25 ނޮވެމްބަރ 2018 - 12:03
އިސްލާމިކް މިނިސްޓްރީ އަބަދުވެސް އޮންނާނީ އިލްމުވެރިންނާ އެކުގައި ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ރޭ ވިދާޅުވެއްޖެ އެވެ.
ރާއްޖޭގެ ދީނީ އިލްމުވެރިންނާ އެކު އިސްލާމިކް މަރުކަޒުގައި ބޭއްވި ބައްދަލުވުމުގައި ވާހަކަ ދައްކަވަމުން މިނިސްޓަރު ވިދާޅުވީ އެ މިނިސްޓްރީގެ އެންމެ ބޮޑު ސަމާލުކަމެއް ދޭނީ ދީނީ އިލްމުވެރިންގެ ލަފަ އާއި އިރުޝާދާ އެކު ރާއްޖޭގެ ދީނީ ކަންކަން ރަނގަޅުކުރަން ކަމަށެވެ.
"އިސްލާމިކް މިނިސްޓްރީ އަބަދުވެސް ވާނީ އިލްމުވެރިންނާ އެކުގައި. އިލްމުވެރިންނަށް ދިމާވާ ކޮންމެ ކަމެއްގައި ވެސް އަޅުގަނޑުމެން އެހީތެރިވެދޭނަން،" މިނިސްޓަރު ވިދާޅުވި އެވެ.
ރޭގައި ބޭއްވި ބައްދަލު ކުރެއްވުމުގައި މިނިސްޓަރު ވަނީ ދީނީ ކަންކަން ކުރިއެރުވުމަށްޓަކައި ކުރެވިދާނެ މަސައްކަތްތަކާ ގުޅޭ ގޮތުން އިލްމުވެރިންގެ ހިޔާލު ވެސް ހޯއްދަވައިފަ އެވެ.
މިއީ މިނިސްޓަރުގެ ހައިސިއްޔަތުން ޒާހިރު ދީނީ އިލްމުވެރިންނާ ބައްދަލުކުރެއްވި ފުރަތަމަ ފަހަރެވެ. މީގެ ކުރިން ވަނީ އެ މިނިސްޓްރީގެ ބެލުމުގެ ދަށުން ހިނގާ މުއައްސަސާތަކުގެ މުއައްޒަފުންނާ ބައްދަލުކުރައްވާފަ އެވެ.
އައު އިސްލާމިކް މިނިސްޓަރު ޒާހިރަކީ ދީނީ އިލްމުން ޕީއެޗުޑީ ހާސިލް ކުރައްވާފައިވާ އަދި އިސްލާމިކް މިނިސްޓްރީގައި މަސައްކަތް ކުރައްވާތާ ގިނަ ދުވަސްތަކެއް ވެފައިވާ ބޭފުޅެކެވެ.