26 އޯގަސްޓް 2016 - 07:04
އިސްމާއީލް ވަޖީހަކީ ރާއްޖޭގައި އުފެދުނު އެންމެ ކާމިޔާބު އެއް އެކްޓަރެވެ. އިހުސާސް، ޗުއްޓީ، ރިހުން، ކުލުނު، މާޒީ އަދި ރަންމުތް އެއީ އޭނާގެ ފާހަގަކޮށްލެވޭ ބައެއް ފިލްމުތަކެވެ.
ވަޖީހަކީ ބޮލީވުޑްގެ ބަތަލާއަކާ އެކު އެންމެ ފުރަތަމަ ލަވައެއް ކުޅުނު ދިވެހި އެކްޓަރު ވެސް އެވެ. އެއީ "ރަންމުތު" ގައި ރާޖޭޝްވަރީއާ އެކުގަ އެވެ. ވަޖީހު އޭނާގެ އެންމެ ރަން ޒަމާނުގައި ރާއްޖޭގެ މަޝްހޫރު ހުރިހާ ބަތަލާއިންނާ އެކުހެން މަސައްކަތްކޮށްފައިވެ އެވެ.
ފިލްމީ ދާއިރާއިން މިހާރު ވަޖީހު ނުފެނެ އެވެ. ދިރިއުޅުން މިހާރު އޮތީ ސިންގަޕޫރުގަ އެވެ. މިހާރު އެ ތަނުގައި އުޅޭތާ 15 އަހަރުވެއްޖެ އެވެ. ފަސް ދަރިން ވެސް އެބަ ތިއްބެވެ. އެއީ ތިން ފިރިހެން ކުދިންނާއި ދެ އަންހެން ކުދިންނެވެ. ދޮށީ ފިރިހެން ދަރިފުޅުގެ އުމުރުން 27 އަހަރެވެ. ހަގު އަންހެން ދަރިފުޅުގެ އުމުރުން ނުވަ އަހަރެވެ.
ދިވެހިންނާ ދުރުގައި ވަޖީހު އުޅުނަސް އޭނާގެ ހަނދާންތައް ދިވެހިންނާ ވައްކެއް ނުވާނެ އެވެ. ވަޖީހް ކުޅެފައިވާ ވީޑިއޯ ލަވަތަކާއި ފިލްމުތަކާއި ޑްރާމާތައް އަބަދު ވެސް ދިވެހިންނަށް ފެންނާނެ އެވެ.
ވަޖީހު ވެސް ބުނީ ރާއްޖޭން ބޭރުގައި އުޅުނަސް ރާއްޖެ މަތިން އަބަދު ވެސް ހަނދާންވާ ކަމަށެވެ. އެކަމަކު އަލުން ރާއްޖެ އަށް ދިރިއުޅުން ބަދަލު ކުރުމުގެ ވިސްނުމެއް ނެތެވެ.
"ރާއްޖޭގައި އުޅެ ބޮޑުވި މީހަކު ކޮންމެ ތާކު ހުއްޓަސް ރާއްޖެ މަތިން ހަނދާންވާނެ ދޯ؟ ރައްޓެހިން އާއިލާ މަތިން ވަޒީފާ މިހެން ގޮސް ހުރިހާ ކަމެއް ވެސް އަބަދު ހަނދާންވޭ،" އޭނާ ބުންޏެވެ. "އަސްލު މަގޭ އައިޑެންޓިޓީ އޮތީ ރާއްޖޭގައޭ ބުނަނީ އައިޑީ ކާޑުގެ ވާހަކައެއް ނޫން. ޖޭއެސް [ޖަމާލުއްދީން ސްކޫލް] ގެ އެކްޓިން ޕްރިންސިޕަލް، އިސްމާއީލް ވަޖީހު، ވަޖީހުބެ، ހަބަރު ކިޔާ ވަޖީހު. މިކަހަލަ އައިޑެންޓިޓީ."
އޭނާ ބުނީ ސިންގަޕޫރަށް ދިރިއުޅުން ބަދަލު ކުރި ފަހުން ވެސް ފިލްމް ކުޅެން ފުރުސަތުތަކެއް ލިބުނު ކަމަށެވެ. އެހެން ނަމަވެސް ވަގުތު ދެވެން ނެތުމުން އެ ފުރުސަތުތައް ދޫކޮށްލީ އެވެ.
އެކަމަކު ވަޖީހުގެ ފޭނުންނަށް އުންމީދެއް އެބަ އޮތެވެ. އަދިވެސް އޭނާ ފިލްމަކުން ނުވަތަ ލަވައަކުން ފެނުމަކީ ވެދާނެ ކަމެއް ކަމަށް ބުންޏެވެ.
"ފިލްމަކުން ވެސް ލަވަޔަކުން ވެސް ނުފެންނާނެއެކޭ ނުބުނާނަން. އަބަދު ވސް އުންމީދު ކުރުމަކީ އެއީ. އިންތިޒާރުގަ މިހާރު ވެސް،" ވަޖީހު ބުންޏެވެ.
ފިލްމީ ކެރިއަރުގެ އެންމެ ރަން ޒަމާނުގައި ވަޖީހު ވަނީ އައިޝަތު ޝިރާނީ، ނިއުމާ މުހައްމަދު، ވަލީދާ ވަލީދު، ޖަމްޝީދާ އަހުމަދު، މަރިޔަމް ނާޒިމާ ފަދަ، އޭރުގެ މަޝްހޫރު ބަތަލާއިންނާ އެކު މަސައްކަތްކޮށްފަ އެވެ. ނަމަވެސް މަރިޔަމް ނިޝާ އެ ލިސްޓަކު ނުހިމެނެ އެވެ. އެ ސަބަބާ ބެހޭ ގޮތުން އެކި ފަހަރުމަތިން އޭނާ އަށް ސުވާލުތައް ކުރިމަތިވެ އެވެ.
"އެ ސުވާލަށް ވަރަށް ކުރިން ވެސް ވާނީ ޖަވާބު ދީފައި. ދެން އެހާ ދުވަސް ފަހުން އަނެއްކާ އެ ވާހަކަ ދައްކަން ބޭނުމެއް ނުވޭ،" އޭނާ ބުންޏެވެ.
ފިލްމީ މަސައްކަތްތައް މަތިން ވަޖީހު އަބަދު ވެސް ހަނދާންވެ އެވެ. އެކަމަކު ރާއްޖޭން ބޭރުގައި އުޅޭތީ މިހާރު ފިލްމީ ދާއިރާއާ ބެހޭ މާ ގިނަ މައުލޫމާތެއް އޭނާއަކަށް ނޭނގެ އެވެެ. އަނެއްކޮޅުން ފިލްމީ ދާއިރާގައި މިހާރު ތިބި ތަރިން ވެސް އޭނާ އަށް ވަރަށް ބީރައްޓެހި އެވެ.
"ފިލްމީ ދާއިރާގެ ކަންކަން އެހާ ބަލައެއް ނޫޅެވޭ. ފަހުގެ ލަވަތަކުން ވެސް ގިނަވާނީ ނުފެންނަ ލަވަތައް. އެކަމަކު ޑާކް ރެއިން އެންޓަޓައިންމަންޓްގެ ހަބަރުތައް ހަމަ ބަރާބަރަށް ލިބޭ މުހައްމަދު އަލީ (މޮގާ) ގެ ފަރާތުން. އެއީ އޮންނަ ގާތް ކަމަކުން ވަރަށް ކުރިއްސުރެ ވެސް،" އެސްޓީއޯގެ ސިންގަޕޫރު އޮފީހުގައި މި ވަގުތު ވަޒީފާ އަދާކުރަމުން އަންނަ ވަޖީހު ބުންޏެވެ. "މިހާރު އުޅޭ ކުދިން ނުވެސް ދަންނަން. ދެން ކިހިނެއް ކަމުނުދާ ވެސް އެނގޭނީ. ޖުމައްޔިލް ނިމާލްގެ ބައެއް ލަވަތަކާއި ބައެއް އެކްޓިން ޝޮޓްތައް ފެނިފައި ހުރީ. ވަރަށް ކަމުދޭ. ދެން އެހެން ކުއްޖަކާ ދޭތެރޭ އެއްޗެއް ބުނާކަށް ނޭނގޭ ފެނިފައި ނެތީމަ."
ވަޖީހަކީ ސްކްރީނާ ދުރުގައި ހުއްޓަސް އަދިވެސް ހަށިގަނޑަށް ވަރަށް ބޮޑަށް ބަލައިގެން އުޅޭ މީހެކެވެ. އެހެންވެ އުމުރުން ދުވަސްވިޔަސް އެ ތަފާތެއް ނުފެނެ އެވެ. އޭނާ ހުންނަނީ ވަރަށް ފިޓްކޮށެވެ.
"ފިޓްނެސް އެއީ މަގޭ ޕެޝަން. ފިޓްކޮށް ފެންނަނީއެއް ނޫނޭ. ފިޓްކޮށް ހުންނަނީ،" ވަޖީހު ބުންޏެވެ. ކާއެއްޗެހި ނުހުންނާނެ ވަކި އެއާ ނުލައި ނޫޅެވޭ ވަރުގެ އެއްޗެއް. އާންމުކޮށް ހަމަ ސިއްހަތަށް ރަނގަޅު ކޮންމެ އެއްޗެއް ވެސް ކަން. ހާއްސަކޮށް މޭވާ އާއި ތަރުކާރީ އެންމެ ބޭނުން ވަނީ. އެކަމަކު ކާން އެހާ ފޯރިއެއް ނުހުރޭ."
އަބަދު ވެސް ފިލްމީ ދާއިރާގެ މީހުންނާއި ސިޔާސީ ދާއިރާ ވަރަށް ދޯޅެވެ. ރާއްޖޭން ބޭރުގައި ވެސް މިކަން އޮތް ގޮތަށް ރާއްޖޭގައި ވެސް އެ ފޯރި ކުޑައެއް ނޫނެވެ.
އެހެން ނަމަވެސް ވަޖީހު ބުނީ ސިޔާސީ ދާއިރާ އަށް އޭނާގެ އެއްވެސް ޝައުގުވެރި ކަމެއް ނެތް ކަމަށެވެ.
"ސިޔާސީ ދާއިރާއޭ. ނުފެންނާނެ. ސަތޭކަ ޕަސަންޓް،" އޭނާ ޔަގީންކަން ދިނެވެ.