28 އޯގަސްޓް 2018 - 07:32
ކާށިތެލަކީ ކެއްކުމަށާއި އެ ނޫން ވެސް ބޭނުންތަކަށް އަހަރެމެން އަބަދުވެސް ބޭނުންކުރާ އެއްޗެކެވެ. އެކަމަކު ރާއްޖޭގައި ކާށި ތެލުގެ ބޭނުންކުރުން މަދުވެފައި ވިޔަސް ބައެއް ގައުމުތަކުގައި މީގެ ޑިމާންޑް އަންނަނީ ބޮޑުވަމުންނެވެ. މިއީ ސިއްހީ ގޮތުން ރަނގަޅު އެއްޗެއް ކަމަށް ދެކިގެން މީގެ ބޭނުންކުރި ކަމުގައި ވިޔަސް ސިއްހީ ގޮތުން ބަހުސް ވަނީ ބޮޑެވެ.
ކާށިތެލަކީ ސިއްހީ ފައިދާތައް ގިނަ ތެލެއް ކަމަށް ގަބޫލު ކުރެވުނަސް، މިއީ ބޭނުން ކުރުމުގައި ދެވަނަ ވިސްނުމަކަށް ދާން ޖެހޭ އެއްޗެއް ކަމަށް ތަޖުރިބާކާރުން މިހާރު އެބަ ބުނެ އެވެ.
ހާވަޑް ޔުނިވަސިޓީގެ ޕްރޮފެސަރެއް ކަމަށްވާ ޑރ. ކެރިން މިޝެލް ވަނީ ކާށިތެލަކީ "ޒަހަރެއް" ގެ ގޮތުގައި ސިފަ ކުރައްވައިފަ އެވެ. އޭނާ ވިދާޅުވި ގޮތުގައި ކާށިތެލަކީ ހީކުރާހާ ފައިދާ ހުރި އެއްޗެއް ނޫނެވެ.
ޖަރުމަންގެ ފްރެއިބާގް ޔުނިވަސިޓީގައި "ކޮކޮނަޓް އޮއިލް އެންޑް އަދަ ނިއުޓްރިނަޝަނަލް އެރާޒް" ގެ ނަމުގައި އޭނާ ދިން ތަގުރީރެއްގައި ވިދާޅުވީ ކާށިތެލަކީ ބޭނުން ކުރުމުގައި ދެވަނަ ވިސްނުމަކަށް ދާން ޖެހޭ އެއްޗެއް ކަމަށެވެ.
ކެރިން ވިދާޅުވި ގޮތުގައި ކާށިތެލަކީ ރަނގަޅު އެއްޗެއް ނޫނެވެ. އޭނާ ފާހަގަ ކުރެއްވި ގޮތުގައި ކާށިތެލަކީ 80 ޕަސެންޓް ފެޓް އެކުލެވޭ އެއްޗެކެވެ. އެހެންވެ ކާށިތެޔޮ ބޭނުންކުރާ ނަމަ، ފަލަވުން ފަދަ ސިއްހީ މައްސަލަތަކާ ކުރިމަތިވާނެ ކަމަށް ވިދާޅުވި އެވެ. އެހެންވެ ބޭޑް ކޮލެސްޓްރޯލާ ދޭތެރޭ ސަމާލުވާން ބޭނުން ނަމަ ކާށިތެލަށް ނޫނެކޭ ބުނަން ޖެހޭ ކަމަށް ކެރިން ވިދާޅުވި އެވެ.
ސެޗުރޭޓެޑް ފެޓީ އެސިޑް އެކުލެވޭ ބާވަތްތައް ބޭނުންކުރުމުގައި ސަމާލުވުމަށް އެމެރިކަން ހާޓް އެސޯސިއޭޝަން (އޭއެޗްއޭ) އިން ދީފައިވާ ލަފަ އަށް އިޝާރާތް ކުރައްވައި، ކެރިން ވިދާޅުވީ ކާށިތެލަކީ ސެޗުރޭޓެޑް ފެޓީ އެސިޑް މަތީ މިންވަރަކަށް އެކުލެވޭ އެއްޗެއް ކަމަށެވެ.
އެހެންވެ ހިތުގެ ބަލިތަކުން ރައްކާތެރިވުމަށް އެފަދަ މާއްދާތައް އެކުލެވޭ ބާވަތްތަކުން ދުރުވާން ޖެހޭ ކަމަށް ވިދާޅުވި އެވެ.
"ކާށި ތެލުން ލިބޭ ސިއްހީ ފައިދާތަކަށް ބާރު ލިއްބައިދޭ ދިރާސާތަކެއް މިހާތަނަށް އެދެވޭ ފެންވަރެއްގައި ކުރެވިފައެއް ނެތް،" ބްރިޓިޝް ނިއުޓްރިޝަން ފައުންޑޭޝަނުން ބުނެފައިވެ އެވެ. "އެހެންވެ އެބަ ޖެހޭ އިތުރު ހޯދުންތަކެއް ވެސް ހޯދަން."
ކާށިތެލަކީ އަލްޒެއިމާ ބައްޔަށް ވެސް ފަރުވާއެއް ކަމަށް މީގެ ކުރިން ހަދާފައިވާ ދިރާސާއެއްގައި ބުންޏެވެ. އެކަމަކު ސިއްހީ ތަޖުރިބާކާރުން މިހާރު ބުނަނީ އެކަމާ ބެހޭ ގޮތުން އިތުރަށް ދިރާސާތަކެއް ކުރަން ޖެހޭ ކަމަށެވެ.