26 ޖުލައި 2018 - 13:49
"ރީތިކަން" ގެ ނަމުގައި މީގެ ކުރިން ވެސް ވަރަށް ހިތްގައިމު ވީޑިއޯ ލަވައެއް ބެލުންތެރިންނަށް ގެނެސް ދިން މަޝްހޫރު ސޯލޯ އާޓިސްޓް މޫޝަން (މުއްމު) މުބާރިކްގެ ދެވަނަ ވީޑިއޯ ލަވަ "އިހުސާސް" ވެސް ބެލުންތެރިންނަށް ދައްކާލައިފި އެވެ.
މި ލަވަ އާންމުކޮށްފައި މި ވަނީ މޫޝަންގެ ނަން ދީގެން މިދިޔަ އަހަރުގެ އޮކްޓޯބަރު 13 ގައި ނެރުނު އޭނާގެ ފުރަތަމަ ސޯލޯ އަލްބަމް ނެރުނު ރޭ ލަވަ "އިހުސާސް" ގެ ވީޑިއޯ ގެނެސް ދޭނެކަން އިއުލާން ކުރުމަށް ފަހު އެވެ.
މުޅި ލަވަ މިނިވަން ދުވަހުގެ ހާއްސަ ހަދިޔާއެއްގެ ގޮތުގައި ނެރުނީ ރޭ 12:00 ގަ އެވެ.
"އިހުސާސް" ލަވައިގެ ވީޑިއޯއަކީ އެ ލަވައިގެ އަސްލު ލަވައާ ހިލާފަށް މީގެ ރިމިކްސް ވާޝަނަށް ތައްޔާރުކޮށްފައިވާ ވީޑިއޯއެކެވެ. މި ފަހަރު ވެސް ލަވައިގެ ވީޑިއޯގެ މަސައްކަތުގައި އޮތީ "ރީތިކަން" ޗާލުކޮށް ދިން ޗޮޕްއާޓެވެ.
ލޯބީގެ ވާހަކައެއްގެ ގޮތުގައި ގެނެސް ދީފައިވާ ލަވައިން ފެނިގެން ދަނީ މޫޝަންއާ އެކު މަޝްހޫރު ބަތަލާ މަރިޔަމް އައްޒަ އާއި އަލަށް ވީޑިއޯ ލަވައެއް ކުޅުނު މޮޑެލް އައްޔަ އެވެ. ޗޮޕްއާޓުން ލަވައަށް ގެނެސްފައިވާ ގްލެމަރަސްކަމާ އެކު، ލަވައިގެ އިހުސާސްތަކާއި ލަވައިގެ ފުރިހަމަކަން ފެނިގެން ދެ އެވެ.
ތަފާތު އަދި ފެންވަރު ރަނގަޅު ވީޑިއޯ ލަވައެއް ބަލައިލަން ހިތް އެދޭ ނަމަ މޫޝަންގެ "އިހުސާސް" އަކީ ނުބަލައި ދޫކޮށްލާ ވަރުގެ ލަވައެއް ނޫނެވެ. ވަކިން ހާއްސަކޮށް މި ލަވައިން އައްޒަ ފެނިގެންދާ ގޮތް ތަޖުރިބާކޮށްލަން ވާނެ އެވެ.
ލަވައަށް މި ފަހަރު ފާޑު ކިޔަން ވާނީ އައްޒަގެ ލުކްސްއާ ބެހޭ ގޮތުން ވެސް ބަހުސެއްކޮށްލަމުންނެވެ.