08 ސެޕްޓެމްބަރ 2018 - 21:22
ފައިސަލް: އަޅުގަނޑުމެން ދޭނެ އެންމެ އުފާވެރި ހަބަރަކީ އިޖުތިމާއީ ރައްކާތެރިކަން އަޅުގަނޑުމެން ހަމަޖެހިގެން ދާނެކަން.
ފައިސަލް: ދިވެހި ރައްޔިތުންގެ ހައްގުތައް ހިމާޔަތް ކުރާނަން. ގާނޫނު އަސާސީ ނަގަހައްޓާނަން.
ފައިސަލް: ތިޔަބޭފުޅުން މިތަނުން ދައްކާލި މަންޒަރުން ނަތީޖާ ލިބިއްޖެ
ފައިސަލް: އަޅުގަނޑުމެންގެ ހިނިތުންވުމަކީ އިބޫ ފަދަ ސޯލިހު ބޭފުޅަކު އަޅުގަނޑުމެންނަށް ލިބުން.
ފައިސަލް: މުޅި ދިވެހި ގައުމު ގޮވަމުން ދަނީ ދިވެހި ރައްޔިތުންނަށް އަމާނާތްތެރިވާނެ ވެރިއަކަށް.
ފައިސަލް: ގައުމެއްގެ ތަރައްގީ އަކީ ބިރެއް ނެތި އުޅެވުން. ހަމަހަމަކަން އޮތުން.
ރަނިން މޭޓް ފައިސަލް ނަސީމް ވާހަކަ ދައްކަވަނީ
އިވާ: ދިވެހިރާއްޖެ އަށް ހަރާންކޯރު ނުވާ ވެރިޔަކު އިންތިހާބު ކުރަން ލިބޭ ފުރުސަތަކީ 23 ސެޕްޓެމްބަރު
އީވާ: ބިރަށް ވުރެ އަޅުގަނޑުމެންނަށް މުހިންމީ ގައުމުގެ ނަޒާހާތްތެރިކަން: އީވާ
އީވާ: ބިރުވެރި ކަމުގެ ފަސް އަހަރު ހިނގައްޖެ. އަނިޔާގެ ޝިކާރަ އަކަށްވީ ކޮންމެ މީހަކު ކޮންމެ އާއިލާއެއް އަދިވެސް ތިބި އިންސާފު ނުލިބިފައި.
އީވާ ވާހަކަ ދައްކަވަނީ
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ވީޑިއޯއެއް އެބަ ދައްކާ. (ޖަލު ހުކުމެއްގައި ހުންނެވުމާ އެކު ގާސިމްގެ ވާހަކަތައް މި ކަވަރޭޖްގައި ގެނެސްދެވޭކަށް ނެތް.)
މާރިޔާ: 23 ސެޕްޓެމްބަރުގައި އަޅުގަނޑުމެން އެންމެން ނުކުންނަން ޖެހޭ ވޯޓު ލާން. ކެނޑިޑޭޓް ނަންބަރު 2 އަށް ވޯޓުލާން. ވޯޓު ލާފައި ގެއަށް ވަޑައިނުގަންނަވާތި. އަޅުގަނޑުމެން ތިބޭނީ މަގުމަތީގައި. މިކަން ނިންމާލަން ވާނެ.
މާރިޔާ: ރޭ އަޅުގަނޑު އިނީ ރައީސް ޔާމީން ވެ ވަޑައިގަންނަވާނީ ކޮން ވައުދުތަކެއްތޯ ބަލަން. ބޮޑު ޖަލްސާއެއް ނިމިގެން ދިޔައީ އެއްވެސް ވައުދެއް ނެތް. މި ފަސް އަހަރު ނިމިގެން ދިޔައީ. އެއްވެސް ކަމެއް ކުރީއެއް ނޫން.
މާރިޔަ: އަޅުގަނޑަށް އެނގޭ މި ކެމްޕޭން ފަސޭހަ ނުވާނެކަން. އަޅުގަނޑުމެންނަށް އެނގޭ މި މާލޭގައި ކެމްޕޭން ކުރާކަށް ފަސޭހައެއް ނުވާނެކަން. އަޅުގަނޑުމެން އޭރު ވެސް ބުނަމުން ދިޔައިން ކުޑަ ފުރުސަތެއް ލިބުނަސް، އެންމެ ގަޑިއިރެއް ދެއްވިޔަސް މީހުން އެއްކޮށްލާނަމޭ.
މާރިޔާ ވާހަކަ ދައްކަވަނީ
އިބޫގެ ވާހަކަ ނިންމާލައްވައިފި
އިބޫ: މި ގައުމު ވެއްޓިފައިވާ އަނދަވަޅުން ސަލާމަތް ކޮށްދެވޭނީ ހަމަ ތިޔަ ބޭފުޅުންނަށް. 23 ސެޕްޓެމްބަރު ވެގެންދާނީ އިރާދަކުރެއްވިއްޔާ ދުނިޔޭގައި އަޅުގަނޑުމެން ބާކީވެފައި ތިބުން ނިމުމަކަށް އަންނާނެ ދުވަހަކަށް. މި ރާއްޖެ އިންސާފުގެ މަގަށް އެޅޭނެ ދުވަހަކަށް.
އިބޫ: އަޅުގަނޑުމެން މި ދައްކަނީ ބަދަލުގެ ވާހަކަ: މިއީ ކޮންމެ ދުވަހަކު ހެނދުނަކު ކޮންމެ ހަވީރަކު ލިބޭނެ ފުރުސަތެއް ނޫން.
އިބޫ: ރާއްޖެ މި އޮތީ ބައިނަލް އަގުވާމީ ގޮތުން އެކަހެރި ވެފައި. ހާރިޖީ ސިޔާސަތުގައި އަޅުގަނޑުމެން އިސްކުރާނީ ރާއްޖޭގެ މަސްލަހަތުގެ މައްޗަށް. އަވައްޓެރި ގައުމުތަކާ އެކު އޮތް ގުޅުން ބަދަހިކޮށް އަޅުގަނޑުމެންގެ ރޯލު އަދާކުރާނަން.
އިބޫ: ސަލާމަތީ ބާރުތަކަށް އޮތް އިތުބާރު މި ސަރުކާރުން ވަނީ ނަގާލައިފައި. އަޅުގަނޑުމެން ސަލާމަތީ ބާރުތަކަށް ޣައިރު ގާނޫނީ އަމުރެއް ނުކުރާނަން.
އިބޫ: މަޖުބޫރުކޮށްގެން ޖަލްސާ އަށް ގެނެސްފައިވާ އެކަކު ވެސް މިތާނގައި ނުހުންނާނެ. އެއީ އަޅުގަނޑުމެން ގަބޫލު ކުރާ ކަމެއް ނޫން. ސިވިލް ސާވިސްގެ މުވައްޒަފުންގެ މުސާރަ އަޅުގަނޑުމެން ބޮޑުކޮށްދޭނަން. އަދި ވަޒީފާގެ ރައްކާތެރިކަން ހޯދައިދޭނަން.
އިބޫ: ފަހުރުވެރި އާއިލާއެއް ބިނާކޮށްދޭނަން. ގެއްލިފައިވާ މީހުންގެ ތަހުގީގުތައް ފަށާނަން. އަބުރުވެރި ދިރިއުޅުމެއް ހޯދައިދޭނަން.
އިބޫ: ތަހުގީގު ފުރިހަމަ ނުކުރެވި ހުރި މަރުގެ މައްސަލަ ތަކާއި ގެއްލިފައިވާ މީހުން ހޯދުމުގެ ތަހުގީގުތައް ހާމަކަން ބޮޑު ގޮތެއްގައި ފަށާނަން
އިބޫ: މުޅި ރާއްޖޭގެ އެންމެ މާލެ އަށް ހިޖުރަ ކުރުވަން މަޖުބޫރު ކުރުވުން ބަދަލު ކުރުވަން ޖެހޭ. އަތްފޯރާ ފަށަށް ބޯހިޔާވަހިކަން އަޅުގަނޑުމެން ގެންނާނަން.
އިބޫ: އަންހެނުންނަކީ ހަމައެކަނި ގެވެށި އަނިޔާ ނުލިބޭނެ ބަޔެކޭ އެކަނި ބުނެލައިގެން ފުއްދާލުމުގެ ބަދަލުގައި އެކަން ސިޔާސަތުތަކުގައި ހިމަނާނަން،
އިބޫ: 23 ސެޕްޓެމްބަރުގައި މި ބަދަލު ގެންނާނެ ބަޔަކީ މި ގައުމުގެ ޒުވާނުން.
އިބޫ: ޒުވާނުންގެ ސަރުކާރަކަށް ވާނެ. ޒުވާނުންގެ ވިޔަފާރީގައި އެހީވެދޭނެ ސަރުކާރަކަށް ވާނެ. ޒުވާނުންނަކީ ހަމައެކަނި ފުޓްސެލް ކުޅޭ ބަޔަކަށް ނުވާނެ.
އިބޫ: އަޅުގަނޑުމެންގެ ވެރިކަމެއްގައި ފަތުރުވެރިކަން އުތުރާއި ދެކުނަށް ފެތުރި މުޅި ދުނިޔޭގައި އިޝްތިހާރު ކުރެވޭނެ
އިބޫ: މަސްވެރިން ބާނާ މަހަށް ހަމަ އަގު ލިބޭނެ. ދަނޑުވެރިން އުފައްދާ ތަކެތި ނުވި އުކާލާކަށް ނުޖެހޭނެ.
އިބޫ: އަޅުގަނޑުގެ ސަރުކާރުގެ ތިމާވެށި ހިމާޔަތް ކުރާނީ ފުރިހަމަ ގާނޫނީ ބާރާ އެކު. ތިމާވެށީގެ ކަންތައްތަކުގައި އަޅުގަނޑުމެން އިހުމާލެއް ނުވާނަން. ފަތުރުވެރިކަމަކީ އެންމެ މުހިންމު ސިނާއަތު.
އިބޫ: އަޅުގަނޑުމެން ގެންނާނީ ރާއްޖޭގެ ދޮންވެލިގަނޑާއި ނާޒުކު ތިމާވެށީގެ އިގްތިސާދު
އިބޫ: ހުޅުވާލެވިފައިވާ އިންސާފުވެރި ޓެކްސް ނިޒާމެއް އަޅުގަނޑުމެން ގެންނާނަން.
އިބޫ: ތި ބޭފުޅުންގެ އެންމެ ލޯ ލާރިއެއްގައި ވެސް އަޅުގަނޑު ނުޖެހޭނަން. އަޅުގަނޑުގެ ވެރިކަމެއްގައި އިސްލާމް ދީން ނޫން ދީނެއް ރާއްޖެއަކު ނޯންނާނެ
އިބޫ: ރައްޔިތުންގެ ބޮލުގައި ދަރަނި އަޅުވާނެ މީހަކަށް އަޅުގަަނޑު ހަމަ ގައިމު ނުވާނެ
އިބޫ: ރައީސް ޔާމީން މި ދައްކަވަނީ އެއާޕޯޓާއި ބްރިޖާއި 25 ބުރީގެ އިމާރާތް. އެކަމަކު އެއީ ހެދެން އޮތް އަގުތަކަށް ވުރެ ބޮޑު އަގުތަކުގައި ހަދާފައިވާ ތަންތަން.
އިބޫ: ރައީސް ޔާމީން ރަށްތައް ވިއްކާފައި ހުރި ކޮން ގައުމަކަށް ކާކަށް ކަން އެނގޭކަށް ނެތް. އަދި ކިތައް މިލިއަނަށް ކަން ވެސް އެނގޭކަށް ނެތް.
އިބޫ: މި އިންސާފު އަންނާނީ އެންމެ މަތިން ފެށިގެން ބާރުތައް ބަދަލު ކުރެވިގެން.
އިބޫ: އެއްވެސް މީހެއްގެ ހައްގަކަށް އަރައިގެންފި ނަމަ އޭގެ ބަދަލު ލިބޭނެ. އަޅުގަނޑުމެން އަނިޔާވެރިއެއް ނުވާނަން. މި ދަންނަވާ އިންސާފު ލިބޭނީ ބަދަލުވެގެން.
އިބޫ: އެ ހަތަރު ލީޑަރުން އަޅުގަނޑުމެންގެ ސަރުކާރުގައި މިނިވަން ވާނެ.
އިބޫ: ރާއްޖެ ދުށް އެންމެ ވަރުގަދަ ލީޑަރުންގެ މައްޗަށް އިންސާފެއް ނެތް ހުކުމްތަކާ އެކު ރައީސް ޔާމީނަށް މިހާރު ތާއީދެއް ނެތް
އިބޫ: މާޒީވެގެން މި ދަނީ ރާއްޖެ ދުށް އެންމެ އަނިޔާވެރި 5 އަހަރު. އެންމެ ކޮރަޕްޝަން ފަސް އަހަރު. އެންމެ ހުދުމުހުތާރު ފަސް އަހަރު. އެންމެ ނާ އިންސާފު ފަސް އަހަރު. ރާއްޖެ މި ދަނީ ބަދަލުވާން. އެއްވެސް ކަމެއް އެއްވެސް ގޮތަކަށް ދެމިއެއް ނޯންނާނެ.
އިބްރާހިމް މުހަންމަދު ސޯލިހު ވާހަކަ ދައްކަވަނީ
އައްބާސް: މި ދެ ކެންޑިޑޭޓުން ރިޔާސަތަށް އިންތިހާބު ކުރުމަކީ ގައުމީ ވާޖިބެއް
އައްބާސް: ޒުވާނުންގެ ވާހަކަ އަދި ޖަލުގައި ތިބި މީހުންގެ ވާހަކަ ދައްކާއިރު މިހާރު ޖަލުގައި ހައްޔަރުކޮށްފައި ހުރި އަހުމަދު ފާރިސްގެ ގުރުބާނީ ފާހަގަކޮށްލަން ޖެހޭ. ރައީސް މައުމޫންގެ ވާހަކަ އަޅުގަނޑުމެން އިތުރަށް ދައްކަން ޖެހޭ ވާހަކައެއް ނޫން.
އައްބާސް: އަޅުގަނޑުމެން ވިސްނަންވީ މިހާރު އަޅުގަނޑުމެން މިތިބީ ޖުމްހޫރީ ވެރިކަމެއްގައިތޯ. ޖުމްހޫރީ ވެރިކަމަކީ ޖުމްހޫރިއްޔަތަކީ ރައްޔިތުން އެ މީހުންގެ ތެރެއިން އެ މީހުންގެ ބަޔަކު ގޮވައިގެން އެ މީހުންނަށް ޓަކައި އުފައްދާ ސަރުކާރެއް.
އައްބާސް: މީގެ 50 އަހަރު ކުރިން ރާއްޖެ ޖުމްހޫރިއްޔަތަކަށް ބަދަލުވާން އުޅުނު އިރު ހުޅުލެ އާއި ގާދު އާ ދޭތެރޭ ގަލުން ފާލަމެއް އެޅި. އެއީ އެޕްރީލް 1960ގައި. މިއީ އިއްތިފާގެއް ކަން ނޭނގެ. ތަރައްގީއަކީ އޭރު ވެސް އަޅުގަނޑުމެން ދެކެމުން އައި ކަމެއް. އެކަމަކު ދުވަސްކޮޅަކުން ހަނދާނެއް ނުހުރޭ. ތަރައްގީގައި އަޅުގަނޑުމެން ވިސްނަންވީ މީހުން ބައިވެރިވެގެން. ދަރަންޏަށް ފައިސާ ނަގައިގެން ބޭރު ބަޔަކަށް އެ ދީގެން ކުރާ ތަރައްގީއަކީ ތަރައްގީއެއް ނޫން
އައްބާސް: އަޅުގަނޑު އައިސް މިހިރީ މައުމޫން ރިފޯމް މޫވްމަންޓްގެ ފަރާތުން. އަޅުގަނޑުމެން ތާއީދުކުރަނީ އިބްރާހިމް މުހަންމަދު ސޯލިހަށް
އައްބާސް އަކީ ރައީސް މައުމޫންގެ ޅިޔަން ބޭފުޅެއް. އަދި މައުމޫންގެ ކެބިނެޓްގައި ގިނަ ދުވަސްތަކެއް ވަންދެން ހިމެނި ވަޑައިގެންނެވި ބޭފުޅެއް.
ކުރީގެ މިނިސްޓަރު އައްބާސް އިބްރާހިމް ވާހަކަ ދައްކަވަނީ
މިރޭގެ ޖަލްސާ ފެށިއިރު ވަރަށް ގިނަ ބަޔަކު ވަނީ މި ޖަލްސާ އަށް ގޮސްފައި. ޖަހާފައި ހުރި ހުރިހާ ގޮނޑިއެއް ފުރި، މަގުމަތީގައި އާއި ކައިރީގައި ހުރި ބައެއް ގޭގޭގެ ބެލްކަނިތަކުގައި ވެސް މީހުން ތިބިތަން އެބަ ފެނޭ.
ކުރިއަށް އޮތް ރިޔާސީ އިންތިހާބަށް ކެމްޕޭން ކުރުމަށް މާލޭގައި ބާއްވާ އެންމެ ބޮޑު ޖަލްސާ އަލިމަސް ކާނިވަލުގައި ދާދި ދެންމެއަކު ފަށައިފި އެވެ.
މި ޖަލްސާގައި އިދިކޮޅު ރިޔާސީ ކެންޑިޑޭޓް އެމްޑީޕީގެ ޕާލަމެންޓަރީ ގުރޫޕުގެ ލީޑަރު އިބްރާހިމް މުހަންމަދު ސޯލިހާއި ރަނިންމޭޓް ޖުމްހޫރީ ޕާޓީގެ ފައިސަލް ނަސީމް ބައިވެރިވެވަޑައިގަންނަވަ އެވެ. މީގެ އިތުރުން ކޯލިޝަންގައި ހިމެނޭ އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީގެ އިތުރުން ރައީސް މައުމޫނަށް ތާއީދުކުރާ ފެކްޝަންގެ އިސް ބޭފުޅުން ބައިވެރިވެ ވަޑައިގަންނަވަ އެވެ. މީގެ އިތުރުން ރައީސް މައުމޫންގެ ކެބިނެޓްގައި މަސައްކަތް ކުރެއްވި ބައެއް ބޭފުޅުން ވެސް ޖަލްސާގައި ބައިވެރިވެ ވަޑައިގެންނެވި އެވެ. އޭގެ ތެރޭގައި އުމަރު ޒާހިރާއި އަނީސާ އަހުމަދު އަދި އަހުމަދު އަބްދުﷲ އާއި އަބްދުﷲ ކަމާލުއްދީން ވެސް ހިމެނިވަޑައިގަންނަވަ އެވެ.
މިރޭ ކާނިވަލުގައި މި ޖަލްސާ ބާއްވަނީ އިދިކޮޅު ޖަލްސާއެއް ބޭއްވުުގެ ހުއްދަ އަށް އެދި، އެއްވެސް ތަނެއް ނުލިބި ތިން އަހަރު ވުމަށް ފަހު ކަމަށް އެމްޑީޕީން ބުނެ އެވެ. އެހެންވެ، މި ޖަލްސާ އަށް ކާނިވަލުގައި ޖަހާފައިވާ ހުރިހާ ގޮނޑިއެއް ފުރި، އެތައް ސަތޭކަ ބަޔަކު ކޮޅަށް ތިބި ތަން ފެނެ އެވެ. އެނގިފައިވާ ގޮތުގައި އަށެއް ޖެހިއިރު ކާނިވާ ސަރަހައްދަށް މީހުން ވަނީ ޖަމާވާން ފަށައިފަ އެވެ.
(އިތުރު ތަފުސީލު އަންނަނީ)