13 އެޕްރީލް 2019 - 07:44
ދާދި ފަހުން ދުބާއީގައި ނެރުނު ދުނިޔޭގެ އެންމެ އަގުބޮޑު ސެންޓް ފުޅި ދުނިޔޭގެ ރެކޯޑް ފޮތުން ވެސް ޖާގަ ހޯދައިފި އެވެ.
"ޝުމޫހް" ގެ ނަން ދީފައިވާ، 1.295 މިލިއަން ޑޮލަރަށް ވިއްކާ ސެންޓް ފުޅި ދުނިޔޭގެ ރެކޯޑް ފޮތުން ޖާގަ ހޯދީ ފުޅި ތައްޔާރުކުރަން މިހާތަނަށް އެންމެ ގިނަ އަދަދަށް ޖަވާހިރު ބޭނުންކުރި ސެންޓް ފުޅީގެ ގޮތުގަ އެވެ. އެގޮތުން "ޝުމޫހް" ސެންޓް ފުޅީގައި 3،571 އަށް ޖަވާހިރު ބޭނުންކޮށްފައިވެ އެވެ. ސެންޓް ފުޅި ފަރުމާ ވެސްކޮށްފައި ހުރީ ވަރަށް ތަފާތު ގޮތަކަށެވެ.
ރިމޯޓެއްގެ އެހީގައި ބޭނުން ކުރެވޭ ގޮތަށް ފަރުމާކޮށްފައިވާ މި ސެންޓް ފުޅީގެ ޑިޒައިނަރަކީ ދުބާއީގެ ނަބީލް ޕާފިއުމަސްގެ ވެރިޔާ އަޝްގަރް އާދަމް އަލީ އިބްރާހީމެވެ.
ދެ ޖިންސްގެ މީހުންނަށް ވެސް ބޭނުން ކުރެވޭ ގޮތަށް ތައްޔާރުކޮށްފައިވާ "'ޝުމޫހް" އަކީ ސްޕިރިޓް އޮފް ދުބާއީ ޕާފިއުމްސްގެ އުފެއްދުމެކެވެ.
"މިއީ އެންމެ މަތީ ފެންވަރުގެ އުފެއްދުމެއް. ސެންޓް ކޮލިޓީ އާއި މީގެ ފުޅި އަށް ބެއްޔަސް އަދި މިއީ ވަރަށް ހާއްސަ ސިފަތަކެއް އެކުލެވިގެންވާ ހިތްގައިމު އަދި އެހާމެ ފުރިހަމަ މަސައްކަތެއް،" ސްޕިރިޓް އޮފް ދުބާއީ ޕާފިއުމްސް އިން ބުންޏެވެ. "އަދި ޝުމޫޙްއަކީ ދުބާއީގެ ހައިބަވަންތަކަން ދައްކުވައިދޭ އުފެއްދުމެއް."
މެދުއިރުމަތީގެ ގައުމުތަކުގެ ތެރެއިން ތަރައްގީގެ ކުލަވަރު އެންމެ ގަދަ އަދި ޒަމާނީ މުއްސަނދި ލައިފްސްޓައިލް ވަރަށް ބޮޑަށް ފެނިގެންދާ ދުބާއީއަކީ އަގުބޮޑު އުފެއްދުންތައް ތައްޔާރު ކުރަން ވަރަށް މަޝްހޫރު ގައުމެކެވެ.
މިދިޔަ އަހަރު އެ ގައުމުން ވަނީ ދުނިޔޭގެ އެންމެ އަގުބޮޑު ފައިވާން ވެސް ދައްކާލައިފަ އެވެ. އެއީ ރަނާއި ޖަވާހިރު ބޭނުންކޮށްގެން ފަރުމާކޮށްފައިވާ 17 މިލިއަން ޑޮލަރު (262 މިލިއަން ރުފިޔާ) ހައި ހީލްސްއެކެވެ. އެއީ ދުބާއީގެ ފައިވާން ކުންފުނި ޖަޑާ ދުބާއީ އާއި ގަހަނާ ކުންފުނި ޕެޝަން ޖްވެލާޒްގެ އުފެއްދުމެކެވެ.