07 މާޗް 2019 - 15:40
މައްސަރު ދުވަސްވަރުގައި ބޭނުންކުރާ ޕެޑް ބެންކް އޮފް މޯލްޑިވްސް (ބީއެމްއެލް)ގެ މުވައްޒަފުންނަށް ހިލޭ ލިބޭ ގޮތް އެ ބޭންކުން މިއަދު ހަމަޖައްސައިފި އެވެ.
ޓްވިޓާ މެދުވެރިކޮށް ބީއެމްއެލް ބުނީ ޕެޑް ފަދަ ޒަރޫރީ ބޭނުންތައް މަސައްކަތު މާހައުލުގައި އަންހެނުންނަށް ފޯރުކޮށްދިނުމުން އަންހެނުންނަށް ވަރަށް ފައިދާ ކުރާ ކަމަށެވެ. އަދި މިއަދުން ފެށިގެން އެ ކުންފުނީގެ ހުރިހާ ޑިޕާޓްމެންޓްތަކާއި ބްރާންޗުތަކުގައި ވެސް ހިލޭ ޕެޑް ލިބޭނެ ގޮތް ހަމަޖައްސަން އެތަނުން ވައުދުވި އެވެ.
ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވީ އެތަނުން އެގޮތަށް ހަމަޖެއްސީ އެ އޮފީހުގައި އުޅޭ އަންހެން މުވައްޒަފުން ބޭނުންވާ ކަމެއް ފަސޭހައިން ހަމަޖައްސައިދިނުމަށް ކަމަށެވެ.
"މި ކުންފުނީގައި އުޅޭ 500 އަށް ވުރެ ގިނަ އަންހެން މުވައްޒަފުން. އެ މީހުންނަށް ޕެޑް ފަދަ ޒަރޫރީ ބޭނުމެއް ފަސޭހައިން ހަމަޖައްސައިދޭން މިކަން ކުރަން ނިންމީ،" ސައީދު ވިދާޅުވި އެވެ.
ބީއެމްއެލް ފަދަ ބޮޑު ކުންފުންޏަކުން މި ފިޔަވަޅު އަޅަން ނިންމުމުން، ސޯޝަލް މީޑިއާގައި އެ ކުންފުންޏަށް މީހުން އަންނަނީ ތައުރީފު ކުރަމުންނެވެ. އަދި އެހެން ކުންފުނިތައް ވެސް ބީއެމްއެލް ނަމޫނާއަކަށް ނަގައިގެން މި ގޮތަށް ކަންތައް ކުރަން ގޮވާލާފައި ވެ އެވެ.