28 ނޮވެމްބަރ 2018 - 11:27
އިންޑިއާ ކަނޑުގެ ލީޑިން ބީޗް ރިސޯޓް އެވޯޑް ބ. އަތޮޅުގައި ތަރައްގީ ކޮށްފައިވާ ފިނޮޅު ބީޗް ރިސޯޓަށް ލިބިއްޖެ އެވެ.
ފިނޮޅު ރިސޯޓަށް އެ އެވޯޑް ހަވާލު ކުރީ ބާލީގެ އަނަޔާ އެންޑް ސްޕާ ރިސޯޓުގައި މި މަހު ބޭއްވި 12 ވަނަ އަހަރީ ވޯލްޑް ލަގްޒަރީ ހޮޓެލް އެވޯޑް ގާލާގަ އެވެ.
ބ. އަތޮޅުގައިވާ ޔުނެސްކޯ ވޯލްޑް ބަޔޮސްފިޔާގައި ހުންނަ ފިނޮޅު ރިސޯޓަކީ ބީޗް ވިލާ އާއި އޯވާ ވޯޓާ ވިލާ އެކުލަވާލައިގެން ޖުމްލަ 125 ވިލާއާ އެކު ތަރައްގީ ކޮށްފައިވާ ތަނެކެވެ. އަދި އެ ތަނަކީ އާއިލާތަކާއި ލޯބިވެރިންނަށް ހާއްސަ މާހައުލެއް ގާއިމްކޮށްފައިވާ ތަނެކެވެ.
އެ ތަނުގައި ޓޫރިސްޓުންނަށް އެކި ރަހަތަކުގެ ކެއުން ދިނުމަށް ހާއްސަ ތިން ރެސްޓޯރަންޓް ހުރެ އެވެ. އެގޮތުން ކްރެބް ޝެކް ރެސްޓޯރަންޓާއި ކަނުސަން އާއި ބާބާ ބީޗް ޑައިނާ ހިމެނެ އެވެ.
ވޯލްޑް ލަގްޒަރީ އެވޯޑަކީ 2006 ވަނަ އަހަރުން ފެށިގެން މަތީ ފެންވަރުގެ ހޮޓާތަކާ ރިސޯޓުތަކަށް ޓޫރިސްޓުންނާއި، ތަޖުރިބާކާރުން އެކުގައި ވޯޓުލުމަށް ފަހު ދޭ އެވޯޑެކެވެ. އަދި އެ އެވޯޑްތައް ދިނުމުގައި ކޮންމެ އަހަރަކު 300،000 މީހުން ބައިވެރިވެ އެވެ.