19 އޮކްޓޯބަރ 2018 - 11:49
މިއުނިކް (އޮކްޓޫބަރު 18) - މިދިޔަ އަހަރު ނައިޓް ކްލަބެއްގެ ތެރެއިން މީހަކަށް ހަމަލާދިންކަން ސާބިތުވެ ބާސެލޯނާގެ ޗިލީގެ މިޑްފީލްޑަރު އާޓޫރޯ ވިޑާލް ޖޫރިމަނާކުރަން ޖަރުމަނު ކޯޓަކުން ނިންމައިފި އެވެ.
މިދިޔަ އަހަރު ބަޔާން މިއުނިކަށް ކުޅުނުއިރު ސެޕްޓެމްބަރު މަހުގެ ތެރޭގައި ނައިޓް ކްލަބެއްގެ ތެރެއިން މީހަކަށް ހަމަލާދިނީ ވިޑާލް އާއި އޭނާގެ ބޭބެ އެވެ. އެ މައްސަލައިގެ ހުރިހާ އަޑުއެހުންތަކެއް ނިންމާލުމަށް ފަހު ކޯޓުން ނިންމީ ވިޑާލް 921،812 ޑޮލަރުން ޖޫރިމަނާ ކުރާށެވެ. އެއީ ވިޑާލް އަށް ބަޔާނުން ލިބެމުން އަންނަ މުސާރަ އަށް ބެލުމަށް ފަހު 80 ދުވަހުގެ މުސާރަ ޖެހޭ އަދަދެވެ.
މި މައްސަލައިގައި ވިޑާލްގެ ބޭބެ ވެސް ވަނީ 20،677 ޑޮލަރުން ޖޫރިމަނާކޮށްފަ އެވެ. ވިޑާލް އާއި އޭނާގެ ބޭބެ އެ މީހާ އަށް ހަމަލާދިން މައްސަލަ ނިންމުމުގައި އެންމެ ބޮޑަށް ބެލީ ނައިޓް ކްލަބްގައި އެ ވަގުތު ތިބި ގިނަ މީހުންތަކެއްގެ ބަޔާނާއި ސީސީޓީވީ ވީޑިއޯ ތަކަށެވެ.
އުމުރުން 31 އަހަރުގެ ވިޑާލް މި މައްސަލަައިގެ ފަހު އަޑުއެހުމަށް ކޯޓަށް ހާޒިރުނުވެވުނީ ބުދަ ދުވަހުގެރޭ މެކްސިކޯ އަތުން 1-0 އިން މޮޅުވި މެޗުގައި ޗިލީ ޓީމުގައި އޭނާ ހިމެނޭތީ އެވެ. ތިން އަހަރަށް ފަހު ބަޔާން ދޫކޮށް ވިޑާލް ވަނީ ސްޕެއިނުގެ ބާސެލޯނާ އަށް މި ސީޒަނުގައި ބަދަލުވެފަ އެވެ.
ބާސެލޯނާ އަށް ބަދަލުވުމަށް ފަހު ވިޑާލަށް އެ ޓީމުން ކުޅުމުގެ ފުރުސަތު އެހާ ގިނައިން ނުލިބެ އެވެ. ގިނަ މެޗުތަކުގައި އޭނާ ކުޅެނީ ބަދަލު ކުޅުންތެރިއެއްގެ ގޮތުގަ އެވެ. ސްޕެއިން ލީގުގައި މިހާތަނަށް ބާސެލޯނާ ކުޅުނު އަށް މެޗުގެ ތެރެއިން ވިޑާލަށް ފުރަތަމަ އެގާރައިން ފުރުސަތު ލިބުނީ އެންމެ މެޗަކުންނެވެ.
ވިޑާލަށް ޓީމުން ކުޅުމުގެ ފުރުސަތު ގިނައިން ނުލިބޭތީ އޭނާ ވަނީ ޗިލާ މީޑިއާގައި ޝަކުވާކޮށްފަ އެވެ. އެކަމާ ބެހޭގޮތުން ބާސެލޯނާގެ ސްޕޯޓިން ޑައިރެކްޓަރު ޕެޕް ސިގޭރާ ދާދި ފަހުން ބުނީ ވިޑާލްގެ އަހުލާގާ މެދު ޓީމުގެ މެނޭޖަރު އާނެސްޓޯ ވަލްވޭޑޭ އެންމެ ހިތްހަމަ ނުޖެހޭ ކަމަށެވެ. އަދި ވިޑާލް އެކަން ބަދަލުކުރަން ޖެހޭ ކަމަށް ވެސް ސިގޭރާ ބުންޏެވެ.