03 އޮކްޓޯބަރ 2018 - 13:52
އިންތިޚާބީ ރައީސް، އެމްޑީޕީ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް (އިބޫ) އާއި އެމްއެމްއޭގެ ގަވަރުނަރު އަލީ ނަސީރު، ދެ ވަނަ ފަހަރަށް ބައްދަލުކުރައްވައިފި އެވެ.
މިދިޔަ މަހުގެ 23 ގައި ބޭއްވި ރިޔާސީ އިންތިޚާބު އިބޫ ކާމިޔާބު ކުރެއްވުމާ އެކު، މަރުކަޒީ ބޭންކުގެ ގަވަރުނަރު މީގެ ކުރިން ވަނީ އިބޫގެ އޮފީހަށް ވަޑައިގެން އެމަނިކުފާނާ ބައްދަލުކުރައްވައިފަ އެވެ.
އޭގެ ފަހުން، އިބޫ މިއަދު ވަނީ އެމަނިކުފާނަށް އިގްތިސޯދީ ކަންކަމުގައި ލަފާއަރުވާ ޓީމުގެ ބައެއް ބޭފުޅުންނާ އެކު، އެމްއެމްއޭއަށް ވަޑަައިގެން ގަވަރުނަރު ނަސީރާ ބައްދަލުކުރައްވައިފަ އެވެ. މި ބައްދަލުވުމުގައި އެ އިދާރާގެ ބައެއް އިސްވެރިން ވެސް ބައިވެރިވެވަޑައިގަތެވެ. ނަމަވެސް، މި ބައްދަލުވުމުގައި ދެކެވުނު އެއްވެސް ވާހަކައެއް އަދި ހާމައެއް ނުކުރެ އެވެ.
އިބޫ ގެންދަވަނީ ދައުލަތުގެ މުއައްސަސާތަކުގެ އިސް ބައެއް ބޭފުޅުންނާ ބައްދަލު ކުރައްވަމުންނެވެ. އިބޫ ބައްދަލު ކުރެއްވި ވެރިންގެ ތެރޭގައި ފުލުހުންނާއި އެމްއެންއެންޑީއެފްގެ އިތުރުން ކަސްޓަމްސްގެ އިސް ވެރިން ހިމެނިވަޑައިގަންނަވަ އެވެ.
އިބޫ އާއި އެމްއެމްއޭގެ ގަވަރުނަރާ އެކު ބައްދަލުވުމެއް ބޭއްވި އިރު، ރައީސް އަބްދުﷲ ޔާމީންގެ އެކައުންޓަކަށް 22.5 މިލިއަން ރުފިޔާ ޖަމާކޮށްފައިވާ ވާތީ، އެކަން ބަލަން އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ފުލުހުންނަށް ހުށަހެޅި މައްސަލައެއް މީޑިއާ އަށް ވަނީ ތިލަވެފަ އެވެ.
ރައީސް ޔާމީންގެ އެކައުންޓަށް ސެޕްޓެމްބަރު 5 ގައި 10 މިލިއަން ރުފިޔާ އަދި ސެޕްޓެމްބަރު 10 ގައި 12.5 މިލިއަން ރުފިޔާ ޖަމާކުރުމުން، އެކަން ބަލައިދިނުމަށް ފުލުހުންނަށް ހުށަހެޅީ އިންތިހާބުގެ ކުރިންނެވެ.
ރައީސް ޔާމީންގެ އެކައުންޓަށް އެވަރުގެ އަދަދެއް ޖަމާކުރީ، ޕީޕީއެމުން މިހާރު ބުނާ ގޮތުގައި، ރިޔާސީ އިންތިހާބަށް ހޭދަކުރުމަށެވެ. އިންތިހާބުތަކާ ބެހޭ ގާނޫނު ބުނާ ގޮތުން ރިޔާސީ ކެންޑިޑޭޓުން، ކެމްޕޭނަށް ހޭދަކުރާ ފައިސާ އެ ކެންޑިޑޭޓެއްގެ ނަމުގައި ވަކި އެކައުންޓެއް ހުޅުވާ އެއަށް ޖަމާކުރަން ޖެހެ އެވެ.