21 ޖެނުއަރީ 2019 - 14:14
ބޭރޫތު (ޖެނުއަރީ 21) - އަރަބި ގައުމުތަކުގެ ރެފިއުޖީން އެ މީހުންގެ ވަޒަނަށް ގެންދިއުމަށް ލުބުނާނުގައި އިއްޔެ ފެށި އަރަބި އިކޮނޮމިކް ސަމިޓްގައި ގޮވާލައިފި އެވެ.
އެކަމަކު ހަތަރު ވަނަ އަރަބި އިކޮނޮމިކް އެންޑް ސޯޝަލް ޑިވެލޮޕްމަންޓް ސަމިޓްގައި ގިނަ އަރަބި ގައުމުތަކުން ބައިވެރިއެއް ނުވެ އެވެ. ލީބިއާ އިން ވަނީ ސަމިޓް ބޮއިކޮޓް ކޮށްފަ އެވެ. ލުބުނާނުގެ ވެރިން ފިޔަވައި ސަމިޓް ހުޅުވުމުގެ ރަސްމިއްޔާތުގައި ބައިވެރިވެވަޑައިގެންނެވީ ގަތަރުގެ އަމީރު ޝެއިޚް ތަމީމް ބިން ހަމަދު އައް ސާނީ އާއި މޮރިޓޭނިއާގެ ރައީސް މުހައްމަދު ގުލްދު އަބްދުލްއަޒީޒް އެވެ. ރެފިއުޖީންގެ މައްސަލަ ސަމިޓުގެ އެޖެންޑާގައި ހިމަނާފައި ވަނީ ލުބުނާނުން ހުށަހެޅުމުންނެވެ.
ސީރިއާގެ މަދަނީ ހަނގުރާމަ ފެށި ފަހުން އެ ގައުމުގެ އެތައް މިލިއަން ރެފިއުޖީން ވަނީ ލުބުނާނަށް ހިޖުރަކޮށްފަ އެވެ. ސީރިއާގެ ގާތްގަނޑަކަށް 5.6 މިލިއަން ރެފިއުޖީން އެކި ގައުމުތަކުގައި އުޅެ އެވެ. ރެފިއުޖީން ދިރިއުޅެނީ ވަރަށް ނިކަމެތި ހާލުގަ އެވެ. މީގެ ތެރޭން 1.5 މިލިއަން ރެފިއުޖީން ދިރިއުޅެނީ ލުބުނާނުގަ އެވެ. އަރަބި ލީޑަރުން ވަނީ ރެފިއުޖީން އަނބުރާ ގެންދިއުމުގައި ބައިނަލްއަގުވާމީ މުޖްތަމައުގެ އެހީތެރިކަމަށް އެދިފަ އެވެ.