16 އޯގަސްޓް 2018 - 07:30
މެންޗެސްޓާ (އޮގަސްޓް 16) – މެންޗެސްޓާ ސިޓީގެ މެދުތެރޭގެ މައި އިންޖީނު ކެވިން ޑި ބްރޭނާގެ ކަކުލަށް އަނިޔާވެ ގިނަ ދުވަސްތަކަކަށް ކުޅުމާ ދުރަށް ދާން ޖެހިދާނެކަމުގެ ބިރު ހީވެއްޖެ އެވެ.
އުމުރުން 27 އަހަރުގެ ކުޅުންތެރިޔާގެ ކަނާތު ކަކުލަށް އަނިޔާވީ ޕްރެކްޓިހުގަ އެވެ. ސިޓީން ބުނީ އަނިޔާގެ ތަފްސީލް ބެލުމަށް ޓެސްޓްތައް ހަދަމުން އަންނަ ކަމަށާއި އޭނާ ކުޅުމާ ދުރުގައި ހުންނަން ޖެހޭނެ މުއްދަތެއް އަދި ނޭގޭ ކަމަށެވެ.
އެކަމަކު ރިޕޯޓްތައް ބުނާ ގޮތުގައި އޭނާ ދެ މަހެއްހާ ދުވަހަށް ކުޅުމާ ދުރުގައި ހުންނަން ޖެހޭނެ އެވެ. މާނައަކީ މަދުވެގެން 10 ވަރަކަށް މެޗު ގެއްލުމެވެ. ކަނާތު ކަކުލަށް 2016 ގައި އަނިޔާވެ 12 މެޗު އޭނާ އަށް ގެއްލިފައިވެ އެވެ.
ސިޓީން މިދިޔަ ސީޒަނުގެ ޕްރިމިއާ ލީގާއި ލީގު ކަޕް ކާމިޔާބުކުރިއިރު އޭނާ ވަނީ 12 ގޯލް ޖަހައި 21 ލަނޑު ޖަހަން މަގުފަހިކޮށްދީފަ އެވެ. އޭނާ އަކީ މިދިޔަ ސީޒަނުގައި ސިޓީން ހޮވި އެންމެ މޮޅު ކުޅުންތެރިޔާ ވެސް މެ އެވެ.
ވޯލްޑް ކަޕަށް ފަހު ތިން ހަފުތާގެ ޗުއްޓީއެއްގައި ހުރުމުން އޭނާ އަށް ކޮމިއުނިޓީ ޝީލްޑުގައި ޗެލްސީ އަތުން ސިޓީ މޮޅުވި މެޗުގައި ނުކުޅެ އެވެ. އެކަމަކު ޕްރިމިއާ ލީގުގެ ފުރަތަމަ މެޗުގައި އާދީއްތަ ދުވަހު އާސެނަލް އަތުން 2-0 އިން މޮޅުވި މެޗުގެ ދެ ވަނަ ހާފުގައި ކުޅުނެވެ.