14 ފެބުރުއަރީ 2019 - 10:19
ކޮލަމްބޯ (ފެބްރުއަރީ 14) - ސްރީ ލަންކާގައި މަރުގެ ހުކުމް ތަންފީޒް ކުރަންވާ އިރަށް މީހުން ދަންޖެއްސުމަށް ޖައްލާދުން ހޯދަން އެ ގައުމުން އިޝްތިހާރު ކުރަން ފަށައިފި އެވެ.
ލަންކާގައި މަރުގެ ހުކުމް ތަންފީޒް ކުރަން ފަށަނީ 40 އަހަރުގެ މެދުކެނޑުމަކަށް ފަހު އެވެ. ރައީސް މައިތުރިޕާލާ ސިރިސޭނާ މިދިޔަ ހަފުތާގައި ވިދާޅުވެފައި ވަނީ މަރުގެ ހުކުމް ތަންފީޒް ކުރަން ދެ މަހެއްހާ ދުވަސްތެރޭ ފަށާނެ ކަމަށެވެ.
ލަންކާގެ ނޫސްތަކުގައި ޖަހާފައިވާ އިޝްތިހާރުގައި ބުނެފައި ވަނީ ޖައްލާދުންގެ މަގާމަށް ކުރިމަތިލާ މީހުންގެ ޝަރުތުތަކުގެ ތެރޭގައި އެއީ ނަފްސާނީ ގޮތުން ވަރުގަދަ މީހަކަށް ވާން ޖެހޭނެ ކަމަށެވެ. ޖައްލާދުންގެ މަގާމަށް ނަގާ ދެ މީހުންނަކީ އުމުރުން 18-45 ދެމެދުގެ ސްރީ ލަންކާގެ ފިރިހެނުންނަށް ވާން ޖެހޭނެ ކަމަށް ވެސް ބުނެފައިވެ އެވެ.
"ހޮވާ ލެވޭ ކެންޑިޑޭޓުންގެ ނަފްސާނީ މައްސަލައެއް ހުރިތޯ ނޭޝަނަލް ހޮސްޕިޓަލްގައި ޗެކް ކުރެވޭނެ،" އިޝްތިހާރުގައި ބުނެފައިވެ އެވެ.
ޖައްލާދުންނަށް ހޮވޭ މީހުންނަށް މުސާރައިގެ ގޮތުގައި ދޭނީ މަހަކު 36،410 ރުޕީސް (208 ޑޮލަރު) އެވެ.
ސްރީ ލަންކާގައި އެންމެ ފަހުން މަރުގެ އަދަބު ތަންފީޒްކޮށްފައި ވަނީ 1976 ވަނަ އަހަރު އެވެ.
ލަންކާ ޕާލަމެންޓުގައި ވާހަކަ ދައްކަވަމުން ސިރިސޭނާ މިދިޔަ ހަފުތާގައި ވިދާޅުވީ މަސްތުވާތަކެތި ބޭނުން ކުރާ މީހުންނަށް މަރުގެ އަދަބު ދިނުން ހުއްޓުވޭނެ ގޮތެއް ނޯންނާނެ ކަމަށެވެ. ލަންކާގައި މަރުގެ ހުކުމް ތަންފީޒް ކުރަން އުޅޭތީ ސިރިސޭނާ އަށް ވަރަށް ބޮޑަށް ފިއްތުންތައް ކުރިމަތިކުރި އެވެ.
ފިލިޕީންސަށް މިދިޔަ މަހު ކުރެއްވި ޒިޔާރަތަކަށް ފަހު ސިރިސޭނާ ވިދާޅުވެފައި ވަނީ ޑްރަގު ކުށްވެރިންނަށް ރައީސް ރޮޑްރިގޯ ޑުޓާޓެ ދެއްވާ އަދަބު ކޮޕީ ކުރަން ބޭނުންވާ ކަމަށެވެ.
ލަންކާގެ ޖަސްޓިސް މިނިސްޓަރު ތާލަތާ އަތުކޮރަލޭ އަންގާރަ ދުވަހު ވިދާޅުވެފައި ވަނީ މަސްތުވާތަކެތީގެ މައްސަލާގައި ކުށްވެރިވެފައިވާ ފަސް މީހަކަށް މަރުގެ އަދަބު ދިނުމުގެ އިދާރީ އިޖްރާއަތްތައް މިހާރު ނިންމާފައިވާ ކަމަށެވެ.
ކޮލަމްބޯގެ މައި ޖަލުގައި ހުރި ޖައްލާދު އިސްތިއުފާ ދީފައި ވަނީ 2014 ވަނަ އަހަރު އެވެ. ނަމަވެސް އޭގެ ފަހުން ޖައްލާދުގެ މަގާމުގައި މީހަކު ހަރުލާ ގޮތެއް ނުވެ އެވެ. ފަހުން ވެއްދި ތިން މީހުން ވެސް އަމިއްލަ އަށް ވަޒީފާ ދޫކޮށްލާފައި ވަނީ ކުރާނެ މަސައްކަތެއް ނެތިގެންނެވެ.