08 މެއި 2019 - 12:09
ސައުދީ އަރަބިއްޔާ އިން ރާއްޖެއަށް ހަދިޔާކުރި ކަދުރުގެ ތެރެއިން މާލޭ ރައްޔިތުންނަށް ވާ ބައި ބަހަން ފަށާނީ އަންނަ އާދިއްތަ ދުވަހު ކަމަށް މާލޭ ސިޓީ ކައުންސިލުން އިއްޔެ ބުނެފި އެވެ.
ސައުދީން ރާއްޖެއަށް ހަދިޔާކުރި 50 ޓަނުގެ ކަދުރުން މާލޭގެ ރައްޔިތުންނަށް ބަހަން އިސްލާމިކް މިނިސްޓްރީން ކަނޑައަޅާފައި ވަނީ 4268 ކަދުރު ޕެކެޓެވެ. ޕެކެޓެއްގައި އެއް ކިލޯ ހުންނަ އިރު އެއީ 4.2 ޓަނުގެ ކަދުރެވެ.
ކައުންސިލުން ބުނީ ކަދުރު ބަހާއިރު އިސްކަންދޭނީ މިދިޔަ އަހަރުގެ ފަގީރުންގެ ދަފްތަރުގައި ރަޖިސްޓްރީވެފައިވާ މީހުންނަށެވެ.
ކަދުރު ބެހުމުގެ މަސައްކަތް އެ ކައުންސިލުން ކުރިއަށް ގެންދާނީ ޕޮލިސް ޓޯޔާޑް ކައިރީ ހުންނަ ކައުންސިލުގެ އާންމު ހިދުމަތްތަކާ ބެހޭ ސެކްޝަނުން ހެނދުނު 9:30 އިން މެންދުރު 12:30 އާއި ރޭގަނޑު 9:00 އިން 10:30 އަށެވެ.
ކައުންސިލުން ބުނި ގޮތުގައި ކޮންމެ ގޭބިސީއަކަށް ދޭނީ އެއް ކަދުރު ޕެކެޓެވެ. ކަދުރު ބަލާ ދާއިރު ގޭގެ ކުލީގެ އެގްރިމެންޓުގެ އަސްލު ނުވަތަ ގޯތީގެ ރަޖިސްޓްރީގެ އަސްލާ އެކު ދިވެހި ރައްޔިތެއްކަން އަންގައިދޭ ކާޑު ވެސް ގެންދަން ޖެހެ އެވެ.
ރާއްޖޭގެ ފަގީރުންގެ ދަފްތަރުގައި 16،209 މީހުން ރަޖިސްޓްރީވެފައިވެ އެވެ. އެގޮތުން މާލޭގައި ފަގީރުންގެ ގޮތުގައި ރަޖިސްޓްރީވެފައި ވަނީ 3،300 މީހުންނެވެ.
ކައުންސިލުން ބުނި ގޮތުގައި ފަގީރުން ނޫން މީހުންނަށް ކަދުރު ބަހާނީ ފަގީރުންގެ ލިސްޓްގައި ތިބި މީހުންނަށް ދީ ނިންމައިފަ އެވެ. އެކަން ކުރިއަށް ގެންދާނީ ފުރަތަމަ އަންނަ ބަޔަކަށް އިސްކަން ދީގެނެވެ.