21 އެޕްރީލް 2019 - 09:58
ލަންކާގެ ފޮރިން މިނިސްޓްރީން ބުނި ގޮތުގައި ހަމަލާތަކުގައި މަރުވި ބޭރު މީހުންގެ ތެރޭގައި އިންޑިޔާގެ ތިން މީހަކާއި ޕޯޗުގަލް މީހަކާއި ތުރުކީގެ ދެ މީހަކާއި އިނގިރޭސިވިލާތުގެ ތިން މީހަކާއި އެމެރިކާ އާއި އިނގިރޭސިވިލާތުގެ ޕާސްޕޯޓް އޮތް ދެ މީހަކު ހިމެނޭ. މީގެ އިތުރުން ނުވަ ބޭރު މީހަކު ގެއްލިފައިވާ ކަމަށާއި ކޮން ގައުމުތަކެއްގެ ބައެއްކަން ސާފު ނުވާ 25 ހަށިގަނޑު މޯޗަރީގައި ބާއްވާފައިވާ ކަމަށް ވެސް އެ މިނިސްޓްރީން ބުނޭ. މިއަދު ހައެއް ޖެހުމާ ހަމައަށް 19 ބިދޭސީއަކަށް ފަރުވާ ދެމުން އަންނަ ކަމަށް ވެސް ބަޔާނުގައިވޭ.
މި ހަމަލާތަކާ ގުޅިގެން މިހާތަަނަށް 13 މީހަކު ހައްޔަރުކޮށްފި. ލަންކާގައި މިއަދު ދިން ބޮމުގެ ގިނަ ހަމަލާތަކަކީ ޖާނުން ފިދާވެގެން ދީފައިވާ ހަމަލާތަކެއް.
ލަންކާގައި ކާފިއު ހިންގާފައި އޮތަސް ކޮންމެ އެއާލައިނަކުން ދަތުރުކުރާ މީހުންނަށް ވެސް އެއާޕޯޓަށް ދެވޭނެ ކަމަށް ލަންކާގެ ގައުމީ އެއާލައިން ސްރީލަންކަން އިން ބުނޭ. އެގޮތުން ދަތުރުކުރާ މީހާގެ ޓިކެޓާއި ޕާސްޕޯޓް، ސަލާމަތީ ބާރުތަކުގެ މީހުންނާއި ޗެކް ޕޮއިންޓްތަކުގައި ތިބި މީހުންނަށް ދައްކަން އެދިފައިވޭ.
ސިފައިންނާއި ފުލުހުން ބުނާ ގޮތުގައި ލަންކާގެ ހަމަލާގައި އެއްވެސް ދިވެއްސަކު ބައިވެރިވުމެއް އޮތް ކަމަކަށް އެ ގައުމަކުން އަދި ބުނެފައެއް ނުވޭ. އަދި ރާއްޖެ އަށް އެކަހަލަ ނުރައްކަލެއް އޮތް ކަމުގެ މައުލޫމާތު ވެސް ލިބިފައިނުވާ ކަމަށް ސަލާމަތީ ބާރުތަކުން ބުނޭ.
ރާއްޖޭގެ ޕޮލިހާއި އެމްއެންޑީއެފްގެ އެންމެ އިސް ދެ ބޭފުޅުން ދާދި ދެންމެއަކު ނޫސްވެރިންނާ ބައްދަލުކުރައްވާ ވިދާޅުވީ ލަންކާގައި ދިން ހަމަލާއާ ގުޅިގެން ރާއްޖޭގެ ސަލާމަތީ ކަންކަން ވަރުގަދަކޮށްފައިވާ ކަމަށް.
އޭއެފްޕީއާ ވާހަކަ ދައްކަމުން ހޮޓަލުގެ މެނޭޖަރަކު ބުނީ ބޮން ގޮއްވާލި އިރު އޭނާ ހުރީ ކިއޫގެ އެންމެ ކުރީގައި ކަމަށް. ވަގުތަކީ ހެނދުނު 0830 ހާއިރު ކަމަށް ވެސް މެނޭޖަރު ބުނި.
ބައިނަލްއަގުވާމީ ބައެއް މީޑިއާތަކުން ބުނާ ގޮތުގައި ސިނަމަން ގްރޭންޑްގައި ދިން ހަމަލާގައި އަމިއްލައަށް މަރުވެގެން ބޮން ގޮއްވާލި މީހާ ހުރީ ހެނދުނު ސައި ބޯން ތިބި މީހުންގެ ކިއޫގައި ތަށި ވެސް ހިފައިގެން. އޭނާގެ ނަމަކީ މުހައްމަދު އައްޒާމް މުހައްމަދު ކަމަށާއި ހޮޓަލަށް އޭނާ ޗެކިންވީ ކުރީ ރޭ ކަމަށް ވެސް، މީޑިއާތަކުން ބުނޭ.
މި ހަމަލާތަކާ ގުޅިގެން 7 މީހަކު ވަނީ ހައްޔަރުކޮށްފައި. ލަންކާގައި މިއަދު ދިން ބޮމުގެ ގިނަ ހަމަލާތަކަކީ ޖާނުން ފިދާވެގެން ދީފައިވާ ހަމަލާތަކެއްކަން ސަރުކާރުން ވަނީ ކަށަވަރުކޮށްދީފައި. އަދި މިއީ އެއް ގްރޫޕަކުން ދީފައިވާ ހަމަލާތަކެއް ކަމަށް ވެސް ސަރުކާރުން ބުނޭ
ލަންކާގައި ގޮއްވާލި ބޮންތަކުގައި މިހާތަނަށް 207 މީހަކު ވަނީ މަރުވެފައި. މީގެ ތެރޭގައި ބޭރު ގައުމުތަކުގެ 27 މީހަކު ހިމެނޭ. ޒަހަމްވީ މީހުންގެ އަދަދު ވަނީ 450 އަށް އަރާފައި.
ހަމަލާ ދިނީ ކޮން ބައެއްކަން އެނގޭ ކަމަށް ލަންކާގެ ޑިފެންސް މިނިސްޓަރު ވިދާޅުވެއްޖެ. އެހެން ނަމަވެސް އެއީ ކޮން ބައެއްކަން ހާމައެއް ނުކުރޭ. ބޮޑުވަޒީރު ރަނިލް ވިދާޅުވެފައި ވަނީ މިއީ މަދު ބަޔަކު ދިން ހަމަލާތަކެއް ކަމަށް.
ލަންކާގައި ތިބި ދިވެހިންގެ ހާލު ބައްލަވާލެއްވުމަށް ރައީސްގެ ހާއްސަ މަންދޫބެއްގެ ގޮތުން ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ހަލީލު ލަންކާ އަށް ވަޑައިގަންނަވާ ގޮތަށް ހަމަޖައްސައިފި. އޭނާ ލަންކާ އަށް ފުރާވަޑައިގަންނަވާނީ މިރޭ.
ލަންކާ ސަރުކާރުން ވަނީ މިހާރު ކުރިއަށް ދާ ހުރިހާ އެގްޒާމްތަކެއް ފަސްކޮށް ސްކޫލުތައް ވެސް ބަންދުކޮށްފައި. އަދި ވަކި މުއްދަތެއް ނެތް ގޮތަށް މުޅި ލަންކާގައި ވަނީ ކާފިއު ހިންގަން ފަށައިފައި. މި ހަމަލާގައި މަރުވި މީހުންގެ އަދަދު މިހާރު ވަނީ 193 އަަށް އަރައިފައި.
ނޮގޭގޮޑައިގައި ދިން ހަމަލާގައި ބޮން ގޮއްވާލައިފައި ވަނީ ފުލުހުން އެ ގެއަށް ވަންނަން އުޅުމުން ޖާނުން ފިދާވުމުގެ ހަމަލާއެއް ކަމަށް ބެލެވޭ ކަމަށް ކަމާ ބެހޭ ފަރާތްތަކުން ބުނޭ. މި ހަމަލާގައި ތިން ފުލުހަކު ވަނީ މަރުވެފައި. ބޮޑުވަޒީރު ރަނިލް ވިދާޅުވެފައި ވަނީ މިއީ މަދު ބަޔަކު ބައިވެރިގެން ދީފައިވާ ހަމަލާތަކެއް ކަމަށް
އެންމެ ފަހުން ބޮން ގޮއްވާލި ދެހިވެލަ އިން ފާސްކުރި ގެއިން ބައެއް މީހުން ހައްޔަރުކޮށްފި. އެކަމަކު އެއީ ސީދާ މި ހަމަލާތަކާ ގުޅިގެން ހައްޔަރު ކުރި ބައެއްކަން އަދި ޔަގީންކޮށެއް ނުދޭ.
ލަންކާގައި ހުންނަ ދިވެހި ހައި ކޮމިޝަނުން ތަކުރާރުކޮށް އެދެނީ ދިވެހިން ބޭރަށް ނުކުމެ ނޫޅެން. ބައެއް ހިސާބުތަކުގައި އަދިވެސް އެއްޗެހި ގޮވަމުން ދާތީ، ރައްކާތެރިވެ ތިބެން ދިވެހި ސަރުކާރުން އެދޭ.
ނޮގޭގޮޑައިގައި ދިން ހަމަލާގައި ފުލުހަކު ވަނީ މަރުވެފައި. ދެހިވެލައިގައި ދިން ހަމަލާގައި މަރުވީ ތިން ފުލުހަކު.
ގޮވާ ތަކެތި ހުރި ކަމަށް ބުނެ ލިބުނު ރިޕޯޓަކާ ގުޅިގެން ދެހިވެލަ ސަރަހައްދުގައި ހުރި ގެއެއް ފުލުހުން ފާސްކުރަމުން އެބަދޭ
ކުރިން މިއަދު ހަވީރު 6 ޖަހާއިރު ހިންގަން ފަށާގޮތަށް އޮތް ކާފިއު، ދާދިދެންމެއަކު ހިންގަން ފަށައިފި.
ޕާރުސަލް ކޮށްފައިވާ ބޮމެއް ޕެޓާ ސަރަހައްދުން ފެނިއްޖެ. އެ ބޮން ނައްތާލަން ކަމާ ބެހޭ ފަރާތްތަކުން މިހާރު އަންނަނީ ހަރަކާތްތެރިވަމުން.
އެންމެ ފަހުން ގޮއްވާލި ބޮން ގޮއްވާލީ ނޮގޭގޮޑައިގެ ޑަމަޓަގޮޑާ ސަރަހައްދުގައި. މިއީ ދިވެހިން ވެސް ވަރަށް ގިނައިން އުޅޭ ސަރަހައްދެއް.
ލަންކާގައި ސޯޝަލް މީޑިއާތައް ބްލޮކްކޮށްފައިވާ ކަން ސަރުކާރުން ޔަގީންކޮށްދީފި
މިއަދު އިރުއޮއްސި 6:00 އިން މާދަމާ ހެނދުނު 6:00 އަށް މުޅި ލަންކާގައި ކާފިއު އިއުލާނުކޮށްފި. ހޯމަ ދުވަހާއި އަންގާރަ ދުވަސް ބަންދު ކަމަށް ވެސް ކަނޑައަޅައިފި
މިފަހަރު ގޮއްވާލާފައި ވަނީ ހައުސިން ކޮމްޕްލެކްސްއެއްގައި
އަނެއްކާވެސް އިތުރު ހަމަލާއެއް؛ މިފަހަރު ބޮން ގޮއްވާލާފައި ވަނީ ޑަމަޓަގޮޑާ ސަރަހައްދުގައި ކަމަށް ފުލުހުން ބުނޭ
ލަންކާގައި މިވަގުތު ފޭސްބުކާއި ވަޓްސްއެޕް ބޭނުން ނުކުރެވޭ ކަމަށް ބައެއް ނޫސްވެރިން ބުނެފި. ދޮގު ޚަބަރު ފަތުރައި ހަމަނުޖެހުން އިތުރުވާނެ ކަންތައް ހިންގަފާނެތީ ލަންކާގައި ސޯޝަލް މީޑިއާ ބްލޮކް ކުރާނެ ކަމަށް ވަނީ ބެލެވިފައި.
ކުޑަ އިރުކޮޅެއްގެ ތެރޭގައި ލަންކާގައި ކާފިއު އިއުލާނުކުރާނެ ކަމަށް ޑިފެންސް މިނިސްޓަރު ރުވާން ވިޖެވަރްދަނާ ވިދާޅުވެއްޖެ
ހަތް ވަނަ ހަމަލާ ދީފައިވަނީ "ޓްރޮޕިކަލް އިން" ކިޔާ ހޮޓަލެއްގައި.
ޒޫ ކައިރީގައި ހުރި ހޮޓަލުގައި ދިން ހަމަލާގައި ޒަހަމްވި ދެ މީހަކަށް ފަރުވާ ދެނިކޮށް މަރުވެފައިވާކަން ކަލުބޯވިލާ ހޮސްޕިޓަލުން ކަށަވަރުކޮށްދީފި
ބޮން ގޮއްވާލީ ދެހިވަލަ ޒޫ ކުރިމަތީގައި ހުންނަ ހޮޓަލެއްގައި. ހަމަލާގައި ދެ މީހަކު މަރުވި ކަމަށް ބައެއް ރިޕޯޓްތައް ބުނޭ.
ދެހިވަލަ ޒޫ ކައިރީގައި ހުންނަ ހޮޓަލެއްގައި ވެސް އެއްޗެއް ގޮއްވާލައިފި ކަމަށް ލަންކާ ފުލުހުން ބުނެފި
މަރުވި މީހުންގެ އަދަދު ރިޕޯޓްކޮށްފައިވާ ގޮތުން: ނެޝަނަލް ހޮސްޕިޓަލުން 46، ނިގަންބޯ ހޮސްޕިޓަލުން 74، ކަޓަނާ ޗާޗުން 31، ރަގަމާ ހޮސްޕިޓަލުން 7 އަދި ބަޓިކަލޯއާ އިން 27
ހަމަލާގައި މަރުވި މީހުންގެ އަދަދު 185 އަށް އަރައިފި ކަމަށް، ލަންކާގެ ބައެއް މީޑިއާތަކުން ބުނޭ. މި އަދަދު އަދިވެސް މަތިވާނެ ކަމަށް ލަފާކުރެވޭ.
ފައްޅިތަކަށް ހަމަލާ ދޭން އުޅޭ ކަމުގެ މައުލޫމާތު ލަންކާގެ އިންޓެލިޖެންސް އެޖެންސީ އަށް ބޭރުގެ އިންޓެލިޖެންސް އިދާރާއާކުން ދީފައިވާ ކަމަށް ބުނާ ސިޓީއެއް ސޯޝަލް މީޑިއާގައި އަންނަނީ ދައުރުވަމުން. ނަމަވެސް މިއީ އަދި ސައްހަ އެއްޗެއް ކަމެއް ކަށަވަރުކުރެވިފައެއް ނުވޭ.
ހަމަލާގައި މަރުވި ބިދޭސީންގެ އަދަދު 35 އަށް އަރާފައިވާ ކަމަށް ބައެއް މީޑިއާ ރިޕޯޓްތައް ބުނޭ.
ސިނަމަން ހޮޓެލްސް އިން ބުނިި ގޮތުގައި ބޮން ގޮއްވާލާފައި ވަނީ ސިނަމަން ގްރޭންޑް ހޮޓެލްގެ ގްރައުންޑް ފްލޯގައި ހުންނަ ރެސްޓޯރަންޓްގައި. ގެސްޓުންނަށް ވަގުތުން އެހީތެރިކަން ފޯރުކޮށްދީފައި ވާނެ ކަމަށާއި އެއްވެސް ގެސްޓަކު އެހީއެއް ބޭނުންވާ ނަމަ 0112437437 އަށް ގުޅުމަށް ވަނީ އެދިފައި.
ކޮލަމްބޯ ހޮސްޕިޓަލުން ބުނި ގޮތުގައި ނުވަ ބިދޭސީއަކު ވަނީ މަރުވެފައި
ހަމަލާ ދިން ވަގުތު ކިންގްސް ބަރީ ހޮޓެލްގައި ދެ ދިވެއްސަކު ތިބި ކަމަށް އެނގިފައިވޭ. ހަމަލާ ދިން ފަހުން އެ މީހުން ވަނީ ހޮޓަލުން ނެރެގެން ގެންގޮސްފައި. އަނިޔާއެއް ނުލިބި އެ މީހުން ވަނީ ސަލާމަތްވެފައި
މީގެ ކުރިން ސްރީ ލަންކާގައި އެއް ފަހަރާ އެންމެ ގިނަ ބަޔަކު މަރުވި ޓެރަރިސްޓް ހަމަލާއަކީ ޖެނުއަަރީ 31، 1996 ގައި ކޮލަމްބޯ ސެންޓްރަލް ބޭންކަށް އަމާޒުކޮށް ދިން ހަމަލާ. އެ ހަމަލާގައި ޖުމްލަ 91 މީހުން މަރުވެ 1،400 އަށް ވުރެ ގިނަ މީހުން ޒަހަމްވި. ގޮވާ އެއްޗެހި އަޅާ ފުރާފައި އޮތް ލޮރީއެއް، ބޭންކްގެ މައި ދޮރު ފުނޑާލައިގެން ގޮސް ގޮއްވާލުމުގެ އިތުރުން ތަމަޅަ ހަނގުރާމަވެރިންގެ ބަޔަކު ބަޑިން ވެސް ހަމަލާތައް ދިން. ސެންޓްރަލް ބޭންކްގެ މައި އިމާރާތް ހުންނަނީ ކިންގްސްބަރީ އާއި ގަލަދާރީ ހޮޓާ ވެސް ހުންނަ ސަރަހައްދުގައި.
ސަލާމާތީ ބާރުތަކާއި ސަރުކާރުގެ އިދާރާތަކާއި ކެބިނެޓްގެ ބައްދަލުވުންތަކެއް މިހާރު ކުރިއަށް އެބަ ދޭ. ސަރުކާރުން އަޅާނެ ފިޔަވަޅުތަކާ ބެހޭ ގޮތުން ބަޔާނެއް ނެރޭނެ ކަމަށް ބެލެވޭ
ހަމަލާ ދިނީ ކޮން ބައެއްކަން އަދި ހޯދިފައި ނުވާ ކަމަށާއި ހަމަލާގެ ޒިންމާ ވަކި ބައެއްގެ ބޮލުގައި އަޅުވައި އިތުރު ހަމަނުޖެހުންތަކަށް މަގު ފަހިވާނެ ކަންކަން ނުކުރުމަށް ސިފައިންނާއި ފުލުހުން އަންނަނީ އިލްތިމާސްކުރަމުން
ހަމަލާތަކުގައި ޒަހަމްވި މީހުންނަށް ލޭ ބޭނުންވެގެން ހޮސްޕިޓަލްތަކުން ގޮވާލުމާ އެކު އެތައް ބަޔަކު ހޮސްޕިޓަލްތަކަށް ގޮސް ލޭ ދޭން ކިއޫގައި އެބަތިބި ކަމަށް، ލަންކާގެ ބައެއް ނޫސްތަކުން ބުނޭ
ލަންކާގައި ދިރިއުޅޭ ދިވެހިން ބޭރަށްނުކުމެ ނޫޅުމަށް ލަންކާގައި ހުންނަ ދިވެހި އެމްބަސީން އެދެފި. ލަންކާގައި މިއަދު ގޮއްވާލި ބޮންތަކާ ގުޅިގެން، ގިނަ ބަޔަކު ޒަހަމްވެ، މަރުވި މީހުންގެ އަދަދު ވަނީ 160 އަށް ވުރެ މައްޗަށް ގޮސްފައި. މަރުވި މީހުންގެ އަދަދު ވަރަށް ބޮޑަށް މައްޗަށް ދިއުން އެކަށީގެންވާ ކަމަށް ރަސްމީ ފަރާތްތަކުން ބުނޭ. މި ހާދިސާތަކުގައި އެއްވެސް ދިވެއްސަކު ޒަހަމްވި ކަމުގެ މައުލޫމާތެއް އަދި ނުލިބޭ
ލަންކާ ސަރުކާރުން ދެންމެ އިއުލާންކުރި ގޮތުގައި ސަރުކާރުގެ ސްކޫލުތަކުގެ ކިޔެވުން މާދަމާ އާއި އަންގާރަ ދުވަހު ބަންދު
ލަންކާގެ ބޮމުގެ ހަމަލާގައި މަރުވި މީހުންގެ އަދަދު މިހާރު ވަނީ 160 އަށް އަރައިފައި.
ސްރީ ލަންކާގެ މައި އެއާޕޯޓަށް ދާ މީހުން ހަތަރު ގަޑިއިރު ކުރިން ދާން ސްރީ ލަންކާގެ ރަަސްމީ ފަރާތްތަކުން މިހާރު ވަނީ އަންގާފައި. ހަމަލާއާ އެކު ވެެރިރަށުގެ ސަލާމަތީ ފިޔަވަޅުތައް ވަނީ ވަރުގަދަކޮށްފައި.
އާންމުން މަޑުމައިތިރިކަމާ އެކު ތިބުމަށް، ސްރީ ލަންކާގެ ރައީސް މައިތިރަޕާލާ ސިރިސޭނާ ގޮވާލައްވައިފި. އޭނާ ކުރެއްވި ޓްވީޓެއްގައި ވިދާޅުވީ މި އަނިޔާވެރި ހަމަލާގެ ފުނަށް ދާން ތަހުގީގުކުރާނެ ކަމަށް.
ސޯޝަލް މީޑިއާގައި ދޮގު ބައެއް މައުލޫމާތު ވެސް ފަތުރާތީ ސްރީ ލަންކާގެ ފުލުހުން އެދެނީ ކަށަވަރުނުކޮށް އެއްވެސް މައުލޫމާތެއް ނުފަތުރަން. ބައެއް މީހުން ބުނާ ގޮތުގައި އަށް ތަނެއްގައި އެއްޗެހިތަކެއް ގޮވި. އެކަމަކު ލަންކާގެ އޮފިޝަލުން ބުނަނީ މިހާތަނަށް އެނގިފައި ވަނީ ގޮވުންތައް ގޮވީ ހަ ތަނެއްގައި ކަމަށް.
މިހާތަނަށް މަރުވި މީހުންގެ ތެރޭގައި ދެ ބިދޭސީއަކު ހިމެނޭ. އަދި ޒަހަމްވި މީހުންގެ ތެރޭގައި ވެސް ގިނަ އަދަދެއްގެ ބިދޭސީން ހިމެނޭ ކަމަށް، ހޮސްޕިޓަލްތަކުން ބުނޭ. އެކަމަކު "މިހާރު" އަށް މިހާތަނަށް އެނގިފައިވާ ގޮތުގައި އެއްވެސް ދިވެއްސަކަށް އަނިިޔާވެފައެއް ނުވޭ.
ސޯޝަލް މީޑިއާގައި ދިވެހިން ގެންދަނީ ލަންކާގެ ހަމަލާއާ މެދު ހިތާމަކޮށް، ހަމްދަރުދީ ފާޅުކުރަމުން. ލަންކާ އަކީ ރާއްޖެއާ އެންމެ އަވަށްޓެރި އަދި އެންމެ ގާތް އެކުވެރި ގައުމުކަމުން، ދިވެހިންނާއި ލަންކާއާ ޒަމާނުއްސުރެ އޮންނަނީ ވަކިނުކުރެވޭ ވަރުގެ ގުޅުމެއް.
ލަންކާގެ ކެބިނެޓްގެ ކުއްލި ބައްދަލުވުމެއް މިހާރު ކުރިއަށް އެބަ ދޭ. މިއީ ލަންކާގެ ތާރީޚުގައި ވެސް ވެރިރަށަށް ދިން ޓެރަރިސްޓް އެންމެ ބޮޑު އެއް ހަމަލާކަމުން ސަރުކާރަށް ވެސް ވަނީ ކުއްލި ޝޮކެއް ލިބިފައި. ހަނގުރާމައަށް ފަހު ލަންކާ އާންމު ގޮތެއްގައި ފެނުނީ ވަރަށް އަމާންކޮށް. ދޭތެރެ ދޭތެރެއިން ސިޔާސީ އަދި ދީނީ ކަންކަން ހޫނުވިޔަސް، މިފަދަ ނުރައްކާތެރި ހަމަލާތަކެއް ފެނިފައެއް ނުވޭ.
ސްރީ ލަންކާގެ ފުލުހުން ބުނާ ގޮތުގައި މި ހަމަލާތަކުގައި ގޮއްވާލީ ކޮން އެއްޗެއް ކަމެއް ވެސް ނޭނގޭ. އަދި ހަމަލާގެ ފަހަތުގައި ތިބި ބަޔަކާ ބެހޭ އެއްވެސް އެއްޗެއް އަދި ހާމައެއް ނުކުރޭ. ކޮލަމްބޯގެ މަގުތަކަށް މިހާރު ވަނީ ސިފައިން ވެސް ނެރެފައި.
ލަންކާގެ އެކި ހޮސްޕިޓަލްތަކުން ހާމަކުރި މައުލޫމާތުތަކަށް ބަލާއިރު މި ހަމަލާތަކުގައި މިހާތަނަށް 101 މީހަކު ވަނީ މަރުވެފައި. އެ އަދަދު އިތުރުވަމުން ދާނެ ކަމަށް ވެސް، ބައެއް އޮފިޝަލުން ބުނޭ.
ސްރީ ލަންކާގައި ތިބޭ އާސަންދައިގެ އޮފިޝަލުން "މިހާރު" އަށް ވިދާޅުވީ އެއްވެސް ދިވެއްސަކަށް އަނިޔާވެގެން ލަންކާގެ ހޮސްޕިޓަލަކަށް ގެންދިޔަކަމުގެ އެއްވެސް މައުލޫމާތެއް އަދި ލިބިފައި ނުވާ ކަމަށް.
ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަނީ ލަންކާއަށް ދިން މި ނުރަައްކާތެރި ހަމަލާ، ހަރުކަށި އިބާރާތުން ކުށްވެރިކޮށްފައި. އަދި އަނިޔާ ލިބުނު އާއިލާތަކާއި ސްރީ ލަންކާގެ ރައްޔިތުންނާ އެކު ދިވެހިން ތިބި ކަމަށް ވެސް ވިދާޅުވި.
ފައްޅިތަކުގައި ބޮން ގޮއްވާލުމަށް ފަހު ކޮލަމްބޯގެ ތިން ހޮޓަލަކާއި ބަޓިކަލޯގެ ފައްޅިއެއްގައި ވަނީ ބޮމެއް ގޮއްވާލާފައި. ބަޓިކަލޯ ހޮސްޕިޓަލްގެ އޮފިޝަލަކު ބުނީ ޒަޚަމްވެގެން 300 މީހުންނަށް ފަރުވާ ދެމުންދާ ކަމަށް.
ފުރަތަމަ ބޮން ގޮއްވާލާފައި ވަނީ ކޮލަމްބޯގައި ހުންނަ ސެއިންޓް އެންތަނީ ޗާޗާއި ނިގަމްބޯގައި ހުންނަ ސެއިންޓް ސެބަސްޓިއަން ޗާޗުގައި. ބޮމުގެ ހަމަލާގައި އެންތަނީ ޗާޗުން ވަނީ 160 މީހުން ޒަޚަމްވެފައި. ޒަޚަމްވި މީހުންނަށް ދަނީ ކޮލަމްބޯ ނޭޝަނަލް ހޮސްޕިޓަލްގައި ފަރުވާ ދެމުން.
އެމްބެސެޑަރު އުމަރު: އެމްބަސީގެ މުވައްޒަފުން އެކި ދިމަދިމާލަށް ފޮނުވައިގެން ވެސް އެބަ ބަލަން ދިވެއްސަކަށް އެއްވެސް ގެއްލުމެއް ލިބުނުތޯ.
ސްރީ ލަންކާގައި ހުންނަވާ ރާއްޖޭގެ އެމްބެސެޑަަރު އުމަރު ރައްޒާގު ވިދާޅުވީ ދިވެއްސަކަށް ގެއްލުމެއް ލިބުނު ކަމުގެ މައުލޫމާތު އަދި ލިބިވަޑައިގެންފައި ނުވާ ކަމަށް. އަދި ހަމަލާތައް އަމާޒުވި ހުރިހާ ހޮޓާތަކެއް ވަކިވަކިން ބަލައި، މަައަުލޫމާތު ހޯއްދަވަމުން ގެންދަވާ ވެސް ވިދާޅުވި.
ފޮރިން މިނިސްޓްރީން ބުނީ ހާދިސާއާ ގުޅިގެން، ލަންކާގައި ތިބި ދިވެހިންގެ ހާލަތު ބަލަމުން ކަމަށް
ސްރީ ލަންކާގެ ފުލުހުން ބުނާ ގޮތުގައި ލަންކާގެ މައި އެއާޕޯޓާއި ފައްޅިތަކާއި ހޮޓާތައް ކައިރީގައި މިހާރު ވަނީ ސަލާމަތީ ފިޔަވަޅުތައް ވަރުގަދަކޮށްފައި.
ސްރީ ލަންކާގެ ދާހިލީ ހަނގުރާމަ 2009 ގައި ނިމުމަކަށް އައި ފަހުން ވެރިރަށުގައި ދިން ޓެރަރިސްޓް އެންމެ ބޮޑު ހަމަލާގައި މިހާތަނަށް 49 މީހުން ވަނީ މަރުވެފައި. ފުލުހުން އެދެމުން ދަނީ ހަމަލާ ދިން ތަންތަނާ ކައިރިއަށް އެއްވެސް މީހަކު ނުދިއުމަށް.
އެއް ފައްޅިއަކަށް ދިން ހަމަލާގެ މައުލޫމާތު ހުރި ބައެއް މީހުން ބައިނަލްއަގުވާމި މީޑިއާތަކުގައި ވާހަކަ ދައްކަމުން ބުނީ އެއްޗެއް ގޮވުމާ އެކު މުޅި ހިސާބުގަނޑަށް ގުނޑުން އެރި ކަމަށް. އެތަނުން މަދުވެގެން 50 މީހުން ހޮސްޕިޓަލަށް ގެންދިޔަ ކަމަށް މީޑިއާތަކުން ބުނޭ.
ހަމަލާތަކުގައި 200 އަށް ވުރެ ގިނަ މީހުން ޒަހަމްވެފައިވާ ކަމަށް ބައެއް ރިޕޯޓްތައް ބުނޭ
ކޮންމެ ހަފުތާ ބަންދެއްގައި އެތައް ސަތޭކަ ދިވެހިން ސްރީ ލަންކާ އަށް ދަތުރުކުރޭ. އަދި އޭގެ ތެރެއިން ބައެއް މީހުން ސިނަމަން އާއި ކިންގްސްބަރީގައި ތިބޭ. އެކަމަކު ހަފުތާ ބަންދުގައި ލންކާއަށް ދާ ގިނަ މީހުން، ހޮނިހިރު ދުވަހުގެ ރޭ ރާއްޖެ އާދޭ.
ސިނަމަން އާއި ކިންގްސްބަރީގައި އާންމުކޮށް ދިވެހިން ތިބޭ. އެކަމަކު މި ހަމަލާތަކުގައި އެއްވެސް ދިވެއްސަކަށް ގެއްލުމެއް ލިބުނު ކަމެއް ނުވަތަ ނޫން ކަމެއް އަދި ކަށަވަރެއް ނުވޭ.
ސްރީ ލަންކާގައި ދިރިއުޅޭ ބައެއް ދިވެހިން ބުނާ ގޮތުގައި ސިނަމަން ގްރޭންޑް އާއި ސަންގްރިއްލާ އަދި އެ ސަރަހައްދުގައި ހުންނަ މަޝްހޫރު އެހެން ހޮޓަލެއް ކަމަށްވާ ކިންގްސްބަރީގައި ބޮންތަކެއް ވަނީ ގޮއްވާފައި
ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަކުރަމުން ދަނިކޮށް ދެ ފައްޅިއެއްގަ އާއި ކޮލަމްބޯގެ އެކި ތަންތަނުގައި ބޮންތަކެއް ގޮއްވާލައިގެން ދިން ހަމަލާތަކެއްގައި އެތައް ބަޔަކު މަރުވެއްޖެ އެވެ.
ރިޕޯޓްތައް ބުނާ ގޮތުގައި ފައްޅިތަކުގެ އިތުރުން ތިން ހޮޓަލެއްގައި ވެސް ވަނީ ހަމަލާ ދީފަ އެވެ.
ހަމަލާ އަމާޒުވި އެއް ފައްޅި ކަމަށްވާ ސެއިންޓް އެންތަނީސް ޗާޗް ހުންނަނީ ކަޓްނަޔާގެ ކޮއްޗިކަޑޭގަ އެވެ. ދެން ހަމަލާ ދީފައިވަނީ ކަޓުވަޕިޓިޔާގައި ހުންނަ ސެއިންޓް ސެބާސްޓިއަން ފައްޅިއަށެވެ.
މި ދެ ހާދިސާގައި އެތައް ބަޔަކު މަރުވެ އަދި ޒަހަމްވެގެން ހޮސްޕިޓަލަށް ވަނީ ގެންގޮސްފަ އެވެ.
މި ދެ ތަނުގައި ވެސް ބޮން ގޮއްވާލާފައި ވަނީ ލަންކާ ގަޑިން ހެނދުނު 8:45 ހާއިރު އެވެ.
އިތުރު ތަފްސީލު އަންނަނީ