07 ސެޕްޓެމްބަރ 2016 - 08:48
އެސްޓީއޯ ޓްރޭޑް ސެންޓަރުގެ އެންމެ މަތިން ވެއްޓި ދިވެއްސަކު މިއަދު މަރުވެއްޖެ އެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ ހަތަރު ވަނަ ބުރިން ވެއްޓި މަރުވީ ދިވެހި ފިރިހެނެއް ކަމަށެވެ. ނަމަވެސް އެ މީހާއާ ބެހޭ އިތުރު ތަފްސީލެއް އެނގިފައި ނުވާ ކަމަށް މީޑިއާ އޮފިޝަލް ވިދާޅުވި އެވެ.
މަންޒަރު ދުށް މީހުން ބުނީ އޭނާ ވެއްޓިފައި އޮތީ ޓްރޭޑް ސެންޓަރުގެ އެތެރޭގައި އޮންނަ، ކުރިން އަލްފްރެސްކޯ ހިންގި ތަނަށެވެ.
މީޑިއާ އޮފިޝަލް ވިދާޅުވި ގޮތުގައި މިއަދު ހެނދުނު 7:30 ހާއިރު އެ ހާދިސާގެ ރިޕޯޓު ލިބުމާއެކު ފުލުހުން އެ މީހާ ނަގައިގެން ހޮސްޕިޓަލަށް ގެންދިޔަ އިރު ކޮންމެވެސް ވަރަކަށް އޭނާ ވިންދު ހުއްޓެވެ.
"އެކަމަކު ހޮސްޕިޓަލަށް ގެންދިޔަތާ ކުޑަ އިރުކޮޅެއްގެ ތެރޭގައި އެ މީހާ މަރުވި ކަމަށް ޑޮކްޓަރުން ކަށަވަރުކޮށްދޭ،" މީޑިއާ އޮފިޝަލް ވިދާޅުވި އެވެ.
އެނގިފައިވާ ގޮތުގައި އެ މީހާގެ ބޯ ވަރަށް ބޮޑަށް ފަޅައިގެން ގޮސް، ހަށިގަނޑުގެ އެކި ތަންތަން ވަނީ ބިނދިފަ އެވެ. އެކަމަކު އެ މީހާ ވެއްޓުނީ ކީއްވެ ކަމެއް އަދި ސާފެއް ނުވެ އެވެ.