28 މެއި 2019 - 15:02
މީގެ ފަސް އަހަރު ކުރިން، 2014 ވަނަ އަހަރުގެ ތެރޭގައި ރައްޔިތުންގެ މަޖިލީހުގެ މެމްބަރުންތަކަކަށް މަރުގެ އިންޒާރު ދިން މީހުން އެނގިފައިވާ ކަމަށް، ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ރިޔާސީ ކޮމިޝަނުން ބުނެފި އެވެ.
އެ ކޮމިޝަނުން މިއަދު ކުރި ޓްވީޓެއްގައި ބުނީ ޖުލައި މަހާއި އޮގަސްޓު މަހުގެ ތެރޭގައި މެމްބަރުންނަށް މަރުގެ އިންޒާރު ދިން ފަރާތްތައް އެނގިފައިވާ ކަމަށާއި އެހެންވެ، އެ އިންޒާރު ލިބިފައިވާ ފަރާތްތަކުގެ ފޯނުގެ ރެކޯޑު ކޮމިޝަނާ ހިއްސާ ކުރުމަށް ކަމަށެވެ.
އެސްއެމްއެސްއެއް މެދުވެރިކޮށް މަރުގެ އިންޒާރު ދީފައިވަނީ އެމްޑީޕީގެ ހަތަރު މެންބަރަކަށެވެ. އެއީ ގަލޮޅު އުތުރު ދާއިރާގެ މެމްބަރު އީވާ އަބްދުﷲ އާއި އައްޑޫ މީދޫ ދާއިރާގެ މެމްބަރު ރޮޒައިނާ އާދަމާއި މެދު ހެންވޭރު ދާއިރާގެ މެމްބަރު އަލީ އާޒިމްގެ އިތުރުން އޭރު މައްޗަށްގޮޅީ އުތުރު ދާއިރާގެ މެންބަރުކަން ކުރެއްވި އަދި މިހާރުގެ ޑިފެންސް މިނިސްޓަރު މާރިޔާ އަހްމަދު ދީދީއަށެވެ.
މީގެ ތެރެއިން މާރިޔާ ފިޔަވައި އެހެން ހުރިހާ ބޭފުޅުންނަކީ ވެސް، ކުރިއަށް އޮތް މަޖިލީހުގެ ވެސް މެންބަރުންނެވެ.
ކާކުކަން ނޭނގޭ ނަމްބަރަކުން މެމްބަރުންނަށް މެސެޖްކޮށްފައިވަނީ "ފާޑުފާޑަށް އުޅޭ ކަމުގައިވާ ނަމަ މަރާލާނަން" ކަމަށް ބުނެ އެވެ. އެ ދުވަސްވަރު މާލޭގައި މަރުގެ ހާދިސާތަކެއް ހިނގާފައިވުމާއެކު އެ ކަންބޮޑުވުން މެމްބަރުން ވަރަށް ބޮޑަށް ފާޅުކުރެއްވި އެވެ. އަދި އެކަން ކަމާ ބެހޭ ފަރާތްތަކަށް ވެސް ހުށަހެޅުއްވި އެވެ.
އެކަމަކު އެ މައްސަލައިގައި އެއްވެސް ކުރިއެރުމެއް ހޯދިފައެއް ނުވެ އެވެ.