09 ޑިސެމްބަރ 2018 - 16:51
ބެއިޖިން (ޑިސެމްބަރު 9) - ވާވޭ ކުންފުނީގެ އެގްޒެކެޓިވް މެންބަރެއް ކަމަށްވާ މެންގް ވަންޒޫ ދޫކޮށްލުމަށް ޗައިނާ އިން ކެނެޑާ އަށް ގޮވާލައިފި އެވެ.
ޗައިނާގެ ވައިސް ފޮރިން މިނިސްޓަރު ލެ ޔުޗެންގް ވަނީ ކެނެޑާގެ ސަފީރު ފޮރިން މިނިސްޓްރީ އަށް ހާޒިރުކޮށް އެކަމުގެ ޝަކުވާ ހުށަހަޅައިފަ އެވެ. ޗައިނާގެ ފޮރިން މިނިސްޓްރީން ބުނެފައި ވަނީ ވަންޒޫ ހައްޔަރު ކުރުމަކީ އެއްވެސް ގޮތަކުން ބަލައިގަނެވޭނެ ކަމެއް ނޫން ކަމަށެވެ.
ވާވޭގެ ޗީފް ފައިނޭންޝަލް އޮފިސަރު އަދި ކުންފުނީގެ ބާނީގެ އަންހެން ދަރިފުޅުގެ މައްޗަށް ތުހުމަތު ކޮށްފައި ވަނީ އޮޅުވާލައިގެން އީރާނާ އެކު ވިޔަފާރި ކުރުމެވެ. މި މަހު 1 ވަނަ ދުވަހު ވެންކޫވާ ސިޓީން ހައްޔަރު ކުރި ވަންޒޫ ހަވާލު ކުރުމަށް އެމެރިކާ އިން ދަނީ ޑިމާންޑް ކުރަމުންނެވެ. ކުށް ސާބިތުވެއްޖެ ނަމަ ވަންޒޫގެ މައްޗަށް 30 އަހަރުގެ ޖަލު ހުކުމެއް އައުން އެކަށީގެންވެ އެވެ.
ވަންޒޫގެ މައްޗަށް ތުހުމަތުކޮށްފައި ވަނީ އެމެރިކާގެ ބޭންކްތަކަށް މަކަރު ހަދައިގެން ވާވޭގެ ސަބްސިޑަރީ ކުންފުންޏެއް މެދުވެރިކޮށް އީރާނާ އެކު ވިޔަފާރިކުރުމެވެ. ކެނެޑާގެ ވަކީލް ބުނެފައި ވަނީ ވާވޭ އާއި ސްކައިކޮމްއާ އެއްވެސް ގުޅުމެއް ނޯންނަ ކަމަށް އެމެރިކާގެ ބޭންކްތަކަށް ވަންޒޫ އަންގާފައިވާ ކަމަށެވެ. އެކަމަކު ސްކައިކޮމް އަކީ ވާވޭ ކަމަށް ވަކީލް ވަނީ ކޯޓުގައި ބުނެފަ އެވެ.
ޗައިނާ އިން ބުނަމުން ދަނީ ގާނޫނާ ޚިލާފު އެއްވެސް ކަމެއް ވަންޒޫ ކޮށްފައި ނުވާ ކަމަށެވެ. ވަންޒޫގެ ބަންދާ މެދު ކޯޓުން މާދަމާ ވަކި ގޮތެއް ނިންމާނެ އެވެ.
ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވިދާޅުވެފައި ވަނީ ވަންޒޫ ހައްޔަރު ކުރުމުގެ ފަހަތުގައި ސިޔާސީ އެއްވެސް ކަމެއް ނެތް ކަމަށެވެ.