06 ޖުލައި 2018 - 13:32
މާލެ އިން ފުރައިގެން އައްޑުއަށާއި ލ. މާމެންދު އަށް ދަތުރުކުރަމުން ދިޔަ ދެ ދޯންޏެއް މ. އަތޮޅުގެ ފަރަކަށް އެރުމާ ގުޅިގެން ދެ ދޯނި ފުން ކުރުމުގެ މަސައްކަތް މިއަދު ފަށައިފި އެވެ.
އެމްއެންޑީއެފުން ބުނީ އައްޑޫ އަށް ދަތުރު ކުރި "ލިޓަސް ކެރިއަ" ނަމަކަށް ކިޔާ ދޯނި މ. އަތޮޅު ތުވަރުގެ ދެކުނު ފަރާތުގެ ފަރަކަށް އެރި ކަމުގެ ރިޕޯޓު ލިބުނީ ރޭ ފަތިހު ހަތަރެއް ޖަހަނިކޮށް ކަމަށެވެ. ހަތަރު ކޮންޓެއިނަރު އަރުވައިގެން ދަތުރު ކުރި ދޯނީގައި ހަ ދިވެހިންނާއި ހަތަރު ބިދޭސީން ތިބި ކަމަށް އެމްއެންޑީއެފުން ބުންޏެވެ. މި ހާދިސާގައި އެއްވެސް މީހަކަށް އަނިޔާއެެއް ލިބިފައެއް ނުވެ އެވެ.
ގާތްގަނޑަކަށް 110 ފޫޓުގެ މުދާ އުފުލާ މި ދޯންޏަށް އެހީތެރިވުމަށް ދޯނީގެ ވެރިފަރާތުން އެ ސަރަހައްދަށް ފޮނުވި ދެ އުޅަނދެއްގެ އެހީގައި ދޯނި ފުން ކުރުމުގެ މަސައްކަތް ކުރަމުން އަންނަ ކަމަށްވެ އެވެ.
އެމްއެންޑީއެފުން ބުނި ގޮތުގައި ވިލިމާލެ އިން ފުރައިގެން ލ. މާމެންދޫ އަށް ދަތުރު ކުރަމުން ދިޔަ "ފްރެޝް 6" ނަމަކަށް ކިޔާ ދޯނި އެރީ މ. މުލަކުގެ ހުޅަނގުން އަށް މޭލު ދުރުގައި އޮތް ފަރަކަށެވެ. މިއަދު ހެނދުނު ހައެއް ޖަހާކަން ހާއިރު ހިނގި ހާދިސާގައި ފަރަށް އެރި ދޯނިން ދިވެއްސަކާއި ދެ ބިދޭސީން ދަތުރު ކުރި ކަމަށާއި 60 ފޫޓުގެ މި ދޯނީގައި ހުރީ ހިލަ އާއި ހިލަވެރި ކަމަށް އެމްއެންޑީީއެފުން ބުންޏެވެ.
ދޯނި ފަރަށް އެރުމާ ގުޅިގެން އެހީތެރިވުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.