09 ސެޕްޓެމްބަރ 2018 - 15:14
ވެލާނާ އިންޓަނޭޝަނަލް އެއާޕޯޓުގެ ޖާގައިގެ ދަތިކަމާ ހެދި މި އަހަރު ވެސް ރާއްޖެ އަށް 1.5 މިލިއަނަށް ވުރެ ގިނަ ޓޫރިސްޓުން ނުގެނެވޭނެ ކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ބުނެފި އެވެ.
ރާއްޖެ އަށް މި އަހަރު އައި އެއް މިލިއަން ވަނަ ޓޫރިސްޓަށް މަރުހަބާ ކިޔަން އެއާޕޯޓުގައި ބޭއްވި ހާއްސަ ރަސްމިއްޔާތަށް ފަހު ނޫސްވެރިންނާ ވާހަކަދައްކަވަމުން އެ ކުންފުނީގެ އެކްޓިން މެނޭޖިން ޑިރެކްޓަރު ހާރިސް މުހައްމަދު ވިދާޅުވީ ވެލާނާ އިންޓަނޭޝަނަލް އެއާޕޯޓުން މިހާރު ގިނަވެގެން ހިދުމަތް ދެވެނީ އަހަރަކު 1.5 މިލިއަން ފަސިންޖަރުންނަށް ކަމަށެވެ. ނަމަވެސް އެއާޕޯޓުގެ އާ ރަންވޭ ބޭނުންކުރަން ފެށުމުން މާ ގިނަ ދުވަހެއް ނުވެ 7.5 މިލިއަން ފަސިންޖަރުން އަހަރަކު ގެނެވޭނެ ކަމަށް ވެސް އޭނާ ވިދާޅުވި އެވެ.
"އެއާޕޯޓުގެ އާ ރަންވޭ ހުޅުވުމުން އަޅުގަނޑުމެންގެ މާކެޓިން ހަރަކާތްތައް އިތުރުވެގެންދާނެ. އެގޮތުން ރާއްޖެ ބްރޭންޑްކުރުމާއި ޕޮޒިޝަންކުރުމާއި ރާއްޖޭގެ ވިޒިބިލިޓީ އިތުރުކުރުމުގެ ކަންތައްތައް އޮންލައިން އަދި އޮފްލައިން މީޑިއާތައް ބޭނުންކޮށްގެން ކުރެވޭނެ،" ހާރިސް ވިދާޅުވި އެވެ.
އޭނާ ވިދާޅުވީ މާކެޓިން ކެމްޕޭން ޕްލޭންގައި މި އަހަރުގެ ނެތް ދެ އިވެންޓެއްގައި އެ ކުންފުނިން ބައިވެރިވާނެ ކަމަށެވެ. އަދި އެ ހަރަކާތްތަކުގައި ރާއްޖޭގައި އަލަށް ހުޅުވާ ރިސޯޓުތަކާއި ރާއްޖޭގެ ގުދުރަތީކަން ޕްރޮމޯޓްކުރަން އިތުރު މަސައްކަތްތަކެއް ކުރެވޭނެ ކަމަށް ވެސް ހާރިސް ވިދާޅުވި އެވެ.
އެ ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރުގެ ނައިބު ހުސެއިން ލިރާރު ވިދާޅުވީ ރާއްޖެ އަށް އަންނަ ޓޫރިސްޓުން އިތުރުކުރުމަށް އޮތް އެންމެ ބޮޑު ހުރަހަކީ ވެލާނާ އިންޓަނޭޝަނަލް އެއާޕޯޓުގެ ދަތިތައް ކަމަށެވެ.
"މިހާރު އެއާޕޯޓުގެ ޑިވެލޮޕްމަންޓް ވަރަށް ބާރަށް ކުރިޔަށް ގޮސް، އެއާޕޯޓުގެ ޑިވެލޮޕްމަންޓް ނިމުނީމަ އަޅުގަނޑުމެންނަށް އިތުރު ޓޫރިސްޓުންނަށް ގެނައުމަށް މަގުފަހިވެގެންދާނެ. އެގޮތުން ބޮޑެތި އެއާލައިންތައް ޖެއްސޭވަރުގެ ރަންވޭއަކާއި އަދި ޓާމިނަލް ޑިވެލޮޕްމަންޓް އަޅުގަނޑުމެން ވަރަށް ބޮޑަށް ފާހަގަކުރަން،" ލިރާރު ވިދާޅުވި އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިދިޔަ އަހަރުގެ ނިޔަލަށް ރާއްޖެ އައިސްފައި ވަނީ 1.38 މިލިއަން ޓޫރިސްޓުންނެވެ. އަދި 2016 ވަނަ އަހަރު ރާއްޖެ އައިސްފައި ވަނީ 1.28 މިލިއަން ޓޫރިސްޓުންނެވެ. އަދި މިއަދުގެ ނިޔަލަށް އެއް މިލިއަން ޓޫރިސްޓުން އައިއިރު، މިއަހަރު ޓޫރިޒަމަށް ދިހަ ޕަސެންޓްގެ ކުރިއެރުމެއް އަންނާނެ ކަމަށް އެ މިނިސްޓްރީން ލަފާކުރެ އެވެ.
ޓޫރިޒަމް މިނިސްޓްރީން މިއަދު އެއް މިލިއަން ޓޫރިސްޓުން އައުން ފާހަގަކުރިއިރު، މިއަދާ ހަމަޔަށް 252 ދުވަހުގެ ތެރޭގައި 3،968 މީހުން ދުވާލަކު އަންނަން ޖެހެ އެވެ.