖޫން 2018 - 08:40
އަންކަރާ (ޖޫން 25) - ތުރުކީގައި އިއްޔެ ބޭއްވި ރިޔާސީ އިންތިޚާބު އެއްބުރުން ރައީސް ރަޖަބް ތައްޔިބު އުރުދުޣާން ކާމިޔާބު ކުރައްވައި ވެރިކަމުގެ ފަސް އަހަރުގެ އިތުރު ދައުރެއް ހޯއްދަވައިފި އެވެ.
ތުރުކީގެ އިލެކްޝަންސް ކޮމިޝަންގެ ވެރިޔާ ސާދީ ގުވެން ވިދާޅުވީ ސައްހަ ވޯޓުގެ ސާފު އަޣުލަބިއްޔަތު އުރުދުޣާން ހޯއްދަވާފައިވާ ކަމަށެވެ. ނަމަވެސް އިތުރު ތަފްސީލް ދެއްވައިފައެއް ނުވެ އެވެ. ތުރުކީގެ ރަސްމީ މީޑިއާ އިން ބުނެފައި ވަނީ އުރުދުޣާން ވަނީ ވޯޓުގެ 99 ޕަސެންޓް ގުނާފައިވާ އިރު އޭގެ ތެރޭން 53 ޕަސެންޓް ކާމިޔާބު ކުރައްވާފައި ކަމަށެވެ. އޭނާއާ އެންމެ ގާތުން ވާދަކުރެއްވި އިދިކޮޅު ލީޑަރު މުހައްރަމް އިންސް އަށް ލިބިވަޑައިގެންފައި ވަނީ 31 ޕަސެންޓް ވޯޓެވެ. އިންތިޚާބުގެ ފަހުގެ ނަތީޖާ އިއުލާން ކުރާނީ ހުކުރު ދުވަހު އެވެ.
އިދިކޮޅު ފަރާތްތަކުން ބުނެފައި ވަނީ ނަތީޖާ ކޮންމެ ގޮތަކަށް ދެއްކި ނަމަވެސް ޑިމޮކްރެސީ އަށް ކުރާ ހަނގުރާމަ ކުރިއަށް ގެންދާނެ ކަމަށެވެ.
އިންތިޚާބުގެ ކާމިޔާބީ އަށް ފަހު ސަޕޯޓަރުންނާ ބައްދަލު ކުރައްވާ 64 އަހަރުގެ އުރުދުޣާން ވިދާޅުވީ މިއީ ތުރުކީގެ 81 މިލިއަން ރައްޔިތުންގެ ތެރެއިން ކޮންމެ މީހަކަށް ވެސް ލިބުނު ކާމިޔާބެއް ކަމަށެވެ.
ވެރިކަމުގެ އާ ދައުރަކަށް އިންތިޚާބުވުމާ ގުޅިގެން ރައީސްކަމުގައި އުރުދުޣާން އަށް ބޮޑެތި ބާރުތަކެއް ލިބިގެންދާނެ އެވެ. މިދިޔަ އަހަރުގެ އެޕްރީލް މަހު ރައްޔިތުންގެ ފެންނަ ނުފެންނަ ވޯޓުގެ 51 ޕަސެންޓާ އެކު ގާނޫނު އަސާސީ އަށް ގެނައި އިސްލާހުތަކުން ރައީސް އަށް ލިބިދޭ ބާރުގެ ތެރޭގައި ނައިބް ރައީސް އާއި ވަޒީރުންނާއި ސަރުކާރުގެ ސީނިއާ އޮފިޝަލުންނާއި ފަނޑިޔާރުން އައްޔަން ކުރުމުގެ ބާރު ހިމެނެ އެވެ. އަދި ޕާލަމެންޓް އުވާލުމާއި ކުއްލި ނުރައްކަލުގެ ހާލަތު އިއުލާން ކުރުމުގެ ބާރު ވެސް ރައީސް އަށް ލިބޭނެ އެވެ. މީގެ އިތުރުން ބޮޑު ވަޒީރުގެ މަގާމު އުވާލާނެ އެވެ.
ތުރުކީގެ ރައީސް ކަމަށް 2014 ވަނަ އަހަރު ވަޑައިގަތުމުގެ ކުރިން އުރުދުޣާން ވަނީ އެ ގައުމުގެ ބޮޑު ވަޒީރުކަން 11 އަހަރު ކުރައްވައިފަ އެވެ. ގާނޫނު އަސާސީ އަށް ގެނައި އިސްލާހުގެ ދަށުން ތިން ވަނަ ދައުރަކަށް ވެސް އުރުދުޣާން އަށް ކުރިމަތިލެއްވޭނެ އެވެ. އެހެންވެ ދެ ވަނަ ދައުރު 2023 ގައި ހަމަވުމުން ފުރުސަތު ހޯއްދަވައި 2028 ވަނަ އަހަރާ ހަމައަށް ވެރިކަމުގައި ހުރުމުގެ ޖާގަ އުރުދުޣާން އަށް މިވަނީ ތަނަސްވެފަ އެވެ.
އުރުދުޣާން ވިދާޅުވީ ޕާލަމެންޓުގެ އަޣުލަބިއްޔަތު ވެސް އޭނާގެ އޭކޭޕީ ޕާޓީން ހޯދާފައިވާ ކަމަށެވެ. ރަސްމީ ނޫސް އެޖެންސީ އަނަދޮލޫ އިން ބުނީ އޭކޭޕީ ވަނީ ޕާލަމެންޓުގެ ވޯޓުގެ 42 ޕަސެންޓް ކާމިޔާބުކޮށްފައި ކަމަށެވެ. އަދި އެ ޕާޓީގެ ކޯލިޝަން ޕާޓްނަރު އެމްއެޗްޕީ ވަނީ 11 ޕަސެންޓް ހޯދާފައި ކަމަށް ވެސް ބުނެފައިވެ އެވެ. އިދިކޮޅު ސީއެޗްޕީ އަށް ލިބިފައި ވަނީ 23 ޕަސެންޓެވެ.
ތުރުކީގެ ރަސްމީ ޓީވީން ބުނީ 87 ޕަސެންޓް މީހުން ވޯޓުލާން ނުކުމެފައިވާ ކަމަށެވެ. ތުރުކީގައި ވޯޓުލުމުގެ ހައްގު 60 މިލިއަން މީހުންނަށް ލިބިގެންވެ އެވެ.