06 މާޗް 2019 - 07:59
މެޑްރިޑް (މާޗް 6) – އަމިއްލަ ދަނޑުގައި ހަފުތާއެއްގެ ތެރޭ ބަލިވި ތިން ވަނަ މެޗުގައި، ރޭ ނެދަލެންޑްސްގެ އަޔަކްސް އަތުން ލަދުވެތި ގޮތަކަށް 4-1 އިން ބަލިވެ، މިދިޔަ ތިން އަހަރުގެ ޗެމްޕިއަން ސްޕެއިނުގެ ރެއާލް މެޑްރިޑް ޔުއެފާ ޗެމްޕިއަންސް ލީގުގެ ދެ ވަނަ ބުރުން ކަޓައިފި އެވެ.
މުބާރާތުގެ ޗެމްޕިއަންކަން ހަތަރު ފަހަރު ހޯދާފައިވާ އަޔަކްސް އިން 22 އަހަރަށް ފަހު ކުއާޓާ ފައިނަލުން ފުރުސަތު ހޯދި މި މެޗު ވެގެންދިޔައީ ފަހަކަށް އައިސް މި މުބާރާތުގައި ފެނިގެން ދިޔަ އެންމެ ހައިރާންކުރުވަނިވި އެއް މެޗަށެވެ. އަޔަކްސްގެ ދަނޑުގައި ކުޅުނު ފުރަތަމަ ލެގުން ރެއާލް މެޑްރިޑް 2-1 އިން މޮޅުވެފައިވާތީ މެޑްރިޑް ފަސޭހަކަމާ އެކު ކުއާޓާ ފައިނަލުން ފުރުސަތު ހޯދާނެ ކަމަށް ބެލެވުނެވެ. އެގޮތަށް ލަފާކޮށް، ކުއާޓާ ފައިނަލަށް ކާޑުތައް ސާފުކުރުމަށްޓަކައި މެޑްރިޑުގެ ކެޕްޓަން ސާޖިއޯ ރާމޯސް ހުރީ ވެސް އެ މެޗުގެ ފަހުކޮޅު ގަސްދުގައި ރީނދޫ ކާޑެއް ހޯދައި މި މެޗަށް ސަސްޕެންޑްވެގެންނެވެ.
މި މެޗާ އެކު، މި ސީޒަނުގައި ތަށްޓެއްގައި އަތްލުމުގެ ފުރުސަތު މެޑްރިޑަށް ގާތްގަނޑަކަށް ގެއްލުނީ އެވެ. މިދިޔަ އަންގާރަ ދުވަހުގެރޭ ބާސެލޯނާ އަތުން ބަލިވެ ސްޕެނިޝް ކަޕުގެ ސެމީ ފައިނަލުން ކަޓާފައިވާއިރު ހޮނިހިރު ދުވަހުގެރޭ ބާސެލޯނާ އަތުން ބަލިވުމާ އެކު ސްޕެނިޝް ލީގުގެ އެއް ވަނައިގައި އޮތް އެ ޓީމާ މެޑްރިޑާ ދެމެދު 12 ޕޮއިންޓުގެ ފަރަގެއް ވަނީ އައިސްފަ އެވެ. ހަތް ދުވަސް ތެރޭ ތިން މުބާރާތުން ކެޓި ނަމަވެސް ކޯޗު ސެންޓިއާގޯ ސޮލާރީ ބުނީ ކުރިއަށްދާނެ ކަމަށާއި އުނދަގޫ ވަގުތު އޭނާ ދޫނުދޭނެ ކަމަށެވެ. އޭނާ އަކީ ސީޒަނުގައި ފުރަތަމަ ޓީމު ހަވާލުކުރި ހުލެން ލޮޕެޓީގުގެ ނަތީޖާތައް ދަށްވުމުން ގެނައި ކޯޗެވެ. އެކަމަކު ސީޒަން ނިމެންދެއް ވެސް އޭނާ ދެން ބަހައްޓަފާނެ ކަމާމެދު މިހާރު ސުވާލު އުފެދެ އެވެ.
މެޑްރިޑް އެންމެ ފަހުން ޗެމްޕިއަންސް ލީގުގެ ދެ ވަނަ ބުރުން ކެޓީ ކްރިސްޓިއާނޯ ރޮނާލްޑޯގެ ފުރަތަމަ ސީޒަނުގައި 2010 ގަ އެވެ. އޭގެ ފަހުން އޭނާގެ މޮޅު ކުޅުމާ އެކު އެ ޓީމުން ފަސް އަހަރުގެ ތެރޭ ހަތަރު ތަށި ހޯދި އެވެ. އެކަމަކު މިދިޔަ ސީޒަނުގައި އޭނާ އެ ޓީމު ދޫކޮށް ޔުވެންޓަސްއާ ގުޅުނު ހިސާބުން މެޑްރިޑް ފެންނަނީ ނިކަމެތިކޮށެވެ. އަދި މިދިޔަ ސީޒަނުގެ ޗެމްޕިއަންސް ލީގުގެ ފަހުބައިގައި މެޑްރިޑަށް ނަތީޖާ ނެރެދިން ގަރެތު ބޭލް ރޭ މެޗު ފެށީ ބެންޗުންނެވެ. އެކަމަކު ލޫކަސް ވަސްކުއޭޒަށް އަނިޔާވުމުން 29 ވަނަ މިނެޓުގައި އަރުވަން މަޖުބޫރުވި އެވެ.
އޭރު އަޔަކްސް އިން އޮތީ ދެ ގޯލް ޖަހައިފަ އެވެ. އެ ޓީމުގެ ފުރަތަމަ ގޯލް ޖެހީ ހަތް ވަނަ މިނެޓުގައި ހަކީމް ޒިޔެކް އެވެ. މެޗުގައި މޮޅު ކުޅުމެއް ދެއްކި ޑުސާން ޓަޑިޗް ޕެނަލްޓީ އޭރިއާ ތެރެއަށް ވަދެ ހަމަޖެހިލާފައި ޒިޔެކް އަށް ދިން ބޯޅަ އޭނާ ވަނީ މަޑުމަޑުން ގޯލުގެ ކަނަށް އަމާޒުކޮށްލައިފަ އެވެ. އޭގެ 10 މިނެޓު ފަހުން އަޔަކްސް އިން ލީޑު ފުޅާކުރީ ވެސް ޓަޑިޗް ދިން ބޯޅައަކުން ޑޭވިޑް ނެރޭސް ޖެހި ގޯލުންނެވެ. ޓަޑިޗް ދިން ހިތްގައިމު ބޯޅައަށް އަރައި، ފަހަތުގައި ވިއްދާފައި ހުރި ލޫކަސް މޮޑްރިޗަށް ފުރުސަތެއް ނުދީ އަދި ގޯލްކީޕަރު ތިބައޫ ކޯޓުއާ ކައިރިން ދެމި ގަނެ ނެރޭސް ބޯޅަ ގޯލަށް ވައްދާލި އެވެ.
ފުރަތަމަ ހާފު ނިމުނުއިރު އަޔަކްސް 3-2 ގެ އެގްރިގޭޓުން ކުރީގައި އޮތްއިރު، ތަފާތު ބޮޑުކޮށްލަދިނީ 62 ވަނަ މިނެޓުގައި ޓަޑިޗް އެވެ. އެ ގޯލް އައީ، ބޭރުވެފައި އޮތް ބޯޅައަކުން ކަމަށް ބަލައި ރެފްރީ ވީއޭއާރް އިން ޗެކްކުރި އެވެ. އެކަމަކު ނިންމީ ނުސައިރު މަޒްރައޫއީ އެ ބޯޅަ ވެއްޓިގެންފައި ސަލާމަތްކުރިއިރު ބޭރުނުވާ ކަމަށެވެ.
އެ ގޯލާ އެކު މެޑްރިޑް އިތުރު ތިން ގޯލް ޖަހަން ޖެހިފައި އޮއްވާ އުއްމީދެއް ގެނެސްދިނީ 70 ވަނަ މިނެޓުގައި މާކޯ އަސެންސިއޯ އެވެ. އެކަމަކު އޭގެ ދެ މިނެޓު ފަހުން ލާސް ޝޯން އަޔަކްސްގެ ހަތަރު ވަނަ ގޯލް ޖަހައި އެ ޓީމަށް ކުއާޓާ ފައިނަލް ކަށަވަރުކޮށްދިނެވެ. އިތުރު ވަގުތުގެ ތެރޭ މެޑްރިޑުގެ ނާޗޯ އަށް ދެއްކި ރަތްކާޑާ އެކު އެ ޓީމު މެޗު ނިންމާލީ އެކަކު މަދުކޮށެވެ.