12 އޯގަސްޓް 2016 - 21:21
އެމްޑީޕީގެ ސަރުކާރުގައި އެންމެފަހުން ފޮރިން މިނިސްޓަރުކަން ކުރެއްވި އަހުމަދު ނަސީމް ފުލުހުންގެ ތަހުގީގަކަށް 14 ދުވަހުގެ ތެރޭގައި ހާޒިރުވެވަޑައިގަތުމަށް އަންގައިފި އެވެ.
ފުލުހުން މިއަދު ނެރުނު ނޫސްބަޔާނެއްގައި ވަނީ އެތަނުން ތަހުގީގު ކުރަމުންދާ މައްސަލައަކާ ގުޅިގެން ހ. ހިކިފިނިފެންމާގެ އަހުމަދު ނަސީމް، 68، އަަކީ ތަހުގީގަށް ހާޒިރުކުރުމަށް ބޭނުންވެ، ރާއްޖޭގައި މިވަގުތު ނެތުމުގެ ސަބަބުން ތަހުގީގަށް ހާޒިރު ކުރެވިފައި ނުވާ މީހެއް ކަމަށެވެ.
"އަހުމަދު ނަސީމް ތަހުގީގަށް ހާޒިރުކުރުމަށްޓަކައި ޗިޓް ހަވާލުކުރުމަށް މޯލްޑިވްސް ޕޮލިސް ސާވިސް އިން މަސައްކަތްކުރި ނަމަވެސް އަހުމަދު ނަސީމް މިވަގުތު ރާއްޖެއިން ބޭރުގައި ހުރުމުގެ ސަބަބުން ފުލުހުންގެ ތަހުގީގަށް ހާޒިރުވުމަށް އަންގާ ޗިޓް ވަނީ އެ ފަރާތާ ހަވާލުނުކުރެވި އެވެ." އެ ނޫސްބަޔާނުގައި ބުނެފައިވެ އެވެ.
ފުލުހުންގެ ނޫސްބަޔާނުގައި ބުނެފައި ވަނީ ނަސީމްގެ މައްޗަށް ތުހުމަތު ކުރެވޭ މައްސަލައާ ގުޅިގެން ތަހުގީގަށް ކުރަން ޖެހޭ ސުވާލުތައް ކުރުމަށާއި އޭނާގެ މައްޗަށް ކުރެވޭ ތުހުމަތުތަކަށް ޖަވާބުދާރީވެ ދިފާއުގައި ވާހަކަ ދެއްކުމުގެ ފުރުސަތު ދިނުމުގެ ގޮތުން މާދަމާ އިން ފެށިގެން 14 ދުވަހުގެ ތެރޭގައި ހާޒިރުވުމަށް އެންގުމަށް މި ނޫސް ބަޔާން މެދުވެރިކޮށް އާންމުކޮށް އަންގައި އިއުލާނުކުރާ ކަމަށެވެ. އަދި އެ މުއްދަތުގެ ތެރޭގައި ތަހުގީގަށް ހާޒިރު ނުވެއްޖެނަމަ އަޅަން ޖެހޭ ގާނޫނީ އެހެނިހެން ފިޔަވަޅުތައް އަޅާނެ ކަމަށް ވެސް އެ ނޫސްބަޔާނުގައި ބުނެފައިވެ އެވެ.