29 އެޕްރީލް 2019 - 07:20
ޓައިގާ ކިޔާ ކެރެކްޓާއަކުން ސަލްމާން ހާން ފެންނަ ފްރެންޗައިޒްގެ ތިން ވަނަ ބައި ވެސް ހަދާނެ ކަމަށާއި އެ ފިލްމުގެ ސްކްރީންޕްލޭ މިހާރު ލިޔަމުން އަންނަ ކަމަށް ޑައިރެކްޓަރު އަލީ އައްބާސް ޒަފަރު ބުނެފި އެވެ.
ސަލްމާނާއި ކެޓްރީނާ ކެއިފާ އެކު އެންމެ ފުރަތަމަ "އޭކް ތަ ޓައިގާ" ގެނެސް ދިނީ ޑައިރެކްޓަރު ކަބީރު ހާނެވެ. އެއީ 2012 ގަ އެވެ. އޭގެ ފަހުން 2017 ގައި އޭގެ ދެވަނަ ބައި ހަމަ އެ ދެ ތަރިންނާ އެކު "ޓައިގާ ޒިންދާ ހޭ" ގެ ނަމުގައި ގެނެސް ދިނީ ޑައިރެކްޓަރު އަލީ އެވެ.
އެ ދެ ފިލްމު ވެސް ޕްރޮޑިއުސްކޮށްފައި ވަނީ ޔާޝްރާޖް ފިލްމްސް (ވައިއާރްއެފް) އިންނެވެ.
ސަލްމާނާއި ކެޓްރީނާ އެކު ޖޫންގައި "ބާރަތު" ގެނެސް ދޭން ތައްޔާރުވަމުން އަންނަ ޑައިރެކްޓަރު ޕިންކްވިލާ އަށް ބުނީ "ޓައިގާ" ގެ ތިން ވަނަ ފިލްމަކީ ސަލްމާން ވެސް ވަރަށް ބޮޑަށް ހަދަން ބޭނުންވާ ފިލްމެއް ކަމަށެވެ.
"މިހާރު އެ އޮތީ ސްކްރިޕްޓިން މަރުހަލާގައި،" އަލީ ބުންޏެވެ.
ނަމަވެސް ތިން ވަނަ ބައި ގެނެސް ދޭނެ އިރެއް އޭނާ ނުބުނެ އެވެ. އަނެއްކޮޅުން އެހާ އަވަހަކަށް އެ ފިލްމު ސްކްރީނަށް އަންނާނެ ކަމަކަށް ވެސް ނުބެލެވެ އެވެ. ސަބަބަކީ ސަލްމާންގެ އަތުގައި ޕްރޮޖެކްޓްތަކެއް މިހާރު ވެސް ފުނިޖެހިފައި ހުރުމެވެ.
އޭނާ މި ވަގުތު "ދަބަންގް 3" ގެ މަސައްކަތް ކުރަމުން އަންނަ އިރު، ދެން އެންމެ އަވަހަށް ޝޫޓިން ފަށާނީ ސަންޖޭ ލީލާ ބަންސާލީގެ "އިންޝާﷲ" ގެ އެވެ. އޭގެ ފަހުން ސޫރަޖް ބަރްޖަތިއާގެ ފިލްމަކާއި ސާޖިދު ނަދިއަދުވާލާގެ "ކިކް 2" ވެސް ކުރިއަށް ރޭވިފައި އެބަ އޮތެވެ.
ރިޕޯޓްތައް ބުނާ ގޮތުން "ބާރަތު" ގެ އެއް ޕްރޮޑިއުސަރު އަދި ސަލްމާންގެ ޅިޔަނު އަތުލް އަގްނިހޯތުރީ ރައިޓްސް ހޯދާފައިވާ 2015 ގެ ކޮރެއާގެ ކާމިޔާބު އެކްޝަން ކޮމެޑީ "ވެޓެރެން" އަކީ ވެސް ސަލްމާން ފެނިގެން ދާނެ ފިލްމެކެވެ.
ޖޫން 5 ގައި ރިލީޒް ކުރާ "ބާރަތު" އަކީ ސަލްމާނާ އެކު އަލީ މަސައްކަތް ކުރި ތިން ވަނަ ފިލްމެވެ. އެ ދެ މީހުން އެކީގައި މަސައްކަތް ކުރި ފުރަތަމަ ފިލްމަކީ 2015 ގެ "ސުލްތާން" އެވެ.
"ސަލްމާނާ އެކު މަސައްކަތް ކުރުމަކީ އަހަރެން ވަރަށް ގަޔާވާ ކަމެއް. އުންމީދު ކުރަން އަދިވެސް ގިނަ ފުރުސަތުތަކެއް ލިބޭނެ ކަމަށް." އޭނާ ބުންޏެވެ.