10 ޖޫން 2019 - 13:03
އއ. ތޮއްޑޫ ބްރައިޓް ކްލަބުން ކުޑައީދުގައި ބާއްވާ ޒަމާންވީ ފުޓްބޯޅަ މުބާރާތް ބްރައިޓް ޗެލެންޖް ކަޕުގެ ތަށި ޔަންގް ސްޓާ އިން ދިފާއުކޮށްފި އެވެ.
އިއްޔެ ހަވީރު ކުޅުނު ފައިނަލް މެޗު އެ ޓީމު ކާމިޔާބުކުރީ އެފްސީ ލެޖެންޑާ ވާދަކޮށް 5-0 އިންނެވެ. މި މެޗުގައި ޔަންގް ސްޓާގެ އަހުމަދު އައިހަމް ދެ ލަނޑު ޖެހި އެވެ. އަނެއް ތިން ލަނޑު ޖެހީ މުހައްމަދު އިރުޝާދު، ހަސަން މުއާން އަދި މުހައްމަދު އަންޝާދެވެ.
މުބާރާތުގެ އެންމެ މޮޅު ކުޅުންތެރިޔާގެ މަގާމާއި އެންމެ މޮޅު ޑިފެންޑަރުގެ މަގާމް ހޯދީ ޔަންގް ސްޓާގެ އައިހަމް އެވެ. އެންމެ މޮޅު ފޯވާޑުގެ މަގާމް ޔަންގް ސްޓާ އަށް ކުޅުނު ކްލަބް އީގަލްސްގެ ފޯވާޑް ހަސަން ރާއިފް އަހުމަދު (ހަންނަ) ހޯދިއިރު އެންމެ މޮޅު މިޑްފީލްޑަރުގެ މަގާމް ހޯދީ ލެޖެންޑުގެ އަހުމަދު ތަސްމީނެވެ. އެއް ވަނަ ގޯލްކީޕަރަކީ ލެޖެންޑުގެ ޒައިދާން އަހުމަދެވެ. އެންމެ ގިނަ ލަނޑު ޖެހި ކުޅުންތެރިޔަކީ ޔައި މެކްސް އެފްސީގެ އިބްރާހިމް އުޝާމަތެވެ. އުއްމީދީ ކުޅުންތެރިޔަކަށް ހޮވުނީ ކްލަބް ލަޔަންސްގެ މޫސާ ސާއިން ހަނީފެވެ.
މުޅި ރާއްޖެ އަށް ހުޅުވާލައިގެން ބޭއްވި މި މުބާރާތުގެ ޗެމްޕިއަން ޓީމަށް 45،000ރ. އަދި ރަނަރަޕް ޓީމަށް 15،000ރ. ވަނީ ދީފަ އެވެ.
މި މުބާރާތާއި ތޮއްޑޫ ސޯސަން ކްލަބުން ބާއްވަމުން އައި މުބާރާތަކީ އެ ރަށުން ނަން މަޝްހޫރު ކުޅުންތެރިން އުފެދުމުގައި ހިއްސާ އޮތް މުބާރާތްތަކެވެ. ތޮއްޑޫ މުހައްމަދު ނިޒާމާއި މުޚުތާރު ނަސީރު (ޓޫކިލޯ) ފަދަ ކުޅުންތެރިން ނިސްބަތްވާ ސޯސަން ކްލަބުން މިހާރު މުބާރާތެއް ނުބާއްވަ އެވެ. އެހެންވެ ބްރައިޓް ޗެލެންޖް ކަޕަކީ އެ ރަށުގައި ބާއްވާ މަތީ ފެންވަރުގެ ހަމައެކަނި މުބާރާތެވެ. މި ދެ ޓީމަކީ ރާއްޖޭގެ އެއް ރަށަކަށް ނިސްބަތްވާ އެންމެ ވާދަވެރި ދެ ކްލަބެވެ. އެގޮތުން ދެ ކްލަބް ޒޯން މުބާރާތްތަކުގައި ވަކިން ވާދަކޮށް ފައިނަލް ބުރަށް ވެސް ހޮވިފައިވެ އެވެ. ބްރައިޓުން ނުކުތް އެންމެ މަޝްހޫރު އެއް ކުޅުންތެރިޔަކީ ވެލެންސިއާ އަށް ކުރިން ކުޅުނު އިބްރާހިމް ރަޝީދު (ބޮޑު ތޮއްޑޫ) އެވެ.