05 ޖޫން 2019 - 11:37
ޕެރިސް، ފްރާންސް (ޖޫން 5) - ބްރެޒިލް އަންހެނަކު ރޭޕްކުރިކަމުގެ ތުހުމަތުގައި ނޭމާއާ ދެކޮޅަށް ކުރިއަށްދާ މައްސަލައިގައި އޭނާ އަށް ދޭން ޖެހޭ އެހީތެރިކަން ދޭނެ ކަމަށް ބްރެޒިލްގެ ފުޓްބޯޅަ ފެޑެރޭޝަނުން ބުނެފި އެވެ.
ނޭމާ އަށް ކުރަނީ ޕެރިހުގެ ހޮޓެލް ސޮފިޓެލްގައި މިދިޔަ މަހު 15 ވަނަ ދުވަހު އެ އަންހެން މީހާ ރޭޕްކުރިކަމުގެ ތުހުމަތެވެ. އެ މައްސަލައިގެ ލިޔެކިއުންތަކުގައިވާ ގޮތުން ނޭމާއާ އެ އަންހެން މީހާއާ ދިމާވީ އިންސްޓަގްރާމުންނެވެ.
ނޭމާ އެ އަންހެން މީހާ ޕެރިހަށް އައުމަށް ޓިކެޓް ނަގައިދިނުމަށް ފަހު އެ ދެ މީހުން ބައްދަލުކުރީ ޕެރިހުގައި ހުންނަ ހޮޓެލް ސޮފިޓެލްގަ އެވެ. އެ ތަނުގައި އޮތް ބައްދަލުވުމަށް އައިއިރު، މަސްތުގެ ހާލުގައި ހުރި ނޭމާ އެ އަންހެން މީހާ އަށް އަނިޔާކޮށް ރޭޕްކޮށްފައިވާ ކަމަށް ލިޔުމުގައިވެ އެވެ. އެކަމަކު ނޭމާ އެ ތުހުމަތުތައް ދޮގުކުރެ އެވެ. އަދި ނޭމާ ވަނީ އެ އަންހެން މީހާ ކުރި ވަޓްސަޕް މެސެޖުތައް މީޑިއާ އަށް ހިއްސާކޮށްފަ އެވެ.
އިއްޔެ އޮތް ފީފާގެ ކޮންގްރެސް އަށް ފަހު މީިޑިއާގެ ސުވާލުތަކަށް ޖަވާބުދެމުން ބްރެޒިލްގެ ފުޓްބޯޅަ ފެޑެރޭޝަންގެ ރައީސް ރޮޖެރިއޯ ކަބަކްލޯ ވިދާޅުވީ ނޭމާގެ މައްޗަށް ކުރެވޭ އެ ތުހުމަތާ ގުޅޭ މައްސަލައިގެ ކަންތައްތައް ބްރެޒިލްގެ ފެޑެރޭޝަނުން ވަރަށް ގާތުން ބަލަމުން އަންނަ ކަމަށާއި ނޭމާ އަށް ފުރިހަަމަ އިތުބާރު އެބައޮތް ކަމަށެވެ.
"ނޭމާ އަކީ ޕްރޮފެޝަނަލް ސްޕޯޓްސްމަން އެއް. އޭނާގެ ފަރާތުން އެ ފަދަ ދަށު ދަރަޖައިގެ ކަމެއް ނުފެންނާނެ. މި މަހު ބްރެޒިލްގައި އޮންނަ ކޮޕަ އެމެރިކާގައި ނޭމާ ބްރެޒިލަށް ކުޅޭނެ،" ކަބަކްލޯ ވިދާޅުވި އެވެ.
ޕީއެސްޖީ އަށް ކުޅެނިކޮށް ދިމާވި އަހުލާގީ މައްސަލަތަކެއްގެ ސަބަބުން ބްރެޒިލްގެ ކެޕްޓަންކަން އުމުރުން 27 އަހަރުގެ ނޭމާ އަތުން ނަގައި ތަޖުރިބާކާރު ފުލްބެކް ޑެނީ އަލްވޭސް އަށް ވަނީ ދީފަ އެވެ. ދިމާވި މައްސަލަތަކުގެ ސަބަބުން ނޭމާ އަށް ވަނީ ދެ ސަސްޕެންޝަނެއް އައިސްފަ އެވެ. އެއީ ޗެމްޕިއަންސް ލީގުގައި ރެފްރީ އަކަށް ފާޑުކިއުމުންނާއި ފްރެންޗް ކަޕް ފައިނަލަށް ފަހު ސަޕޯޓަރެއްގެ ގައިގައި ޖެހުމުންނެވެ. އެކަމާ މެދު ހިތްހަމަނުޖެހިގެން ބްރެޒިލްގެ ކޯޗު ޓީޓޭ ވަނީ ނޭމާއާ ބައްދަލުކޮށްފަ އެވެ.
ރިޕޯޓްތައް ބުނާ ގޮތުގައި ނޭމާއާ ދެކޮޅަށް ރޭޕްގެ ތުހުމަތުކޮށް މައްސަލަ ހުށަހެޅި އަންހެން މީހާގެ ވާހަކަތަކުގައި ހަގީގަތާ ހިލާފު ކަންތައްތަކެއް ފާހަގަކުރެވޭތީ އޭނާގެ ވަކީލުން ވަނީ އެ މައްސަލައިގައި ވަކާލާތު ނުކުރަން ނިންމައިފަ އެވެ. އެހެންވެ ދެން އޮތީ ވަކީލުން ބަދަލުކޮށްގެން ކުރިއަށް ދިއުމެވެ.
މި މައްސަލައިގައި ނޭމާގެ ބައްޕަ މީގެ ކުރިން ބުނީ އެއީ ނޭމާގެ އަގުވައްޓާލަން ބަޔަކު ރާވައިގެން ކުރާ ދަށުދަރަޖައިގެ ކަމެއް ކަމަށާއި އެކަން ކާމިޔާބުވިޔަނުދޭނެ ކަމަށެވެ. އަދި ދާދި ފަހުން ބްރެޒިލްގެ ނެޝަނަލް ރޭޑިއޯ އަށް ދިން އިންޓަވިއުއެއްގައި ނޭމާގެ މަންމަ ބުނީ އުއްމީދުކުރަނީ ރޭޕްގެ ތުހުމަތުކުރި އަންހެން މީހާ އަށް ނޭމާ މައާފްކޮށް އިިސްލާހުވާން އިތުރު ފުރުސަތެއްދޭނެ ކަމަށް ކަމަށެވެ.
ނޭމާ މިހާރު އަންނަނީ މި މަހު 14 ވަނަ ދުވަހު ބްރެޒިލްގައި ފަށާ ދެކުނު އެމެރިކާގެ ގައުމުތައް ވާދަކުރާ ކޮޕަ އެމެރިކާ މުބާރާތަށް ތައްޔާރުވަމުންނެވެ. ނޭމާ ބުނީ އޭނާގެ އެންމެ ބޮޑު އަމާޒަކީ ބްރެޒިލަށް މި ފަހަރު އެ މުބާރާތް ކާމިޔާބު ކޮށްދިނުން ކަމަށެވެ.