07 ޖޫން 2019 - 08:43
ކާމިޔާބު ފިލްމުތަކެއް ގެނެސް ދީފައިވާ ހޮލީވުޑްގެ މަޝްހޫރު ޑައިރެކްޓަރު ވުޑީ އެލެން އޭނާގެ 51 ވަނަ ޑައިރެކްޝަނަށް ތައްޔާރުވެއްޖެ އެވެ.
އަދި ނަން އިއުލާންކޮށްފައި ނުވާ މި ފިލްމަކީ ރޮމޭންޓިކް ކޮމެޑީއެކެވެ. ފިލްމުގެ ޝޫޓިން އަންނަ މަހުގެ 10 ވަނަ ދުވަހު ސްޕެއިނުގައި ފަށާނެ އެވެ. މީގައި ކިޔައި ދޭނީ ސޭން ސެބާސްޓިއަން ފިލްމު ފެސްޓިވަލަށްދާ އެމެރިކާގެ ދެމަފިރަކަށް ފެސްޓިވަލުން ދިމާވާ ދެ މީހަކާ ލޯބިވެވި ހިނގާ މަޖާ ހާދިސާތަކެކެވެ.
ފިލްމުގެ ލީޑް ރޯލުން ފެނިގެން ދާނީ "އިންގްލޯރިއަސް ބަސްޓަޑް" އާއި "ޖާންގޯ އަންޗެއިންޑް" ފަދަ ފިލްމުތަކުން ފެނިފައިވާ އެކްޓަރު ކްރިސްޓޯފާ ވާލްޒް އާއި "ފޭސް/އޮފް" އާއި "ކިލާ ޖޯ" ފަދަ ފިލްމުތައް ކުޅުނު ބަތަލާ ޖިނާ ގާޝަން އެވެ.
ވުޑީ ޑައިރެކްޓް ކުރާ 51 ވަނަ ފިލްމުގެ މަސައްކަތް ފަށަން ތައްޔާރުވަމުން އަންނަ އިރު، އޭނާ ޑައިރެކްޓް ކުރި 50 ވަނަ ފިލްމު "އަ ރެއިނީ ޑޭ އިން ނިއު ޔޯކް" އޮތީ ޕްލޭން ކުރި ގޮތަށް ރިލީޒް ނުކުރެވި ތާށިވެފަ އެވެ.
އެއީ ވުޑީގެ މައްޗަށް ތުހުމަތު ކުރެވިފައިވާ ޖިންސީ ގޯނާގެ މައްސަލަތައް އަލުން ފެންމަތިވުމާ ގުޅިގެންނެވެ. އެކަމަކު އުމުރުން 83 އަހަރުގެ ޑައިރެކްޓަރު ދަނީ އެ ތުހުމަތުތަކަށް ތަކުރާރުކޮށް، އިންކާރު ކުރަމުންނެވެ.
އޭނާގެ މައްޗަށް ކުރެވޭ ތުހުމަތުތަކާ ގުޅިގެން ބައެއް ތަރިން ވަނީ ވުޑީއާ އެކު މަސައްކަތް ވެސް ނުކުރަން ނިންމައިފަ އެވެ.
ބެލެވޭ ގޮތުން "އަ ރެއިނީ ޑޭ އިން ނިއު ޔޯކް" އަންނަ ސެޕްޓެމްބަރު މަހުގެ 18 ގައި ފްރާންސްގައި ރިލީޒް ކުރާނެ އެވެ. އެ ފިލްމުގެ ތަރިންގެ ތެރޭގައި ޖޫޑް ލޯ، ޓިމޮތީ ކެމެލޭ، ސެލީނާ ގޮމޭޒް އަދި އެލް ފެނިންގް ހިމެނެ އެވެ.
ތިން ފަހަރަށް އޮސްކާ އެވޯޑް ހާސިލުކޮށްފައިވާ ވުޑީ އެންމެ ފަހުން ޑައިރެކްޓްކޮށް ގެނެސް ދިން ފިލްމަކީ 2017 ގެ "ވޮންޑަ ވީލް" އެވެ.