26 ނޮވެމްބަރ 2018 - 12:21
މުމްބާއީ (ނޮވެމްބަރު 26) - މުމްބާއީ އަށް 2008 ވަނަ އަހަރު ދިން ޓެރަރިސްޓް ހަމަލާ އަށް މިއަދު 10 އަހަރު ފުރުނު އިރު ހަމާލާގެ ފަހަތުގައިވާ މީހުން ހޯދަން އެމެރިކާ އިން ފަސް މިލިއަން ޑޮލަރު ހުށަހަޅައިފި އެވެ.
މުމްބާއީ އަށް ދިން 60 ގަޑިއިރުގެ ހަމަލާގައި 166 މީހުން ވަނީ މަރުވެ އެތައް ބަޔަކު ޒަޚަމްވެފަ އެވެ.
"މުމްބާއީ ހަމަލާ އަށް 10 އަހަރު ވެގެން ދިޔައިރު ހަމަލާގެ ފަހަތުގައިވާ މީހުން ހޯދައި އެ މީހުންނަށް އަދަބު ނުދެވުމަކީ ހަމަލާގައި މަރުވި މީހުންގެ އާއިލާތަކަށް އުފުލަން ޖެހުނު އިތުރު ހިތާމައެއް،" އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވި އެވެ. "މި ޓެރަރިސްޓް ހަމަލާގައި ޒިންމާވާ މީހުން ޚާއްސަކޮށް ލަޝްކަރެ ތައިބާ ފަދަ ޖަމާއަތްތަކުގެ ވެރިންނާ ދެކޮޅަށް ފިޔަވަޅު އަޅަން ގޮވާލަން."
މުމްބާއީ ހަމަލާގައި މަރުވި މީހުންގެ ތެރޭގައި އެމެރިކާގެ ހަ މީހުން ވެސް ހިމެނެ އެވެ.
ސްޓޭޓް ޑިޕާޓްމަންޓުގެ ރިވޯޑްސް ޖަސްޓިސް ޕްރޮގްރާމް އިން ބުނެފައި ވަނީ މުމްބާއީ ހަމަލާގެ ފަހަތުގައިވާ މީހުން ހޯދުމަށް މަގު ފަހިވާ ފަދަ މައުލޫމާތެއް ދިން މީހަކަށް ފަސް މިލިއަން ޑޮލަރު ހުށަހަޅާފައިވާ ކަމަށެވެ. މިއީ ސްޓޭޓް ޑިޕާޓްމަންޓުން ހުށަހެޅި މި ފަދަ ތިން ވަނަ އިނާމެވެ. މުމްބާއީ ހަމަލާގެ ފަހަތުގައިވާ ކަމަށް އެންމެ ބޮޑަށް ތުހުމަތުކޮށްފައިވާ ލަޝްކަރެ ތައިބާގެ ބާނީ ހާފިޒް މުހައްމަދު ސައީދުގެ ބޮލަށް ވަނީ 10 މިލިއަން ޑޮލަރު ކުރިން ހުށަހަޅައިފަ އެވެ. އަދި އެ ޖަމާއަތުގެ ސީނިއާ ލީޑަރެއް ކަމަށްވާ ހާފިޒް އަބްދުއްރަހުމާން މައްކީގެ ބޮލަށް ވަނީ ދެ މިލިއަން ޑޮލަރު ހުށަހަޅައިފަ އެވެ.
ޓެރަރިސްޓެއްގެ ގޮތުގައި އދ. އިން ވެސް ކަނޑައަޅާގައިވާ ހާފިޒް ސައިދު މިދިޔަ އަހަރު ފަހުކޮޅު ޕާކިސްތާނުން ހައްޔަރު ކުރުމަށް ފަހު ވަނީ ދޫކޮށްލައިފަ އެވެ. ހާފިޒް ސައިދު ބުނެފައި ވަނީ އޭނާ މިހާރު ހިންގާ ޖަމާއަތުއް ދައުވާ އަކީ ޗެރިޓީއެއް ކަމަށެވެ. ލަޝްކަރެ ތޮއިބާ އޭނާ އުފެއްދީ 1990 ގެ އަހަރުތަކުގަ އެވެ. ޖަމާއަތުއް ދައުވާ 2002 ވަނަ އަހަރު އޭނާ އުފެއްދީ ލަޝްކަރެ ތޮއިބާ މަނާކުރުމުންނެވެ. މި އަހަރު ޖުލައި އޮތް ޕާކިސްތާނުގެ އާއްމު އިންތިޚާބުގައި ހާފިޒް ސައިދުގެ ޗެރިޓީ ވާދަކުރި އެވެ. ނަމަވެސް އެއްވެސް ގޮނޑިއެއް ނުލިބެ އެވެ. އެކަމަކު އެ ޖަމާއަތަށް 435،000 ވޯޓު ލިބުނެވެ.