13 ޑިސެމްބަރ 2018 - 10:59
މެޑްރިޑް (ޑިސެމްބަރު 13) – އިންޓަ މިލާނުގެ ކެޕްޓަން އަދި އާޖެންޓީނާ ފޯވާޑް މައުރޯ އިކާޑީ ހޯދުމަށް ރެއާލް މެޑްރިޑުން އަލުން ޝައުގުވެރިކަން ފާޅުކޮށްފި ކަމަށް ރިޕޯޓްތައް ބުނެފި އެވެ.
އިންޓަގެ ކުރިމަގާ ގުޅިފައިވާ މި ކުޅުންތެރިޔާ ވިއްކާލަން އެ ޓީމުން ވަރަށް ބޮޑަށް ދެކޮޅު ހަދާނެ ކަމަށް ބެލެވެ އެވެ. އެކަމަކު އެ ޓީމާ އެކު އޭނާ ހަދާފައިވާ ކޮންޓްރެކްޓް 110 މިލިއަން ޔޫރޯ ދައްކައިގެން އުވާލެވޭނެ ކަމަށް ރިޕޯޓްތައް ބުނެ އެވެ.
ކްރިސްޓިއާނޯ ރޮނާލްޑޯ ދިއުމުން ބަލިކަށިވެފައިވާ ރެއާލް މެޑްރިޑުގެ ފޯވާޑް ލައިން ވަރުގަދަކުރަން އެ ޓީމުން އެވަރުގެ އަދަދެއް ހޭދަކޮށްފާނެ އެވެ. ކުޅުންތެރިންގެ އަގުތައް މިވަގުތު ހުރި ހިސާބަށް ބަލާއިރު އެއީ ނިސްބަތުން، ބޮޑު އަގެއް ނޫނެވެ.
އިކާޑީ މޮޅު ކުޅުމެއް ދެއްކި ނަމަވެސް ޗެމްޕިއަންސް ލީގުގެ ގްރޫޕް ސްޓޭޖުން އިންޓަ ކަޓާފައިވާތީ އޭނާ ވިއްކާލަން ޖެހިދާނެ ކަމަށް ބައެއް ފަރާތްތަކުން ގަބޫލުކުރެ އެވެ.
ބާސެލޯނާގެ ޔޫތު ޓީމުން ފާހަގަކުރެވުނު އިކާޑީ އިޓަލީ އަށް ބަދަލުވެ އެންމެ ފުރަތަމަ ކުޅުނީ ސަމްޕްޑޯރިއާ އަށެވެ. އިންޓަ އަށް ބަދަލުވެ އޭނާ އަންނަނީ ތަފާތު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ޓީމަށް 200 މެޗުން 119 ގޯލް ޖަހައިދީފަ އެވެ. މި އަހަރުގެ އިޓަލީގެ މޮޅު ކުޅުންތެރިޔާގެ މަގާމް ވެސް ހޯދީ އޭނާ އެވެ.