17 ޑިސެމްބަރ 2018 - 12:02
އެމްޓީސީސީގެ ތިން ވަނަ ކުއާޓާގެ ސާފު ފައިސާ ވަރަށް ބޮޑުތަނުން ދަށަށް ހިނގައްޖެ އެވެ.
އެމްޓީސީސީން އާންމުކޮށްފައިވާ ތިން ވަނަ ކުއާޓާގެ މާލީ ތަފާސްހިސާބުތަކަށް ބަލާއިރު އެ ކުންފުންޏަށް ސާފު ފައިދާގެ ގޮތުގައި ލިބިފައިވަނީ 327،963ރ. އެވެ. މިދިޔަ އަހަރުގެ ތިން ވަނަ ކުއާޓާގައި ސާފު ފައިދާގެ ގޮތުގައި 17.4 މިލިއަން ރުފިޔާ ލިބިފައިވެ އެވެ. އެހެންވެ އެއީ 98 ޕަސެންޓްގެ ދަށްވުމެއް، ނުވަތަ 17 މިލިއަން ރުފިޔާގެ ފަރަގެކެވެ. މި އަހަރުގެ ދެވަނަ ކުއާޓާގައި ސާފު ފައިދާގެ ގޮތުގައި 13 މިލިއަން ލިބިފައިވެ އެވެ.
އެމްޓީސީސީގެ ތިން ވަނަ ކުއާޓާގައި ކުންފުންޏަށް އާމްދަނީގެ ގޮތުގައި 308 މިލިއަން ރުފިޔާ ލިބިފައިވާ އިރު މިދިޔަ އަހަރުގެ މި މުއްދަލުގައި ލިބިފައިވަނީ 264 މިލިއަން ރުފިޔާ އެވެ. މި އަހަރުގެ ތިން ވަނަ ކުއާޓާގެ އާމްދަނީ އިތުރުވި ނަމަވެސް ކުންފުނީގެ ހަރަދު ވަނީ ވަރަށް ބޮޑަށް އިތުރުވެފަ އެވެ. އެގޮތުން މިދިޔަ އަހަރުގެ ތިން ވަނަ ކުއާޓާއާ އަޅާ ބަލާ އިރު ކުންފުނީގެ "ކޯސްޓް އޮފް ސޭލް" ވަނީ 55 މިލިއަން ރުފިޔާ އިތުރުވެފަ އެވެ. އެއާ އެކީ އެއަދަދު ވަނީ 264 މިލިއަން ރުފިޔާ އަށް އަރައިފަ އެވެ.
މީގެ އިތުރުން ތިން ވަނަ ކުއަޓާގައި ފައިނޭންސް ކޮސްޓުގެ ގޮތުގައި 11 މިލިއަން ހޭދަކޮށްފައިވެ އެވެ. މިދިޔަ އަހަރުގެ މި މުއްދަތުގައި ފައިނޭންސް ކޯސްޓުގެ ގޮތުގައި ހޭދަކޮށްފައި ވަނީ ތިން މިލިއަން ރުފިޔާ އެވެ. ކުންފުނީގެ އިދާރީ ހިންގުމުގެ ހަރަދުގެ ގޮތުގައި 35 މިލިއަން ރުފިޔާ ވަނީ ހަރަދުކޮށްފަ އެވެ.
ކުންފުނީގެ އާމްދަނީ ތިން ވަނަ ކުއާޓާގެ ފައިދާ 98.11 ޕަސެންޓަށް ވެއްޓިފައިވާ އިރު އެ ކުންފުނިން ވަނީ 29 މަޝްރޫއުއެއް މި މުއްދަތުގައި ފަށައިފަ އެވެ. މިހާރު ކުރިއަށްދާ މަޝްރޫއުގެ ތެރޭގައި ސޯމިލް އެހެން ތަނަކަށް ބަދަލުކޮށް ތަރައްގީ ކުރުމުގެ މަޝްރޫއު އާއި ކ. ތިލަފުށީގެ ބިން ހިއްކުމާއި ތޮށިގަނޑު ލުމުގެ މަޝްރޫއު އާއި ގދ. ފަރެސްމާތޮޑާގެ ބިން ހިއްކުމުގެ މަޝްރޫއު އާއި ހއ. މާފިނޮޅުގެ ބިން ހިއްކުމުގެ މަޝްރޫއު އާއި ކ. ހުރާގެ ބިން ހިއްކުމުގެ މަޝްރޫއު ހިމެނެ އެވެ.
އެ ކުންފުނީގައި 1830 މުވައްޒަފުން މަސައްކަތް ކުރަމުންދާއިރު މިދިޔަ ހަތަރު މަސްދުވަހުގެ ތެރޭގައި އެމްޓީސީސީ އަށް 114 މުވައްޒަފުން ވަނީ އިތުރުވެފައިވެ އެވެ. މިއީ ދެވަނަ ކުއާޓާއާ އަޅާ ބަލާއިރު 4.8 ޕަސެންޓްގެ އިތުރުވުމެކެވެ. މި މުއްދަތުގައި އެމްޓީސީސީގެ ޗީފް އެކްޒެކެޓިވް އޮފިސަރުގެ މަގާމުގައި ހުންނެވީ އަބްދުﷲ ޒިޔަތެވެ.
އެމްޓީސީސީގެ ތިން ވަނަ ކުއާޓާގައި އެ ކުންފުނީގެ މާލީ ހާލަތު އިންތިހާ އަށް ދަށްވެފައިވާ އިރު ކުރީގެ ރައީސް އަބްދުﷲ ޔާމީންގެ ސަރުކާރުގައި ސަރުކާރު ހިއްސާވާ ކުންފުނިތަކުން ސިޔާސީ މަސައްކަތްތަކުގައި އެކްޓިވްކޮށް އުޅުމާއި ސިޔާސީ މަސައްކަތްތަކަށް ހަރަދުކުރާ ކަމަށް ބުނެ ބޮޑެތި ތުހުމަތުތަކެއް ކުރެވިފައިވެ އެވެ. އެގޮތުން އެޗްޑީސީން ޕީޕީއެމްގެ ކެމްޕެއިނަށް 30 މިލިއަނަށް ވުރެ ބޮޑު ހަރަދެއް ކޮށްފައިވާކަން ވަނީ ފަޅާއަރާފަ އެވެ. އެކަމާ ގުޅިގެން އޮޑިޓް އޮފީހުން ވެސް ވަނީ ހާއްސަ އޮޑިޓެއްގެ މަސައްކަތް ފަށައިފަ އެވެ.