30 ޖުލައި 2016 - 07:43
އައިފޯން 7 އާ ބެހޭ ގޮތުން ދޭދޭ މީހުން ދައްކާ ވާހަކަތަކުގެ ދޮގުތެދު ކަށަވަރުވާނެ ދުވަހެއް އަންނާނެ އެވެ. އެ ވާހަކަތަކުގައި އޮއްޓަރެއް ހުރެއްޖެ ނަމަ، މިހިރީ ހައްތާ ވެސް ގަބޫލުކުރަން ހުރި ވާހަކަތަކެވެ.
އައިފޯން 7 އާ ބެހޭ ގޮތުން އެންމެ ބާރަށް ދެކެވޭ އެއް ވާހަކަ އަކީ 3.5އެމްއެމް ހެޑްފޯން ޖެކް އުވާލާނެ ވާހަކަ އެވެ. ގިނަ ލިޔުންތައް ހުންނަނީ އެއީ ތެދަކަށް ވާނޭ ބުނާ ކަހަލަ ގޮތަކަށެވެ. އެޕަލް އިން ރަސްމީކޮށް އެއްޗެއް ނުބުނި ނަމަވެސް، ޓެކްނޮލޮޖީ ޚަބަރުތައް ލިޔާ މީހުން ތިބީ އެކަން ކަށަވަރުކޮށްގެންނެވެ. މިހިރީ ހައްތާ ވެސް ސަބަބެވެ.
އެޕަލް އަށް އައިފޯން އުފައްދައިދެނީ ފޮކްސްކޮން ފެކްޓަރީންނެވެ. ފޮކްސްކޮންގެ ގޮތްޕެއް ވިއެޓްނާމްގައި ވެސް ހުރެ އެވެ. މައިގަނޑު މަސައްކަތަކީ އައިފޯނަށް ބޭނުންވާ ކޭބަލާއި ކަނެކްޓަރު އަދި އެޑްޕްޓަރު އުފެއްދުމެވެ. ހެކި މި އޮތީ އެވެ.
ވިއެޓްނާމް ވެބަސައިޓެއްގައި ހުރި ވީޑިއޯއަކުން ފެންނަ އެއްޗެއް މާނަކުރެވެނީ މިކަހަލަ ގޮތަކަށެވެ: އައިފޯން 7 ގައި 3.5އެމްއެމް ހެޑްފޯން ޕޯޓެއް ނީންނާނެ އެވެ. ހެޑްފޯން ބޭނުންކުރަން ޖެހޭނީ ލައިޓްނިން ޕޯޓަށް ޖަހައިގެންނެވެ. ހެޑްފޯންގައި 3.5އެމްއެމް ޖެކެއް ވެސް ނީންނާނެ އެވެ. އިންނާނީ ލައިޓްނިން ކަނެކްޓަރެކެވެ.
ހެޑްފޯން ޖެކް ލައިޓްނިންގް ކަނެކްޓަރަށް ބަދަލުކުރުމަކުން ކުރިން ބޭނުންކުރި ހެޑްފޯންތަކުގެ ބޭނުންކެނޑިގެން ނުދާނެ އެވެ. މުސްކުޅި ހެޑްފޯންތައް ބޭނުންކުރުމަށް އެހީތެރިވުމަށް އައިފޯން 7އާ އެކު "އެޑަޕްޓާ" ކޭބަލެއް ލިބޭނެ އެވެ. އެއްކޮޅުގައި 3.5އެމްއެމް ޕޯޓެކެވެ. އަނެއް ކޮޅުގައި ލައިޓްނިން ކަނެކްޓަރެވެ.
ވީޑިއޯއިން ފެންނަ ކޭބަލް ފޭކަކަށް ވެސް ވެދާނެ އެވެ. އެކަމަކު އައިއޯއެސް 10 ބީޓާ ގައި އެއްވެސް މައްސަލައެއް ނެތި ބޭނުންކުރެެވެ އެވެ. އެހެން ނަމަވެސް އައިއޯއެސް 9 އިން ހިންގާ ޑިވައިސްއަކަށް ގުޅައިފި ނަމަ އެއީ ނުގުޅޭ ކޭބަލެއް ކަމަށް ބުނެ "އެރާ" މެސެޖެއް އަރަ އެވެ. އައިފޯން 7 މާކެޓަށް ނެރޭނެ ކަމަށް ބެލެވެނީ އައިއޯއެސް 10 އަށް ފައްކާކޮށްފަ އެވެ.
ކޭބަލްގެ ޑިޒައިން ވެސް އެޕަލްއާ ވަރަށް ވައްތަރެވެ. ބަލާބެލުމަށް ފަރަގެއް ނެތެވެ. އެކަމަކު ކަށަވަރު ވާނީ އައިފޯން 7އާ އެކު ފޮށި ތެރެއިން ފެނުމުންނެވެ.