02 ޖުލައި 2018 - 10:08
ރައީސް އަބްދުﷲ ޔާމީން ށ. އަތޮޅުގެ ބައެއް ރަށްތަކަށް މިއަދު ފުރާވަޑައިގެންފި އެވެ.
ރައީސް އޮފީހުން ބުނީ، އެމަނިކުފާނުގެ ދަތުރުފުޅުގައި، ށ. ބިލެތްފައްސާއި ކަނޑިތީމާއި ފުނަދޫ އަދި މިލަންދު އަށް ވަޑައިގަންނަވާނެ އެވެ.
ބިލެތްފަހީގެ ގޮނޑުދޮށް ހިމާޔަތްކުރުމުގެ މަޝްރޫއުގެ ނިމުން ފާހަގަކުރުމާއި ކަނޑިތީމު ބަނދަރު ހުޅުއްވައި ދެއްވުމުގެ އިތުރުން ފުނަދޫ އެއާޕޯޓުގެ ބިން ހިއްކުމުގެ މަސައްކަތުގެ ނިމުމާއި ރަންވޭ އެޅުމުގެ މަސައްކަތް ފެށުމުގެ ރަސްމިއްޔާތުގައި ރައީސް ޔާމީން ބައިވެރިވެވަޑައިގަންނަވާނެ އެވެ. އަދި މިލަންދު އަށް ވަޑައިގެން، އެ ރަށުގެ ނަރުދަމާ ނިޒާމްގެ ޚިދުމަތް ދިނުން ރަސްމީކޮށް ފައްޓަވައިދެއްވާނެ ކަމަށް ވެސް ރައީސް އޮފީހުން ބުންޏެވެ.
ށ. އަތޮޅަށް ކުރައްވާ ދަތުރުފުޅު ނިންމަވާލައްވައި މާލެ ވަޑައިގަތުމަށް ހަމަޖައްސާފައި ވަނީ މާދަމާ މެންދުރު ފަހުގެ ވަގުތެއްގަ އެވެ.
ދުވަސްތަކަކަށް ފަހު ބައެއް އަތޮޅުތަކަށް ރައީސް ޔާމީން ދަތުރުފުޅު ފެއްޓެވީ މިދިޔަ ހަފުތާގަ އެވެ. ފުރަތަމަ ވަޑައިގަތީ މާލެ އަތޮޅުގެ ތިން ރަށަކަށެވެ.
ސެޕްޓެމްބަރު މަހު އޮންނަ މި އަހަރުގެ ރިޔާސީ އިންތިޚާބުގައި ރައީސް ޔާމީން ދެ ވަނަ ދައުރަކަށް ހޮވުމަށް ޕީޕީއެމުން ކެމްޕޭން ފަށާފައި ވަނިކޮށް، އެމަނިކުފާނު އަތޮޅުތަކަށް ވަޑައިގަންނަވަނީ އެ ކެމްޕޭންގެ ބައެއްގެ ގޮތުގައި ކަމަށް އިދިކޮޅުން ތުހުމަތު ކުރެ އެވެ. ދައުލަތުގެ މުދަލާއި ވަސީލަތްތައް ބޭނުންކުރައްވައިގެން އެމަނިކުފާނު ކެމްޕޭން ކުރައްވަމުން ގެންދަވާ ކަމަށް ބުނެ ވަރަށް ބޮޑަށް ފާޑުކިއުން ވެސް ވަނީ އަމާޒުކޮށްފަ އެވެ. އެކަމަކު، ރައީސް އޮފީހުން ބުނިގޮތުގައި، އެއީ، ކެމްޕޭނާ އެއްވެސް ގުޅުމެއް ނެތް ރަސްމީ ދަތުރުފުޅުތަކެކެވެ.