18 ޖުލައި 2018 - 10:13
އިދިކޮޅު ރިޔާސީ ކެންޑިޑޭޓު، އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް (އިބޫ) އަމިއްލަ ދަތުރެއްގައި އިނގިރޭސިވިލާތަށް މިއަދު ފުރާވަޑައިގެންފި އެވެ.
މިއީ، އެމްޑީޕީގެ އިތުރުން، ޖުމްހޫރީ ޕާޓީ އާއި އަދާލަތު ޕާޓީ އަދި ކުރީގެ ރައީސް މައުމޫން އަބްދުލްގައްޔޫމްގެ ސަޕޯޓަރުން ހިމެނޭ އިއްތިހާދުގެ ރިޔާސީ ކެންޑިޑޭޓަކަށް އިބޫ ހަމަޖެއްސި ފަހުން ރާއްޖެ އިން ބޭރަށް ވަޑައިގަންނަވާ ފުރަތަމަ ފަހަރެވެ.
އެމްޑީޕީގެ ކެމްޕޭން ޓީމުން ބުނިގޮތުގައި، އިބޫ ފުރާވަޑައިގަތީ ދަރިފުޅުގެ ގްރެޖުއޭޝަންގައި ބައިވެރިވެވަޑައިގަތުމަށެވެ. އޭނާ އެނބުރި ވަޑައިގަންނަވާނީ އަންނަ ހަފުތާގަ އެވެ.
އިދިކޮޅު ޕާޓީތަކުން ރަށްތަކުގައި ކުރާ ކެމްޕޭން ދަތުރުތައް އިބޫ ވަޑައިގަތުމާ އެކު ފަށާނެ ކަމަށް ވެސް އެމްޑީޕީން ބުންޏެވެ.
ރިޔާސީ ކެންޑިޑޭޓަކަށް އިބޫ ހަމަޖެއްސެވުމާ އެކު އައްޑު އާއި ފުވައްމުލަކަށް ވަޑައިގެން ވަނީ ދޮރުން ދޮރަށް ހިންގަވައި ރައްޔިތުންނާ ބައްދަލު ކުރައްވައިފަ އެވެ. އެ ކެމްޕޭންގައި، ރަނިން މޭޓު، ކާށިދޫ ދާއިރާގެ ޖުމްހޫރީ ޕާޓީގެ މެމްބަރު ފައިސަލް ނަސީމް ވެސް ބައިވެރިވެވަޑައިގަތެވެ.
އިބޫ ވިދާޅުވަމުން އަންނަނީ، ސެޕްޓެމްބަރު 23، ގައި އޮންނަ އިންތިޚާބުގައި ރައީސް އަބްދުﷲ ޔާމީން ބަލިކޮށް، އިދިކޮޅު ޕާޓީތަކުން ކާމިޔާބީ ހޯދާނެ ކަމަށެވެ. އެއާއެކު ރާއްޖޭގައި ގާއިމްވެގެން އަންނާނީ، ރައްޔިތުން އެދޭ ފަދަ ވެރިކަމެއް ކަމެއް ކަމަށާއި އެ ވެރިކަމުގައި، ގާނޫނުއަސާސީގައިވާ ހައްގުތަކާއި އިންސާނީ ހައްގުތައް ވެސް ރައްޔިތުންނަށް ކަށަވަރުވާނެ ކަމުގެ ޔަގީންކަން އިބޫ ދެއްވަ އެވެ.