07 އެޕްރީލް 2019 - 13:24
ޖުލައި މަހު އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ކޮލިފައިވުމަށް އެތުލެޓިކްސް އެސޯސިއޭޝަނުން ދިން ޓާގެޓަށް ވާސިލްވެ، އެ ގޭމްސްގައި ރާއްޖޭން ވާދަކުރާ އެތުލެޓިކްސް ޓީމުގެ ޖާގަ ކަށަވަރުކުރި ފުރަތަމަ ދުވުންތެރިޔަކަށް ޝިފާޒް މުހައްމަދު ވެއްޖެ އެވެ.
ހާފް މެރެތަން އަށް ކޮލިފައިވުމަށް އެސޯސިއޭޝަނުން ދީފައިވާ 1 ގަޑި 13 މިނެޓުގެ ޓައިމިން އަށް ޝިފާޒް ވާސިލްވީ އިއްޔެ ޗެޕް ރިޕަބްލިކުގެ ޕްރާގް މެރެތަންގައި 1 ގަޑި 13:04 މިނެޓުން ދުވެގެން ގައުމީ ރެކޯޑް ވެސް ހަދައިގެންނެވެ. ކުރީގެ ރެކޯޑަކީ މިދިޔަ އަހަރުގެ މޭ މަހު ނޭޕާލުގެ ކަންޓިޕޫރް ހާފް މެރެތަންގައި 1 ގަޑި 14:01 މިނެޓުން ދުވެގެން ހެދި ރެކޯޑެވެ. އަދި އެ ޓައިމިންގެ ތެރެއިން އޭނާ ވަނީ ރާއްޖޭގެ 15 ކިލޯމީޓަރު ދުވުމާއި 20 ކިލޯމީޓަރު ދުވުމުގެ ރެކޯޑް ވެސް އާކޮށްފަ އެވެ.
މޮރިޝަސްގައި ބާއްވާ އައިއޯއައިޖީގެ ހާފް މެރެތަން ދުވުމުން ރާއްޖެ އަށް ދީފައިވަނީ ފަސް ޖާގަ އެވެ. އެސޯސިއޭޝަނުން ދީފައިވާ ޓާގެޓް ހާސިލްކުރެވޭ ފަސް ދުވުންތެރިންނަށް އެ ފުރުސަތު އޮތްއިރު، އެއަށް ވުރެ ގިނަ ދުވުންތެރިން ތިބެއްޖެ ނަމަ ފުރުސަތު ދޭނީ އޭގެ ތެރެއިން އެންމެ ޓައިމިން ރަނގަޅު ފަސް ދުވުންތެރިންނަށެވެ.
ކޮކާކޯލާ އާއި މެރެތަން ޝޮޕުން ސްޕޮންސާކޮށްފައިވާ ޝިފާޒް ޖާގަ ކަށަވަރުކުރީ މިދިޔަ ނޮވެމްބަރު މަހުން ފެށިގެން ކެންޔާގައި ހެދި ވަރުގަދަ ތަމްރީންތަކުން ހޯދި ކުރިއެރުންތަކުންނެވެ. އޭނާ ނޮވެމްބަރުން ފެށިގެން ފެބްރުއަރީއާ ހަމަޔަށް އެތަނުގައި ތަމްރީން ހެދީ ހެޔޮއެދޭ ފަރާތަކުން ހޯދައިދިން ފުރުސަތެއްގަ އެވެ. އޭގެ ފަހުން ތަމްރީން ހަދަމުން އަންނަނީ އައިއޯއައިޖީ އަށް ތައްޔާރުވުމަށް ސްޕޯޓްސް މިނިސްޓްރީ އާއި އެތުލެޓިކްސް އެސޯސިއޭޝަނުން ހޯދައިދިން ފުރުސަތެއްގަ އެވެ.
ހާފް މެރެތަން އަށް ތައްޔާރުވުމަށް އަހުމަދު ޝަރަފް ވެސް އަންނަނީ މިނިސްޓްރީ އާއި އެސޯސިއޭޝަނުން ހޯދައިދިން ފުރުސަތެއްގައި މިހާރު މޮރޮކޯގައި ތަމްރީން ހަދަމުންނެވެ.
އައިއޯއައިޖީގައި ރާއްޖޭން ވާދަކުރާ ފިރިހެން ސްޕްރިންޓް އަދި މިޑްލް ޑިސްޓެން ދުވުންތެރިން ނަގާނީ މި މަހު ގަތަރުގެ ދޯހާގައި ބާއްވާ އޭޝިއަން އެތުލެޓިކްސް ޗެމްޕިއަންޝިޕުންނެވެ. އޭގެ ފަހުން މާލޭގައި ބާއްވާ ޓައިމް ޓްރަޔަލް އިން ވެސް ރަނގަޅު ނަތީޖާ ހޯދާ ދުވުންތެރިންނަށް ފުރުސަތު އޮންނާނެ އެވެ. އަންހެން ޓީމު އޭޝިއަން ޗެމްޕިއަންޝިޕުގައި ވާދަނުކުރާތީ އައިއޯއައިޖީގައި ވާދަކުރާ އަންހެން ދުވުންތެރިން ނެގުމަށް ހާއްސަ ޓައިމް ޓްރަޔަލެއް ބާއްވާނެ އެވެ.
އެސޯސިއޭޝަނުގެ ރައީސް މުހައްމަދު ތޮލާލް ވިދާޅުވީ އައިއޯއައިޖީގައި ބައިވެރިކުރާ ހުރިހާ އެތުލީޓުންނަށް ރާއްޖޭން ބޭރުން ތަމްރީނުގެ ފުރުސަތު ހޯދައިދޭނެ ކަމަށެވެ. އަދި ތަޖުރިބާ ހޯދަން އެސޯސިއޭޝަނުން އެތުލީޓުން ނުފޮނުވާނެ ކަމަށާއި ބައިވެރިވާނީ މެޑަލް ލިބޭނެ އިވެންޓްތަކުގައި ކަމަށް ވެސް އެސޯސިއޭޝަނުން ބުނެފައިވެ އެވެ.
އެތުލެޓިކްސް އަކީ ފަހަކަށް އައިސް ބައިނަލްއަގްވާމީ މައިދާނުގައި ރާއްޖެއަށް އެންމެ ގިނަ މެޑަލް ހޯދައިދިން ކުޅިވަރެވެ. އެގޮތުން 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި ދުވުންތެރިޔާ ހަސަން ސާއިދު ވަނީ ރަން މެޑަލް ހޯދައި ތާރީހުގެ ތެރެއަށް ވަދެފަ އެވެ. އަދި އެ މުބާރާތާއި ޖެހިގެން އައި އަހަރުގެ ސައުތު އޭޝިއަން ގޭމްސްގައި ސާއިދު ވަނީ ރިހި މެޑަލް ހޯދައިފަ އެވެ.