03 އޯގަސްޓް 2016 - 10:25
ރިއޯ ޑި ޖެނީރޯ، ބްރެޒިލް (އޮގަސްޓް 3) - އަންނަ ހުކުރު ދުވަހު ބްރެޒިލްގައި ފަށާ އޮލިމްޕިކްސްގައި ފިރިހެން ޓެނިހުގެ ގަދަ 10 ކުޅުންތެރިންގެ ތެރެއިން ފަސް ކުޅުންތެރިއަކު ނުފެންނާނެ އެވެ.
މި ފަހަރުގެ އޮލިމްޕިކްސްގައި ސްވިޒަލެންޑުގެ ދެ ކުޅުންތެރިން ކަމަށްވާ ރޮޖާ ފެޑެރާ އާއި ސްޓެން ވަވަރިންކާ އަށް ފުރުސަތު ގެއްލުނީ އަނިޔާގެ ސަބަބުންނެވެ. އަދި ޒިކާ ވައިރަހުގެ ބިރުގެ ސަބަބުން މިލޮސް ރައޮނިޗާއި ތޯމަސް ބާޑިޗް އަދި ޑޮމިނިކް ތިއެމް ވެސް ވަނީ އޮލިމްޕިކްސް ބައިވެރިނުވަން ނިންމައިފަ އެވެ.
މި ފަސް ކުޅުންތެރިންނަށް ނުކުޅެވުނު ނަމަވެސް ސްޕެއިނުގެ ރަފައެލް ނަޑާލް ވަނީ އަނިޔާ އިން ރަނގަޅުވެ އޮލިމްޕިކްސްގައި ބައިވެރިވާނެ ކަމަށް ބުނެފަ އެވެ. މިދިޔަ މޭ މަހު އޮތް ފްރެންޗް އޯޕަން އަށް ފަހު، އަނިޔާގެ ސަބަބުން ނަޑާލް ހުރީ ކުޅުމާ ދުރު އެވެ. އެކަމު ނަޑާލް ދާދި ފަހުން ބުނީ އަނިޔާ އިން އެއްކޮށް ރަނގަޅު ވެފައިވާ ކަމަށާއި އޮލިމްޕިކްސްގެ ސިންގަލްސް، ޑަބަލްސް އަދި މިކްސް ޑަބަލްސް އިވެންޓުގައި ވާދަކުރާނެ ކަމަށެވެ.
ލަންޑަންގައި 2012 ވަނަ އަހަރު އޮތް އޮލިމްޕިކްސްގައި ރިހި މެޑަލް ހޯދި ފެޑެރާ އަށް މި ފަހަރުގެ އޮލިމްޕިކްސްގައި ކުޅުމުގެ ފުރުސަތު ގެއްލުނީ ކަކުލަށް ލިބުނު އަނިޔާ އަކާ ގުޅިގެންނެވެ.
މަޝްހޫރު ޓެނިސް ކުޅުންތެރިއާ އެންޑީ މަރޭ ބުނީ މުހިއްމު ކުޅުންތެރިންނަށް މި ފަހަރު އޮލިމްޕިކްސްގައި ނުކުޅެވުމަކީ ލިބޭ ވަރަށް ބޮޑު އުނިކަމެއް ކަމަށެވެ.
"އޮލިމްޕިކްސްއެއް ވިޔަސް ކޮންމެ މުބާރާތެއް ވިޔަސް އެންމެ ހުނަރުވެރި ތަރިންނަށް ކުޅެވެން ޖެހޭނެ. އެ ކުޅުންތެރިން ނެތި ކުޅުމަކީ މުބާރާތުގެ ވާދަވެރިކަން ދަށްވުމުގެ އިތުރުން ލިބޭ ވަރަށް ބޮޑު އުނިކަމެއް،" އެންމެ ފަހުން ފިރިހެން ސިންގަލްސްގެ ރަން މެޑަލް ހޯދި މަރޭ ބުންޏެވެ.
އަންހެން ކުޅުންތެރިންނަށް ބަލާއިރު، މަނާ ބޭހަށް ޕޮޒިޓިވް ވުމުގެ ސަބަބުން ސަސްޕެންޑްކޮށްފައިވާ މާރިއާ ޝަރަޕޯވާ އަށް މި ފަހަރުގެ އޮލިމްޕިކްސްގައި ނުކުޅެވޭއިރު، ބަލިވެ އިނުމުގެ ސަބަބުން ބެލަރޫސްގެ ވިކްޓޯރިއާ އަޒަރެންކާ ވެސް ނުފެންނާނެ އެވެ.