28 ފެބުރުއަރީ 2019 - 09:07
ލަންޑަން (ފެބްރުއަރީ 28) - ޕްރައިވެޓް ޖެޓެއް ވެއްޓި މަރުވި އާޖެންޓީނާގެ ފޯވާޑް އެމިލިއާނޯ ސަލާ ކާޑިފް ސިޓީ އަށް ވިއްކާލި އަގު ހޯދަން ނޯންޓްސް އިން ކާޑިފާ ދެކޮޅަށް ފީފާ އަށް މައްސަލައެއް ހުށަހަޅައިފި އެވެ.
ދަލާ ދަތުރުކުރަމުން ދިޔަ ބޯޓް ގެއްލުނީ އޭނާ ކާޑިފާ ގުޅެން ކުރި ދަތުރުގެ ތެރެއިންނެވެ. ކާޑިފުން އުމުރުން 28 އަހަރުގެ ސަލާގެ ސޮއި ހޯދީ އަންނަ ސީޒަނުގައި ވެސް އިނގިރޭސި ޕްރިމިއާ ލީގުގައި އޮންނަން ބޭނުންވާތީ ޓީމު ވަރުގަދަ ކުރުމުގެ ގޮތުން ކްލަބްގެ ރެކޯޑް އަގެއް ކަމަށްވާ 19 މިލިއަން ޑޮލަރަށެވެ. ކާޑިފުން ސަލާގެ ސޮއި ހޯދިއިރު، އެއްބަސްވީ ތިން އިންސްޓޯލްމަންޓަކަށް އޭނާގެ އަގު ދެއްކުމަށެވެ. އިއްޔެ އަކީ އޭގެ ތެރެއިން ފުރަތަމަ އިންސްޓޯލްމަންޓް ދައްކަން ދިން ފަހުގެ މުއްދަތު ހަމަވި ދުވަހެވެ. މި މަހު 20 ވަނަ ދުވަހު ފުރަތަމަ އިންސްޓޯލްމަންޓް ދޭ ގޮތަށް އެއްބަސްވުމުގައި އޮތް ނަމަވެސް ނޯންޓްސް އިން ވަނީ ކާޑިފުން އެދުމުން މުއްދަތު އިތުރުކޮށްދީފަ އެވެ.
މީގެ ކުރިން ނޯންޓްސް އިން ވަނީ ސަލާގެ އަގު ހޯދަން ސްވިޒަލެންޑުގެ ކޯޓަށް ހުށަހަޅާނެ ކަމަށް ވެސް ބުނެފަ އެވެ. އެކަމަކު އޭރު އެކަން ނުކުރީ ސަލާގެ ހަށިގަނޑު ފެނިފައިނުވާތީ އެވެ. އެހެން ނަމަވެސް ނޯންޓްސް މިހާރު އަންނަނީ ދުނިޔޭގެ މައި ފުޓްބޯޅަ އިދާރާ ފީފާގެ އެހީގައި ސަލާގެ އަގު ހޯދުމަށް މަސައްކަތް ފަށައިފަ އެވެ.
ސަލާގެ ޓްރާންސްފާ އަކީ އިންޓަނޭޝަނަލް ޓްރާންސްފާ އަކަށްވާތީ އޭގެ ކަންތައްތައް ކުރިއަށްގެންދަން ޖެހެނީ ފީފާގެ މެންޑޭޓަރީ ސިސްޓަމެއްގެ ތެރެއިންނެވެ. އެގޮތުން ފީފާ އަށް ހުށަހަޅަން ޖެހޭ އިންޓަނޭޝަނަލް ޓްރާންސްފާ ސެޓްފިކެޓްގެ ކަންތައްތައް ވަނީ ފުރިހަމަކޮށްފަ އެވެ. އެހެން ނަމަވެސް އިނގިރޭސި ޕްރިމިއާ ލީގުގެ ބައެއް ރެޖިސްޓްރޭޝަންތައް ހުރީ ފުރިހަމަނުވެ އެވެ. ކާޑިފުން ކުރާ އެއް ޝަކުވާ އަކީ މި އެވެ.
ފީފާގެ ސިސްޓަމުގައި ސަލާގެ ނަން މިހާރު ރަޖިސްޓްރީކުރެވިފައިވަނީ ކާޑިފްގެ ކުޅުންތެރިއެއްގެ ގޮތުގަ އެވެ. އުސޫލުގެ ތެރެއިން ބަލާއިރު ކާޑިފުން ސަލާގެ އަގު ނޯންޓްސް އަށް ދައްކަން ޖެހެ އެވެ.
ކާޑިފްގެ ތަރުޖަމާނު އާންމުކުރި ބަޔާނެއްގައި ބުނެފައިވަނީ ސަލާ ދަތުރުކުރި ބޯޓު ވެއްޓުނު ހާދިސާގެ އެކި ތަހުގީގުތައް މި ވަގުތު ވެސް ކުރިއަށްދާތީ މިއީ ޓްރާންސްފާގެ ވާހަކަތައް ދައްކަން އެންމެ ރަނގަޅު ވަގުތު ނޫން ކަމަށާއި މި ހާދިސާ ހިނގި ގޮތުގެ ތަހުގީގީ ރިޕޯޓެއް ލިބެންދެން ސަލާގެ ޓްރާންސްފާ ފީއާ މެދު ކަންތައް ކުރާނެ ގޮތެއް މަޑުޖައްސާލަން ބޭނުންވާ ކަމަށެވެ. އަދި އެ ކްލަބުން ސަލާގެ ޓްރާންސްފާ ކަންތަކުގައި ނޯންޓްސްއާ އެކު ހަދާފައިވާ އެއްބަސްވުމާ ހިލާފުވާ ކަމެއް ގަސްދުގައި ނުކުރާނެ ކަމަށް ބުންޏެވެ.
ސަލާގެ އާއިލާ އިން މީގެ ކުރިން ބުނީ އޭނާ ދަތުރުކުރަމުންދިޔައީ ކާޑިފްގެ ޗެއާމަން މެހެމެތު ދަލްމަންގެ ބޯޓެއްގައި ކަމަށެވެ. އެކަމަކު އެއީ ސަލާ އާއި އޭނާގެ އޭޖެންޓް ވިލީ މެކާ ޕްރައިވެޓް ކުންފުންޏަކުން ހަމަޖެއްސި ދަތުރެކެވެ. މެކާ ނެރުނު ބަޔާނެއްގައި ބުނެފައިވަނީ ދަތުރު ހަމަޖެއްސި ކުންފުނިން ބޯޓާއި ޕައިލެޓްގެ މައުލޫމާތު ހިއްސާ ނުކުރާ ކަމަށެވެ. އެހެންވެ، އެކަމާ ބެހޭ ތަހުގީގެއް ޕޮލިހުންނާއި މި ކަމާ ގުޅޭ އެކި ތަހުގީގީ އިދާރާތަކުން ކުރަމުންދާ ކަމަށް މީޑިއާ ރިޕޯޓްތައް ބުނެ އެވެ.
އިނގިރޭސިވިލާތުގެ އެއާ އެކްސިޑެންޓްސް އިންވެސްޓިގޭޝަން ބްރާންޗް (އޭއޭއައިބީ) އިން ދާދި ފަހުން ބުނީ ސަލާ ގޮވައިގެން ދަތުރުކުރި ޖެޓަކީ ކޮމާޝިއަލް ލައިސަންސް ލިބިފައިވާ ޖެޓެއް ނޫން ކަމަށާއި އެ ދަތުުރު ކުރުމަށް ހުއްދަ ހޯދާފައިވަނީ އަމިއްލަ ދަތުރެއްގެ ގޮތުގައި ރަޖިސްޓްރީ ކޮށްގެން ކަމަށެވެ. ނޯންޓްސް އިން ބުނީ ރަސްމީކޮށް ސަލާގެ ދަތުރުތައް ހަމަނުޖެއްސުމަކީ ކާޑިފްގެ އިހުމާލުން ވެފައި އޮތް ކަމެއް ކަމަށާއި އެހެންވެ، ކަމުގައި އެންމެ ޒިންމާ ބޮޑީ ކާޑިފްގެ ކަމަށެވެ.