04 ޖުލައި 2018 - 11:45
މި މަހު 1 ގެ ފަހުން ރަށްވެހިކަން ބަދަލުކުރާ މީހުންނަށް މި އަހަރުގެ ރިޔާސީ އިންތިޚާބުގައި ވޯޓުލުމުގެ ފުރުސަތު ގެއްލިދާނެތީ، ރިޔާސީ އިންތިޚާބާ ހަމައަށް ރަށްވެހިކަން ބަދަލު ނުކުރަން އިލެކްޝަންސް ކޮމިޝަނުން އިލްތިމާސްކޮށްފި އެވެ.
އެ ކޮމިޝަނުން މިގޮތަށް އެދުނީ، މާލޭގެ ރައްޔިތުންނާއި މާލޭގައި ދިރިއުޅޭ ރަށްރަށުގެ މީހުން ދަފްތަރުގައި ރަޖިސްޓްރީ ވުމަށް ހައުސިން މިނިސްޓްރީގެ ބެލުމުގެ ދަށުން މިދިޔަ ހަފުތާގައި އަލުން ފުރުސަތު ހުޅުވާލާފައިވަނިކޮށެވެ.
އިލެކްޝަންސް ކޮމިޝަނުގެ މެމްބަރު އަހްމަދު އަކްރަމް މިއަދު ވިދާޅުވީ، ސެޕްޓެމްބަރު 23 ގައި ބާއްވާ ރިޔާސީ އިންތިޚާބަށް އާއްމުކުރި ވޯޓާސް ލިސްޓަށް ހުށަހެޅި ޝަކުވާތައް ބަލައި އެ ކޮމިޝަނުން އަންނަނީ ފައިނަލް ލިސްޓު އެކުވައިލަމުން ކަމަށެވެ. އެހެން ކަމުން، މި މަހުގެ އެކަކުން ފެށިގެން ރަށްވެހިކަން ބަދަލުކުރާ މީހުންނަށް ވޯޓު ލުމުގެ ފުރުސަތު ގެއްލިދާނެ ކަމަށް އޭނާ ވިދާޅުވި އެވެ.
މީގެ 31 އަހަރު ކުރިއްސުރެ މާލޭގެ މީހުންނަށް ހުޅުވައިލާފައި އޮންނަ "ހާއްސަ ދަފުތަރު"ގައި މިހާތަނަށް 3،264 މީހުން ރަޖިސްޓަރީ ވެފައިވާއިރު ރަށްރަށުގެ މީހުން މާލެ އަށް ބަދަލުވުމަށް 12،000 އަށް ވުރެ ގިނަ މީހުން ރަޖިސްޓަރީ ވެފައިވެ އެވެ.
ދަފްތަރު ބެލެހެއްޓި މާލޭ ސިޓީ ކައުންސިލުން ލަފާކުރާ ގޮތުގައި، ދަފުތަރުގެ އާ ލިސްޓެއް ހަދާނަމަ، އެ 15،000 މީހުންގެ ވެސް ދަފުތަރު ނަމްބަރު ބަދަލުވާނެ ކަމަށާއި އޭރުން ވޯޓުލާ މީހުންގެ ލިސްޓުގައި އެ މީހުންގެ ނަން ނޯންނާނެ ކަމަށެވެ. އިންތިޚާބުގައި ވޯޓުލާ މީހުންގެ ލިސްޓަށް ހުށަހެޅި ޝަކުވާތައް އިސްލާހުކޮށް، މިހާރު ވަނީ އާއްމުކޮށްފަ އެވެ.
މާލޭގެ ދަފްތަރުގައި ޖައްސާފައިވާ މީހުންނަށް ބޯހިޔާވަހިކަން ދޭނެ ކަމަށް ރައީސް އަބްދުﷲ ޔާމީން ވައުދުވެ ވަޑައިގެންފައިވާއިރު، ހިޔާ މަޝްރޫއުގެ ދަށުން ވެސް، އެ މީހުންނަށް 1،044 ފްލެޓް ދޭން ވަނީ ނިންމާފަ އެވެ.