25 އޮކްޓޯބަރ 2018 - 11:52
ރިޔާޒް (އޮކްޓޯބަރު 25) - ނޫސްވެރިޔާ ޖަމާލް ޚާޝުގްޖީ ތުރުކީ ކޮންސިއުލޭޓުގައި މަރާލުމުގައި ޒިންމާވާ އެންމެންނަށް އަދަބު ދޭނެ ކަމަށް ވަލީ އަހުދު މުހައްމަދު ބިން ސަލްމާން ވިދާޅުވެއްޖެ އެވެ.
ރިޔާޒުގައި ކުރިއަށްދާ ބިޒިނަސް ފޯރަމްގައި ވާހަކަ ދައްކަވަމުން އެމްބީއެސްގެ ނަމުން މަޝްހޫރު މުހައްމަދު ވިދާޅުވީ އެ ކުށަކީ ސައުދީގެ އެންމެންނަށް ލިބުނު ހިތާމައަކާއި ވޭނެއް ކަމަށެވެ. އަދި އެ މައްސަލައިގެ ސަބަބުން ތުރުކީއާ ދެމެދު މައްސަލައެއް އުފެދުމުގެ ފުރުސަތު ނުދޭނެ ކަމަށް ވިދާޅުވި އެވެ.
ތުުރުކީގެ ރައީސް ރަޖަބް ތައްޔިބު އުރުދުޣާން ވިދާޅުވެފައި ވަނީ ނޫސްވެރިޔާ މަރާލާފައި ވަނީ ދުރާލައި ރާވައިގެން ކަމަށެވެ. އަދި އެއީ ސިޔާސީ މަރެއް ކަމަށް އުރުދުޣާން ވަނީ ވިދާޅުވެފަ އެވެ.
ކޮންސިއުލޭޓް ތެރޭ ނޫސްވެރިޔާ މަރާލާފައިވާ ކަމަށް ސައުދީން އެއްބަސްވި ފަހުން ޕްރިންސް މުހައްމަދު ދެއްވި ފުރަތަމަ ބަޔާނުގައި ވިދާޅުވީ އެ މަރު އެއީ ރަނގަޅު ކަމެއްގެ ގޮތުގައި ދެއްކޭނެ އެއްގޮތެއް ވެސް ނޯންނާނެ ކަމަށާއި އެ ޖަރީމާގެ ފަހަތުގައިވާ މީހުންނާ ހަމައަށް އިންސާފު އަރާ ހަމަކުރާނެ ކަމަށެވެ.
މުހައްމަދު ވިދާޅުވީ ތުރުކީއާ އެކު އޮތީ ރަނގަޅު ގުޅުމެއް ކަމަށާއި ފުރުސަތުގެ ބޭނުން ހިފައި ތުރުކީ އާއި ސައުދީއާ ދެމެދު މައްސަލަ އުފައްދަން ބައެއް މީހުން މަސައްކަތް ކުރަމުންދާ ކަމަށެވެ.
"އެކަމަކު އަޅުގަނޑު ދޭން ބޭނުންވާ މެސެޖަކީ އެއީ ކާމިޔާބުވާނެ ކަމެއް ނޫނޭ،" މުހައްމަދު ވިދާޅުވި އެވެ.
ވަލީ އަހުދު މުހައްމަދާއި ރަސްގެފާން ސަލްމާން ވަނީ ޚާޝުގްޖީގެ އާއިލާގެ ބައެއް މެމްބަރުންނާއި އަންގާރަ ދުވަހު ބައްދަލުކޮށް ތައުޒިޔާ ވިދާޅުވެފަ އެވެ.