28 ފެބުރުއަރީ 2019 - 10:26
ނިއު ދިއްލީ (ފެބްރުއަރީ 28) - އިންޑިއާގެ ހަނގުރާމަ މަތީ ދެ ޖެޓް އިއްޔެ ވައްޓާލުމަށް ފަހު ޕާކިސްތާނުން ހިފެހެއްޓި އިންޑިއާގެ ޕައިލެޓް ސަލާމަތުން ދޫކޮށްލުމަށް ނިއު ދިއްލީން ގޮވާލައިފި އެވެ.
ޕައިލެޓް ހިފެހެއޓި މައްސަލައިގައި އިންޑިއާ އިން އިއްޔެ ވަނީ ޕާކިސްތާނުގެ ސަފީރު ފޮރިން މިނިސްޓްރީ އަށް ހާޒިރުކޮށް ރަސްމީކޮށް ޝަކުވާ ހުށަހަޅައިފަ އެވެ. އިންޑިއާ އިން ބުނެފައި ވަނީ އެ ގައުމުގެ ހަނގުރާމަ މަތީ ބޯޓުތަކުން ހަމަލާ ދިނީ ޕާކިސްތާނުގެ ސަރަހައްދުގައި ހަރަކާތްތެރިވާ ހަނގުރާމަވެރި ޖަމާއަތެއްގެ ކޭމްޕަކަށް ކަމަށެވެ. ރައްދުގައި ޕާކިސްތާނުން ހަމަލާދީ އިއްޔެ ވަނީ އިންޑިއާގެ ހަނގުރާމަ މަތީ ދެ ބޯޓު ވައްޓާލައިފަ އެވެ.
ޕާކިސްތާނުން ކުރިން ބުނެފައި ވަނީ ދެ ޕައިލެޓުން ބަންދުކޮށްފައިވާ ކަމަށެވެ. ނަމަވެސް ފަހުން ބުނެފައި ވަނީ އެ ގައުމުގެ ބެލުމުގެ ދަށުގައި ހުރީ އެއް ޕައިލެޓް ކަމަށެވެ. އަދި އެ ޕައިލެޓާ މެދު ކަންތައް ކުރަމުން ދަނީ އަސްކަރީ އުސޫލުން ކަމަށް ވަނީ ބުނެފަ އެވެ.
ޕާކިސްތާނުގެ އެކި ސޯޝަލް މީޑިއާ އެކައުންޓްތަކުން ދައުރުވަމުންދާ މަންޒަރުތަކުން ފެންނަ ގޮތުގައި ކަނުބަނދެފައި ޕައިލެޓް ހުރި އިރު އޭނާގެ މޫނު ވަނީ ޒަޚަމްވެފަ އެވެ. ޕައިލެޓްގެ ދެ އަތް ހުރީ ފުރަގަހަށްވާ ގޮތަށް އައްސައިފަ އެވެ. އަދި އޭނާއާ ސުވާލު ކުރަމުންދާ މަންޒަރުތައް އާއްމުކޮށްފައިވެ އެވެ. ނަމަވެސް ޖެނީވާ ކޮންވެންޝަނާ ޚިލާފަށް ޕާކިސްތާނުން އަސީރަކާ މެދު ކަންތައް ކުރަމުންދާ ކަމަށް ބުނެ ފާޑުކިޔަން ފެށުމުން އެ ވީޑީއޯތަކާއި ފޮޓޯތައް ވަނީ ސޯޝަލް މީޑިއާ އިން ނަގައިފަ އެވެ. ފަހުން ޝާއިއުކުރި ވީޑިއޯތަކުން ވަނީ ޕައިލެޓަށް ސައި ދޭ މަންޒަރު ދައްކައިފަ އެވެ. ޕާކިސްތާނުން ސިފައިން އޭނާއާ މެދު ކަންތައް ކުރަމުންދަނީ ރަނގަޅަށް ކަަމަށް ޕައިލެޓް ބުނެ އެވެ.
އިންޑިއާ އިން ބުނެފައި ވަނީ ޒަޚަމްވެފައިވާ އެ ގައުމުގެ ޕައިލެޓަކާ މެދު ޕާކިސްތާނުން ކަންތައް ކުރަމުންދަނީ ވަރަށް އިހާނެތި ގޮތަކަށް ކަމަށެވެ. އަދި ޕާކިސްތާނުން ވަނީ އިންޓަނޭޝަނަލް ހިއުމެނިޓޭރިއަމް ލޯ އާއި ޖެނީވާ ކޮންވެންޝަނާ ޚިލާފުވެފައި ކަމަށް ވަނީ ބުނެފަ އެވެ.
ޕައިލެޓް ހިފެހެއްޓި މައްސަލައާ ގުޅިގެން ބޮޑު ވަޒީރު ނަރެންދުރަ މޯދީ ވަނީ އިންޑިއާގެ އެއްގަމާއި ކަނޑާ އަދި ވައިގެ ސިފައިންގެ އެންމެ އިސްވެރިންނާ ބައްދަލު ކުރައްވައިފަ އެވެ.