05 އޯގަސްޓް 2016 - 09:52
މޮސްކޯ، ރަޝިއާ (އޮގަސްޓް 5) - މިއަދު ބްރެޒިލްގައި ފަށާ އޮލިމްޕިކްސްގައި ބައިވެރިވާ ރަޝިއާގެ ކޮންޓިންޖެންޓަކީ ފާއިތުވި 104 އަހަރުތެރޭ އޮލިމްޕިކްސްގައި ރަޝިއާ އިން ވާދަކުރާ އެންމެ ކުޑަ ކޮންޓިންޖެންޓެވެ.
މީގެ ކުރިން ރަޝިއާގެ އެންމެ ކުޑަ ކޮންޓިންޖެންޓެއް އޮލިމްޕިކްސް އަށް އައީ 1912 ވަނަ އަހަރު އެވެ. ރަޝިއަން އެމްޕަޔާގެ ނަމުގައި ވާދަކުރި ކޮންޓިންޖެންޓުގައި ހިމެނުނީ 159 އެތުލީޓުންނެވެ.
ވޯލްޑް އެންޓި ޑޯޕިން އެޖެންސީ (ވާޑާ) އިން ރަޝިއާގެ އެތުލީޓުން މަނާބޭހަށް މަކަރުހަދާ ކަމަށް ބުނެ އާންމުކުރި ރިޕޯޓްގެ ސަބަބުން ރަޝިއާ އިން ނަން ހުށަހެޅި 389 އެތުލީޓުންގެ ތެރެއިން 118 އެތުލީޓުން ވަނީ ސަސްޕެންޑް ކޮށްފަ އެވެ. އެހެންކަމުން މި ފަހަރު އޮލިމްޕިކްސް އިން ފެންނާނީ 271 ރަޝިއާގެ އެތުލީޓުންނެވެ.
ރަޝިއާ އިން ވަނީ ސަސްޕެންޑް ކޮށްފައިވާ އެ ގައުމުގެ އެތުލީޓުންނަށް އޮލިމްޕިކްސްގައި ވާދަކުރޭ ގޮތް ހެދުމަށް ގިނަ މަސައްކަތްތަކެއް ކޮށްފަ އެވެ. އެގޮތުން ތިން ފަހަރެއްގެ މަތިން ކޯޓް ފޯ އާބިޓްރޭޝަން އޮފް ސްޕޯޓްސް އަސް ހުށަހަޅައިގެން ކުރިއަށް ގެންދަން މަސައްކަތްކުރި ނަމަވެސް އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން އެ ފުރުސަތެއް ނުދިނެވެ.
ރަޝިއާ އޮލިމްޕިކް ކޮމިޓީގެ ރައީސް އަލެކްސެންޑަ ޒުކޯވް ވިދާޅުވީ މި ފަހަރުގެ ގޭމްސްގައި އެ ގައުމުގެ ގިނަ އެތުލީޓުންނަށް ބައިވެރިނުވެވުނު ނަމަވެސް އުއްމީދުކުރަނީ ގިނަ މެޑަލްތަކާ އެކު ގޭމްސް ނިންމާލެވޭނެ ކަމަށެވެ.
ރަޝިއާގެ ގިނަ އެތުލީޓުން މަނާބޭހަށް ކުރާ ޓެސްޓްތަކަށް ފާއިތުވި އަހަރުތަކުގައި މަކަރު ހަދާފައިވާކަން ޔަގީންވުމުން ވާޑާ އިން ވަނީ މި ފަހަރުގެ އޮލިމްޕިކްސް އިން ރަޝިއާގެ ހުރިހާ އެތުލީޓުން ސަސްޕެންޑް ކުރުމަށް އައިއޯސީ އަށް ލަފާދީފަ އެވެ. ނަމަވެސް އައިއޯސީން ނިންމީ ހަމައެކަނި މަނާބޭހަށް ޕޮޒިޓިވްވެފައިވާ އެތުލީޓުން ސަސްޕެންޑް ކުރުމަށެވެ.
އައިއޯސީން ވަނީ ވަކިވަކި ކުޅިވަރު ފެޑެރޭޝަންތަކުން ބޭނުންނަމަ ރަޝިއާ ސަސްޕެންޑް ކުރުމުގެ އިހުތިޔާރު ދީފަ އެވެ.
މިއަދު ފަށާ އޮލިމްޕިކްސް މި މަހުގެ 21 ވަނަ ދުވަހާ ހަމައަށް ކުރިއަށްދާނެ އެވެ.