15 އޯގަސްޓް 2018 - 07:52
ފުރިހަމަ ނިންޖަކީ ފައިދާހުރި ކާނާ އާއި ކަސްރަތާ އެއްވަރަށް އިންސާނާގެ ހަށިގަނޑަށް ބޭނުންތެރި ކަމެކެވެ. އާންމުކޮށް އިންސާނެއްގެ ހަޔާތުގެ 30 ޕަސެންޓް ހޭދަކުރަނީ ނިދުމުގައެވެ. އެކަމަކު ފުރިހަމަ ނިންޖެއް ނުލިބި، ސިއްހަތަށް ބޮޑެތި ގެއްލުންވެ ނުރައްކާތެރި ބަލިތަކާ ހަނގުރާމަކުރަންޖެހޭ މީހުން ދަނީ އިތުރުވަމުންނެވެ. ނިދި ހަމަނުވުމަކީ ބަލިބައްޔަށް މަގުފަހިކުރުވާ ކަމެކެވެ. ހަމަ އެފަދައިން ހަމަ ނިދި ލިބޭނަމަ މީހާ ހުންނާނީ އާ ދުވަހެއްގެ މަސައްކަތަށް މުޅިން ތައްޔާރުވެފައެވެ.
ނިދި ހަމަނުވުމުގެ ސަބަބުތައް ބައިވަރެވެ. އޭގެ ތެރޭގައި ކޮޓަރިތެރޭގެ ފިނިހޫނުމިން، ނިންޖަށް އެކަށީގެންވާ މިންވަރެއްގައި ނެތުން ހިމެނެއެވެ. މިކަމަށް ހައްލެއް ހޯދުމަށްޓަކައި ތަފާތު އެކި ނަންނަމުގައި އުފައްދާފައިވާ ސެންސަރުތަކާއި ގޮދަޑިތައް ބާޒާރުގައި އެބަހުއްޓެވެ. ނަމަވެސް މިއީ މިކަމަށް އެންމެ އެކަށީގެންވާ ހައްލުކަމަކަށް މިހާތަނަށް ފާހަގަވެފައެއް ނެތެވެ. ފަހަރެއްގައި ރޭގަނޑުގެ ނިދީގެ އެކި ވަގުތުތަކަށް އެކަށީގެންވާ ގޮތަށް ގޮދަޑިއަށް ފިނިކޮށްދޭ، ނުވަތަ ހޫނުކޮށްދޭ އާލާތަކުން ރަގަޅު ނަތީޖާއެއް ލިބިދާނެއެވެ. ބެޑްޖެޓަކީ 2014 ވަނަ އަހަރު އުފެއްދި، ފިނިހޫނުމިނާ ކުޅެލާ އާލާތެކެވެ. މީގެ މެޝިނު، އެނދު ތަންދޮށުގައި ބަހައްޓައިގެން ރަޖައަށް ފޮނުވާލާ ވައިގެ ޒަރީއާއިން ހަށިގަނޑުގެ ފިނިހޫނުމިން ބަދަލުކުރުވައެވެ.
ދިގުއަކަ ބައްޓަމަށް ފޮށިގަނޑެއްހެން ހުންނަ މި މެޝިނަށް މިހާރު ވަނީ ބޮޑެތި ބަދަލުތަކެއް އައިސްފައެވެ. މީގެ ފުރަތަމަ ބާވަތަށް ފަހު ގިނަ ބައެއްގެ ޚިޔާލާ އެއްގޮތަށް ބަދަލުތައް ގެނެސްގެން އުފެއްދި ދެވަނަ ވާޝަންއަށް ފަހު މިހާރު ނުކުންނަށް ތައްޔާރުވަމުންދަނީ މީގެ ތިން ވަނަ ބާވަތުގެ ބެޑްޖެޓެވެ. ބެޑްޖެޓް3 ވެސް ފަރުމާކޮށްފައިވަނީ އެނދުތަންދޮށުގައި ނުވަތަ އެނދު ކައިރިން ފައިގަ އަޅައިގަނެ ނުވެއްޓޭ ހިސާބުގައި ބަހައްޓައިގެން އެނދުގައި އަޅާ ޚާއްސަ ބާވަތެއްގެ ރަޖައަކަށް ވައި ފޮނުވާލާ ގޮތަށެވެ. މިފަހަރުގެ ވާޝަން ނުކުތީ އެނދުގެ ދެފަޅީގެ ފިނިހޫނުމިން ވަކިކުރެވޭ ގޮތަށެވެ. ބޭނުން ނަމަ އެއް ފަޅި ފިނިކޮށްލަންވީއެވެ. އަދި އަނެއް ފަޅި ހޫނުކުރެވިދާނެއެވެ. ނަމަވެސް މިކަން އެންމެ ރަގަޅަށް ކުރެވޭނީ ބެޑްޖެޓް3އާ އެކު ވިއްކާ ރަޖާ ހޯދައިގެންނެވެ. އެއާ ކޮމްފޮޓް ކްލައުޑް ޝީޓްގެ ނަމުން ނަންދީފައިވާ މި ރަޖާ އުފައްދާފައިވަނީ މެދުން ޖަހާފައިވާ ފަތީގެ ސަބަބުން ރަޖައަށް ދޫކުރާ ވައި، ވަކި ކުރެވޭ ގޮތަށެވެ. މިކަމަށް ބެޑްޖެޓްގެ ދެ ސިސްޓަމް ބޭނުންވާނެއެވެ. އެނދުގެ ދެފަޅީގައި ދެ ސިސްޓަމް ބަހައްޓައިގެން އެ މީހަކު އިޚުތިޔާރުކުރާ ފިނިހޫނުމިނެއްގައި އެމީހެއްގެ ފަޅިއަށް ވައި ދޫކުރަންވީއެވެ. މިކަމަށްޓަކައި ކުލަ ރިމޯޓަކާއި އެމޭޒަން އެލެކްސާގެ އެހީތެރިކަން ހޯދޭނެއެވެ. އަދި ސްމާޓްފޯން އެޕަކުންވެސް ބޭނުންވާ ފިނިހޫނުމިނަށް އެދެވޭނެއެވެ.
ބެޑްޖެޓް އުފެއްދި ކުންފުނިން ދެކޭ ގޮތުގައި މިއީ ކައިވެނިތައް ސަލާމަތްކޮށްދޭން އެހީތެރިވެދޭނެ އާލާތެކެވެ. ކޮޓަރީގެ ފިނިހޫނުމިނާ މެދު ޚިލާފު އުފެދުމުގެ ފުރުސަތު ބަންދުކޮށްދޭނެވެސްމެއެވެ. އަދި ރޭގަނޑުގެ އަރާމު ނިދި، ފުރިހަމައަށް ހޯދޭނެއެވެ. މިފަހަރުގެ އާ ފަރުމާއާއެކު ބެޑްޖެޓް3 އުފައްދާފައިވަނީ ގަޑިއަކުން ގަޑިއަކުން ފިނިހޫނުމިން ބަދަލުވާ ގޮތަށެވެ. އެމީހެއްގެ އުމުރާ، ޖިންސާ، ހެދިހުރި ހަށިގަނޑަށް ރިއާޔަތްކޮށްގެންނެވެ.