22 އޯގަސްޓް 2016 - 10:26
ސާފް ޗެމްޕިއަންޝިޕް ކުރި ގައުމީ ޓީމާއި މިހާރުގެ ގައުމީ ފުޓްބޯޅަ ޓީމު މި މަހު 29 ގައި ކުޅޭ ހާއްސަ މެޗުގައި، ސާފް ޗެމްޕިއަންޝިޕް ކުރި ޓީމަށް، އާޖެންޓީނާ ގައުމީ ޓީމުގެ ކުރީގެ ޑިފެންޑަރު ރޮބާޓޯ އަޔާލާ ކުޅޭ ގޮތަށް ހަމަޖެހިއްޖެ އެވެ.
އެފްއޭއެމުން ބުނީ އެ އެސޯސިއޭޝަނުގެ ދައުވަތު އަޔާލާ، 43، ގަބޫލުކޮށްފައިވާ ކަމަށާއި މި ހާއްސަ މެޗުގައި އޭނާގެ ކުޅުން ގަލޮޅު ދަނޑުން ފެންނާނެ ކަމަށެވެ.
އެފްއޭއެމްގެ ރައީސް އަހުމަދު ތޯރިގް (ޓޮމް) ވިދާޅުވީ ރާއްޖޭގައި ފުޓްބޯޅަ ކުރިއަރުވައި، ދިވެހި ފުޓްބޯޅަ އަލުން ކޮޅަށް ޖަހަން އެފްއޭއެމުން ކުރަމުން އަންނަ މަސައްކަތަށް ފީފާގެ ރައީސް ޖިއާނީ އިންފަންޓީނޯ އާއި އޭއެފްސީ އަދި ގަތަރުން ދެމުން އަންނަ އެހީތެރިކަމަށް ޝުކުރުއަދާކުރާ ކަމަށެވެ.
ރާއްޖޭން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރިތާ 8 އަހަރު ފުރުން ފާހަގަކުރުމަށް ކުޅޭ މި މެޗުގައި ސާފް ޗެމްޕިއަންޝިޕް ކާމިޔާބުކުރި ޓީމަށް، އެ މުބާރާތުގައި ގައުމީ ޓީމަށް ކުޅުނު ހުރިހާ ކުޅުންތެރިން ކުޅޭނެ އެވެ. މިހާރުގެ ގައުމީ ޓީމުގައި ހިމެނޭ ކެޕްޓަން އަލީ އަޝްފާގް (ދަގަނޑޭ) އާއި ގޯލްކީޕަރު އިމްރާން މުހައްމަދު ވެސް ކުޅޭނީ އެ ޓީމަށެވެ. މީގެ އިތުރުން އެ ފަހަރު ގައުމީ ޓީމަށް ކޯޗުކޮށްދިން ސްލޮވާކިއާގެ ޖޯސެފް ޔަންކޭޒް އެ މެޗުގައި ކޯޗުކޮށްދޭނެ އެވެ.
އާޖެންޓީނާ ގައުމީ ޓީމަށް 1994 އިން 2007 އަށް 115 މެޗު ކުޅެދީފައިވާ އަޔާލާ ވަނީ 1998، 2002 އަދި 2006 ވަނަ އަހަރުގެ ވޯލްޑް ކަޕުގައި ކުޅެފަ އެވެ. މީގެ އިތުރުން އޭނާ ވަނީ އެތެންސްގައި 2004 ވަނަ އަހަރު ބޭއްވި އޮލިމްޕިކްސްގެ ރަން މެޑަލް ހޯދި އާޖެންޓީނާ ޓީމުގައި ވެސް މުހިއްމު ދައުރެއް އަދާކޮށްފަ އެވެ. އަދި 1996 ވަނަ އަހަރުގެ އެޓްލާންޓާ އޮލިމްޕިކްސްގައި އާޖެންޓީނާ އިން ރިހި މެޑަލް ހޯދިއިރު ވެސް އަޔާލާ ކުޅުނެވެ.
ކްލަބް ކެރިއަރުގައި އޭނާ ވަނީ އާޖެންޓީނާގެ ރިވަޕްލޭޓާއި އިޓަލީގެ އޭސީ މިލާނާއި ނަޕޯލީ އާއި ސްޕެއިނުގެ ވެލެންސިއާ އާއި ވިޔަރެއާލް އަދި ރެއާލް ޒަރަގޯޒާ އަށް ކުޅެފަ އެވެ. މިލާނަށް 1998 އިން 2000 ވަނަ އަހަރުގެ ނިޔަލަށް ކުޅެ އޭނާ އެ ޓީމާ އެކު އިޓާލިއަން ލީގު ކާމިޔާބުކުރިއިރު ވެލެންސިއާއާ އެކު 2002 އަދި 2004 ވަނަ އަހަރު ސްޕެނިޝް ލީގު ހޯދި އެވެ. މީގެ އިތުރުން ރަފައެލް ބެނިޓޭޒްގެ ކޯޗުކަމުގެ ދަށުން ވެލެންސިއާ އިން 2004 ވަނަ އަހަރުގެ ޔުއެފާ ކަޕް ކާމިޔާބުކުރިއިރު އޭނާ މޮޅު ކުޅުމެއް ދެއްކި އެވެ.