28 ޖޫން 2018 - 18:31
ފުލުހުން ބަލަމުން އަންނަ މައްސަލަތަކުގެ ތެރެއިން ވަކީލް މަހްފޫޒު ސައީދު ގާނޫނީ ވަކީލަކަށް އައްޔަން ކޮށްފައިވާ މައްސަލަތަކުގައި ވަކާލާތު ނުކުރެވޭ ގޮތަށް ހަދާފައި އޮތް އޮތުން ފުލުހުން މިއަދު އުވާލައިފި އެވެ.
ފުލުހުން ބަލަމުން އަންނަ މައްސަލަތަކުން މަހްފޫޒް ސަސްޕެންޑް ކުރީ މިދިޔަ މާޗް މަހުގަ އެވެ. އޭނާ ސަސްޕެންޑް ކުރީ މޯލްޑިވްސް ޕޮލިސް ސާވިސް އިން ތަހުގީގު ކުރާ އުސޫލުތަކާ ޚިލާފަށް މަހްފޫޒުގެ އަމަލުތައް ގެންގުޅޭ ކަމަށް ބުނެ އެވެ.
އޭނާގެ ސަސްޕެންޝަން ފުލުހުން މި އުވާލީ ތިން މަހަށް ވުރެ ގިނަ ދުވަސް ފަހުންނެވެ.
ރާއްޖޭގެ އެއްވެސް ކޯޓެއްގައި ވަކާލާތު ނުކުރެވޭ ގޮތަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވެސް މަހްފޫޒު މިދިޔަ އަހަރު ސަސްޕެންޑް ކުރި އެވެ. އޭނާ އެ ސަސްޕެންޝަންގައި ހުންނަތާ ގިނަ ދުވަސްތަކެއް ފަހުން ސަސްޕެންޝަން އުވާލީ މިދިޔަ ފެބްރުއަރީ މަހު އެވެ.
މަހްފޫޒް ގެންދަވަނީ ކުއްލި ނުރައްކަލުގެ ހާލަތުގައި ހައްޔަރުކޮށްފައިވާ ސިޔާސީ ބައެއް އިދިކޮޅު ބޭފުޅުންގެ ވަކީލެއްގެ ގޮތުގައި މަސައްކަތް ކުރައްވަމުންނެވެ.