05 ޖެނުއަރީ 2019 - 15:32
ތެލް އަވީވް (ޖެނުއަރީ 5) - ޖޯޑަންގެ ޕްރޮފެޝަނަލް ޔޫނިއަންސް އެސޯސިއޭޝަނުގެ ވަދެ ނުކުމެވާ ކޮންމެ ދޮރެއްގައި ފައިފުއްސަކަށް އިޒްރޭލުގެ ދިދަ ބާއްވަން ނިންމާފައިވާ ކަމަށް އިޒްރޭލުގެ ހާރެޒް ނޫހުން ބުނެފި އެވެ.
ޕްރޮފެޝަނަލް ޔޫނިއަން އިން އެ ގޮތަށް ނިންމާފައި ވަނީ ނޫހުން ބުނި ގޮތުގައި، ޖޯޑަންގެ އިންފޮމޭޝަން މިނިސްޓަރު ޖުމާނާ ޣުނައިމަތު އިޒްރޭލުގެ ދިދަ އަކަށް ފައިން އަރުއްވައިގެން އައްމާނުގެ އިންޖިނިއާސް ޔޫނިއަން އިމާރާތުގައި ހުންނެވި ފޮޓޯއެއް އާއްމުވުމާ ގުޅިގެން އިޒްރޭލް އިން އެކަމުގެ ޝަކުވާ ޖޯޑަންގެ ފޮރިން މިނިސްޓްރީ އަށް ހުށަހެޅުން އެކަމަށް ރައްދު ދިނުމުގެ ގޮތުން ކަމަށެވެ.
އިޒްރޭލުން ބުނެފައި ވަނީ އެއީ ވަރަށް އިހްތިރާމް ކުޑަވާ ގޮތަށް ނަގާފައިވާ ފޮޓޯއެއް ކަމަށެވެ. އަދި އެކަން ހިނގި ގޮތް ސާފު ކުރަން އިޒްރޭލުން ވަނީ ޖޯޑަންގެ މަންދޫބު ފޮރިން މިނިސްޓްރީ އަށް ހާޒިރުކޮށްފަ އެވެ.
ޖޯޑަންގެ ފޮރިން މިނިސްޓްރީގެ ތަރުޖަމާނަކު ވިދާޅުވެފައި ވަނީ އިޒްރޭލުގެ ދިދަ އަށް ފައިން އެރި މައްސަލަ "ޑިޕްލޮމެޓިކް ޗެނަލްތައް" މެދުވެރިކޮށް ހައްލު ކުރަމުންދާ ކަމަށެވެ. އަދި އިންޖިނިއާސް ޖޫނިއަން އަކީ ސަރުކާރުގެ އިމާރާތެއް ނޫން ކަމަށް ވެސް ތަރުޖަމާން ވިދާޅުވި އެވެ.
ޔޫނިއަންގެ އޮފިޝަލުން ބުނެފައި ވަނީ ފައިފުހީގެ ގޮތުގައި އިޒްރޭލްގެ ދިދަ ބޭނުން ކުރަމުންދާތާ އެތައް އަހަރެއް ވެއްޖެ ކަމަށެވެ. އަދި އެގޮތަށް ކަންތައް ކުރަނީ ފަލަސްތީނުގެ ބިމުގައި އިޒްރޭލުން ހިންގާ އުދުވާނަށް އިހްތިޖާޖް ކުރުމަށް ކަމަށް ވެސް ބުނެފައިވެ އެވެ.
ޔޫނިއަންގެ އޮފީސްތަކުގެ ފައިފުހީގެ ގޮތުގައި އިޒްރޭލުގެ ދިދަ ބެހެއްޓުމުން ޖޯޑަންގެ ގާނޫނު ހަދާ މަޖިލީހުގެ ނައިބް ރައީސް ވަނީ ޕްރޮފެޝަނަލް ޔޫނިއަން އަށް ޝުކުރު އަދާކުރައްވައިފަ އެވެ. އަދި ޓްރޭޑް ޔޫނިއަންގެ ވަންނަ ދޮރުގައި ފައިފުހީގެ ގޮތުގައި އޮންނަ އިޒްރޭލުގެ ދިދަ އަށް އޭނާ ވެސް ފައިން އަރުއްވާނެ ކަމަށް ވިދާޅުވި އެވެ.
ޖޯޑަންގެ ޕްރޮފެޝަނަލް ޔޫނިއަން އެސޯސިއޭޝަންގެ ދަށުން 14 ޔޫނިއަން އޮފީސް ހިންގަ އެވެ. ޔޫނިއަންތަކުގެ މެންބަރުންގެ ގޮތުގައި 180،000 މީހުން ތިބެ އެވެ. އަދި އެ މީހުންނަކީ ޖޯޑަން އިން އިޒްރޭލާ ގުޅުން ބަދަހި ކުރަން ދެކޮޅު ހަދާ ބަޔެކެވެ.