26 ޖޫން 2018 - 07:16
ހިތްހަމަޖެހޭ ވަރުގެ ކޮންޓެންޓެއް އެކުލެވޭ ވެބް ސީރީޒެއް ކުޅެން ލިބިއްޖެ ނަމަ، އެ ފުރުސަތުގެ ބޭނުންހިފާނެ ކަމަށް، މަޝްހޫރު ބަތަލާ ކަރީނާ ކަޕޫރް ބުނެފި އެވެ.
ބޮޑު ސްކްރީންގައި އެންމެ ވިދުން ގަދަ އެއް ބަތަލާ ބުނި ގޮތުގައި ޓީވީ ސިލްސިލާއަކުން އޭނާ ފެނުމުގެ ފުރުސަތު ވަރަށް ވެސް ކުޑަ އެވެ.
"އެކަމަކު ހިތްހަމަޖެހޭ ވަރުގެ ސްކްރިޕްޓެއް ލިބިއްޖެ ނަމަ ވެބް ސީރީޒެއްގައި މަސައްކަތްކޮށްލަން ހަމަ ތައްޔާރަށް މިހިރީ،" މި މަހު ރިލީޒްކޮށް، ބޮކްސް އޮފީހުގައި ބޮޑު ފައިދާއެއް ވެސް ނެގި "ވީރޭ ދީ ވެޑިން" ގެ ބަތަލާ ބުންޏެވެ.
ކަރީނާ ވަނީ ފިރިމީހާ ސައިފް އަލީ ހާން ވެސް ވެބް ސީރީޒެއްގައި މަސައްކަތްކޮށްފައިވާތީ އެކަމަށް ހިތްވަރު ދީ، އެކަމާ ފަހުރުވެރިވާ ކަމަށް ބުނެފަ އެވެ. އަންނަ މަހު 6 ގައި ނެޓްފްލިކްސް އިން ސްޓްރީމް ކުރަން ފަށާ "ސެކްރެޑް ގޭމްސް" އަކީ ސައިފްގެ އެކްޓިން ބޮޑު ސްކްރީނުން ބޭރުވާ ފުރަތަމަ މަަސައްކަތެވެ.
އަނޫރާގް ކެޝަޕް ޑައިރެކްޓްކޮށްފައިވާ މި ސީރީޒްގެ ޓްރެއިލާ ވެސް ވަނީ ދައްކާލައިފަ އެވެ.
"އަހަންނަށް ވަރަށް ޔަގީން އޭތި ބެލުންތެރިންނަށް ވަރަށް ކަމުދާނެކަން،" ކަރީނާ ބުންޏެވެ.
"ވީރޭ ދީ ވެޑިން" އަށް ފަހު، ކަރީނާ ސޮއިކުރި އިތުރު ފިލްމެއް އަދި އިއުލާނެއް ނުކުރެ އެވެ. އެކަމަކު ކަރަން ޖޯހަރް ޕްރޮޑިއުސްކުރާ ފިލްމެއް އޭނާ އަށް ވަނީ ހުށަހަޅައިފަ އެވެ.
އަދި ޝާހްރުކް ހާން އިންޑިއާގެ ކުރީގެ އެސްޓްރޮނޯޓް ރާކޭޝް ޝަރްމާގެ ރޯލް ކުޅޭ "ސެލިއުޓް" ގެ ބަތަލާގެ ރޯލުން ވެސް ފެނުމުގެ ފުރުސަތު ބޮޑީ ކަރީނާ ކަމަށްވެ އެވެ. ކުރިން އަޑުތައް އަރާފައިވާ ގޮތުން އެ ފިލްމްގެ ބަތަލާގެ ރޯލުން ފެންނާނީ އައިޝްވާރިޔާ ރާއީ ނުވަތަ ދީޕިކާ ޕަދްކޯނެވެ.
ޝާހްރުކާއި ކަރީނާ އެންމެ ފަހުން އެކުގައި ކުޅުނީ 2011 ގެ "ރާ.ވަން" އެވެ.