24 އޮކްޓޯބަރ 2018 - 07:20
އިންޑިއާގެ މަޝްހޫރު ކޮމީޑިއަން އަދި ޓީވީ ހޯސްޓް ކަޕިލް ޝަރްމާ އަންނަ ޑިސެމްބަރު މަހު ކައިވެނިކުރަން ނިންމައިފި އެވެ.
ކަޕިލް ބުނީ އޭނާ އާއި ޒަމާންވީ ލޯބިވެރިޔާ ގިނީ ޗަތުރަތުގެ ކައިވެނީގެ ހަފުލާ އޮންނާނީ ޑިސެމްބަރު މަހުގެ 12 ވަނަ ދުވަހު، އުފަން އަވަށް އަމްރިތުސާގަ ޖަލަންދަރުގައި ކަމަށެވެ.
އޭނާ ބުނީ ކައިވެނީގެ ތައްޔާރީތައް މިހާރު ވެސް ދެ ފަރާތުގެ އާއިލާ އިން ފަށާފައިވާ ކަމަށާއި މިއީ ޕަންޖާބީ ސްޓައިލްގައި ބާއްވާނެ ވަރަށް ބޮޑު ހަފުލާއަކަށް ވެގެން ދާނެ ކަމަށެވެ.
"އަހަރެންގެ މަންމަ ވެސް ބޭނުންވޭ ކައިވެނީގެ ހަފުލާ ވަރަށް ބޮޑުކޮށް، ވަރަށް ކުލަގަދަކޮށް ބާއްވަން،" ކަޕިލް ބުންޏެވެ. "މި ހަފުލާގައި ވީހާ ވެސް ގިނަ ބަޔަކު ބައިވެރިކުރަން އާއިލާ އިން ވެސް ބޭނުންވޭ. އަހަރެން ވަރަށް އުފަލުން މިހުރީ."
ކަޕިލް ކައިވެންޏަށް ތައްޔާރު ވާން ފަށާފައި މި ވަނީ ހުއްޓާލައިފައިވާ އޭނާގެ ކާމިޔާބު ޓީވީ ޝޯ "ދަ ކަޕިލް ޝަރްމާ ޝޯ" ގެ އާ ސީޒަނަކާ އެކު ވަރަށް އަވަހަށް ބެލުންތެރިންނާ ބައްދަލު ކުރާނެ ވާހަކަ ވެސް ހިއްސާކޮށްފައި ވަނިކޮށެވެ.
ރިޕޯޓްތައް ބުނާ ގޮތުން އެ ޝޯގެ އާ ސީޒަން ސޮނީ ޓީވީން ގެނެސް ދޭން ފަށާނީ މިހާރު ދައްކާ އިންޑިއަން އައިޑޮލް ސީޒަން 10 ނިމުމުންނެވެ.
ކަޕިލް ކައިވެންޏަށް ތައްޔާރުވަމުން އަންނަ އިރު، މި ދޭތެރެއިން އޭނާ ޑިޕްރެޝަނަށް ގޮސް، ރަލަށް ދެވި ހިފައި މީހާގެ ސިއްހީ ހާލަތު ވެސް ވަރަށް ބޮޑަށް ގޯސްވުމުން މަސައްކަތްތަކުން ބްރޭކެއް ނަގައިގެން މިހާރު އަންނަނީ ކުރީގެ ހާލަތަށް ރުޖޫއަވާން މަސައްކަތް ކުރަމުންނެވެ. މި މައްސަލަގަނޑުގެ ތެރޭގައި ކަޕިލް ވަރަށް ބޮޑަށް ފަލަވެފައިވާތީ އޭނާ އަންނަނީ ހިކެން ވެސް މަސައްކަތް ކުރަމުންނެވެ.
ކޮމީޑިއަންގެ ގޮތުގައި ލިބުނު ބޮޑު މަޝްހޫރުކަމާއި ތަނަވަސްކަމާ އެކު ކަޕިލް ފަހުން ވަނީ ފިލްމު ވެސް ކުޅެ، ފިލްމު ޕްރޮޑިއުސް ކުރަން ވެސް ފަށައިފަ އެވެ. އޭނާގެ އެންމެ ފަހުން ކުޅުނު ފިލްމަކީ އަމިއްލަ އަށް ޕްރޮޑިއުސްކޮށް، ލީޑް ރޯލް ކުޅެ މިދިޔަ އަހަރު ނެރުނު "ފިރަންގީ" އެވެ.