15 އޯގަސްޓް 2016 - 06:55
ބޮލީވުޑްގެ ޑްރީމް ޓީމުގެ އެއް ބައިވެރިޔާ ޕަރިނީތީ ޗޯޕްރާ މިހާރު ހުރީ އެމެރިކާގަ އެވެ. އިއްޔެ ރޭ ތެކްސަސްގެ ހިއުސްޓަންގައި މި ޓިމުން ވަނީ ވަރަށް ފުރިހަމަ ލައިވް ޝޯއެއް ބާއްވާފަ އެވެ. މި ޝޯ ބަލަން އެތައް ހާސް މީހުންނެއް ވަދެ މުޅި ތަން އޮތީ ފުރި ބާރުވެފަ އެވެ.
ޝޯގެ ކާމިޔާބީގެ ސަބަބުން ހުރިހާ ބައިވެރިން ތިބީ ވަރަށް އުފަލުންނެވެ.
މި ޝޯގައި ޕަރިނީތީ ވަނީ އޭނާގެ ދެބެންގެ ދެދަރި ދައްތަ ޕްރިޔަންކާ ޗޯޕްރާ އަށް ޚާއްސަކޮށް ޕާފޯމަންސެއް ހުށަހަޅައިދީފަ އެވެ. ޕްރިނީތީގެ މި ޚާއްސަ ނެށުމަށް ޕްރިޔަންކާ ވަނީ ޝުކުރު އަދާކޮށް ޓުވީޓް ކޮށްފަ އެވެ.
ވަރަށް ރީތި ސާޅިއެއްގައި ޕަރިނީތީ ވަނީ ޕްރިޔަންކާގެ "ދޭސީ ގާލް" ލަވަ ހުށަހަޅައިދީފަ އެވެ.
މި ޝޯއަށް ފަހު ޕަރިނީތީ އިންސްޓަގްރާމް ކޮށްފައިވާ ލިޔުމުގައި ބުނެފައިވަނީ ދޭސީ ގާލް (ޕްރިޔަންކާ) ވަރުގެ މީހެއް ނެތް ކަމަށާއި އޭނާގެ ޕާފޯމަންސް ޚާއްސަކުރީ ޕްރިޔަންކާ އަށް ކަމަށެވެ.
އެމެރިކާގެ އެކި ސްޓޭޓްތަކުގައި ކުރިޔަށް އޮތް 10 ވަރަކަށް ދުވަހު ބާއްވަން ހަމަޖެހިފައިވާ ޑްރީމް ޓީމުގެ ހުށަހެޅުންތަކުގައި ޕަރިނީތީގެ އިތުރުން ވަރުން ދަވަން، އާލިއާ ބަޓް، ކެޓުރީނާ ކައިފް، ސިދާރްތު މަލްހޯތުރާ އަދި އަދިތުޔާ ރޯއި ކަޕޫރު ބައިވެރިވެ އެވެ. މި ޝޯގެ ކަންތައްތައް އިންތިޒާމްކުރަނީ މަޝްހޫރު ޕްރޮޑިއުސަރު-ޑައިރެކްޓަރު ކަރަން ޖޯހަރް އެވެ.